ತ್ರೈಮಾಸಿಕ ವರದಿ: ವೊಡಾಫೋನ್ ಐಡಿಯಾಗೆ 4,532.4 ಕೋಟಿ ರೂಪಾಯಿ ನಿವ್ವಳ ನಷ್ಟ
ದೇಶದ ಅಗ್ರಮಾನ್ಯ ಟೆಲಿಕಾಂ ಕಂಪನಿಗಳಲ್ಲಿ ಒಂದಾದ ವೊಡಾಫೋನ್ ಐಡಿಯಾ ಡಿಸೆಂಬರ್ 31 ಕ್ಕೆ ಕೊನೆಗೊಂಡ ತ್ರೈಮಾಸಿಕದಲ್ಲಿ ಒಟ್ಟು 4,532.4 ಕೋಟಿ ರೂಪಾಯಿ ನಿವ್ವಳ ನಷ್ಟವನ್ನು ವರದಿ ಮಾಡಿದೆ. ಹಿಂದಿನ ತ್ರೈಮಾಸಿಕದಲ್ಲಿ ಕಂಪನಿಯು 7,218.5 ಕೋಟಿ ನಿವ್ವಳ ನಷ್ಟವನ್ನು ದಾಖಲಿಸಿದೆ. ಈ ಬಾರಿಯ ತ್ರೈಮಾಸಿಕ ನಷ್ಟವು 2,118.9 ಕೋಟಿ ಗಳಿಕೆಯ ಹಿನ್ನಲೆಯಲ್ಲಿ ಕಡಿಮೆಯಾಗಿದೆ.
ನಿವ್ವಳ ನಷ್ಟದ ನಡುವೆ ಚಂದಾದಾರರ ಹೆಚ್ಚಳ ಮತ್ತು 2020-21ರ ಮೂರನೇ ತ್ರೈಮಾಸಿಕದಲ್ಲಿ ಹೆಚ್ಚಿನ 4 ಜಿ ಸೇರ್ಪಡೆಗಳ ಹಿನ್ನಲೆಯಲ್ಲಿ ಆದಾಯವು ಶೇಕಡಾ 1ರಷ್ಟು ಹೆಚ್ಚಳವಾಗಿ 10,894 ಕೋಟಿ ರೂಪಾಯಿಗೆ ತಲುಪಿದೆ.
2020 ರ ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ 119 ರೂ.ಗಳಿಂದ ಪ್ರತಿ ಬಳಕೆದಾರರ ಸರಾಸರಿ ಆದಾಯ (ಎಆರ್ಪಿಯು) 121 ರೂ.ಗೆ ಸುಧಾರಿಸಿದೆ. ಅಕ್ಟೋಬರ್-ಡಿಸೆಂಬರ್ ತ್ರೈಮಾಸಿಕದಲ್ಲಿ, ಕಂಪನಿಯ ಒಟ್ಟು ಚಂದಾದಾರರ ಸೇರ್ಪಡೆ ಸುಧಾರಿಸಿದೆ.
2021ರ ಡಿಸೆಂಬರ್ ವೇಳೆಗೆ 4,000 ಕೋಟಿ ರೂ. ವಾರ್ಷಿಕ ಒಪೆಕ್ಸ್ ಉಳಿತಾಯವನ್ನು ಸಾಧಿಸುವ ಗುರಿಯನ್ನು ಹೊಂದಿದೆ ಎಂದು ವೊಡಾಫೋನ್ ಐಡಿಯಾ ತಿಳಿಸಿದೆ.