ವಾಹನ ದಾಖಲಾತಿಗಳ ನವೀಕರಣಕ್ಕೆ ಜೂನ್ 30ರ ತನಕ ಅವಕಾಶ

ವಾಹನದ ದಾಖಲೆಗಳಾದ ಡ್ರೈವಿಂಗ್ ಲೈಸೆನ್ಸ್, ಪರ್ಮಿಟ್ ಮತ್ತು ನೋಂದಣಿ ಈಗಾಗಲೇ ಅವಧಿ ಮೀರಿದ್ದರೆ ಅವುಗಳನ್ನು ನವೀಕರಣ ಮಾಡಲು ಜೂನ್ 30ರ ತನಕ ಸಮಯ ನೀಡಿದೆ. ಫೆಬ್ರವರಿ 1ರಿಂದ ಅವಧಿ ಮೀರಿದ್ದಲ್ಲಿ ಈ ಅವಕಾಶ ದೊರೆಯಲಿದೆ. ಕೊರೊನಾ ವೈರಾಣು ವ್ಯಾಪಿಸುವುದನ್ನು ತಡೆಗಟ್ಟಲು ಇಪ್ಪತ್ತೊಂದು ದಿನಗಳ ಲಾಕ್ ಡೌನ್ ಗೆ ದೇಶದಾದ್ಯಂತ ಕರೆ ನೀಡಿರುವ ಹಿನ್ನೆಲೆಯಲ್ಲಿ ಅವಧಿ ವಿಸ್ತರಣೆಯ ಘೋಷಣೆ ಬಂದಿದೆ.

ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು, ಎಲ್ಲ ರಾಜ್ಯಗಳ ಅಧಿಕಾರಿಗಳಿಗೆ ಈ ದಾಖಲಾತಿಗಳನ್ನೇ ಜೂನ್ 30ರ ತನಕ ಪರಿಗಣಿಸುವಂತೆ ಸೂಚಿಸಿದೆ. ಜತೆಗೆ ಈ ಅವಧಿಯಲ್ಲಿ ಯಾವುದೇ ಅಡೆತಡೆ ಇಲ್ಲದೆ ಸರಕು ಸಾಗಣೆಗೆ ಅನುವು ಮಾಡಿಕೊಡುವಂತೆ ಕೂಡ ಸೂಚನೆಯನ್ನು ನೀಡಿದೆ.

ಮೋಟಾರು ವಾಹನ ಕಾಯ್ದೆ ಮತ್ತು ಕೇಂದ್ರ ಮೋಟಾರು ವಾಹನ ನಿಯಮ ಅನುಸಾರ ವಿವಿಧ ದಾಖಲಾತಿಗಳನ್ನು ನವೀಕರಿಸಲು ನಾಗರಿಕರಿಗೆ ಸಾಧ್ಯವಾಗುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ಯಾವುದೇ ಸಮಸ್ಯೆ ಆಗಬಾರದು ಎಂಬ ಕಾರಣಕ್ಕೆ ಈ ನಿರ್ಧಾರ ಮಾಡಲಾಗಿದೆ. ಏಪ್ರಿಲ್ 14ನೇ ತಾರೀಕಿನ ತನಕ ಲಾಕ್ ಡೌನ್ ಘೋಷಣೆ ಮಾಡಲಾಗಿದೆ.