ಸಗಟು ಹಣದುಬ್ಬರವು ನವೆಂಬರ್ ಗೆ 0.58 ಪರ್ಸೆಂಟ್

ಭಾರತದ ಸಗಟು ಹಣದುಬ್ಬರವು (ಡಬ್ಲ್ಯುಪಿಐ) ನವೆಂಬರ್ ನಲ್ಲಿ 0.58 ಪರ್ಸೆಂಟ್ ತಲುಪಿದೆ. ಅಕ್ಟೋಬರ್ ತಿಂಗಳಲ್ಲಿ ಆ ಪ್ರಮಾಣ 0.16 ಪರ್ಸೆಂಟ್ ಇತ್ತು. ಈ ಬಗ್ಗೆ ವಾಣಿಜ್ಯ ಮತ್ತು ಕೈಗಾರಿಕೆ ಸಚಿವಾಲಯ ದತ್ತಾಂಶವನ್ನು ಬಿಡುಗಡೆ ಮಾಡಿದೆ. ಆಹಾರ ಪದಾರ್ಥಗಳ ಬೆಲೆಯಲ್ಲಿನ ಏರಿಕೆಯು ಈಗಿನ ಹೆಚ್ಚಳಕ್ಕೆ ಮುಖ್ಯ ಕಾರಣವಾಗಿದೆ.

ಪ್ರಾಥಮಿಕ ವಸ್ತುಗಳ ಹಣದುಬ್ಬರವು 7.68 ಪರ್ಸೆಂಟ್ ಇದ್ದು, ಕಳೆದ ತಿಂಗಳು 6.4 ಪರ್ಸೆಂಟ್ ಇತ್ತು. ಉತ್ಪಾದನೆ ಸರಕು ಹಣದುಬ್ಬರವು -0.84 ಪರ್ಸೆಂಟ್ ಇತ್ತು. ಸತತ ಮೂರನೇ ತಿಂಗಳು ಇದು ನಕಾರಾತ್ಮಕ ವಲಯದಲ್ಲಿದೆ. ನಗರ ಹಾಗೂ ಗ್ರಾಮೀಣ ಆಹಾರ ಬೆಲೆ ಹಣದುಬ್ಬರ ಸೇರಿ ನವೆಂಬರ್ ನಲ್ಲಿ 10.01 ಪರ್ಸೆಂಟ್ ಗೆ ಏರಿಕೆಯಾಗಿದೆ.

ಗ್ರಾಹಕ ದರ ಸೂಚ್ಯಂಕದ (CPI) ಮೇಲೆ ಅವಲಂಬಿತವಾದ ಚಿಲ್ಲರೆ ಹಣದುಬ್ಬರವು ನವೆಂಬರ್ ನಲ್ಲಿ 5.54 ಪರ್ಸೆಂಟ್ ದಾಖಲಾಗಿದೆ. ಅಕ್ಟೋಬರ್ ಕೊನೆ ವಾರದಲ್ಲಿ ಈ ಪ್ರಮಾಣ 4.64 ಪರ್ಸೆಂಟ್ ಇತ್ತು. ಮಧ್ಯಮ ಅವಧಿಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಇರಿಸಿಕೊಂಡಿದ್ದ 4 ಪರ್ಸೆಂಟ್ ಗಿಂತ ಮೇಲಿನ ದರಕ್ಕೆ ಸತತ ಎರಡನೇ ತಿಂಗಳು ಏರಿಕೆ ಆಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ತರಕಾರಿಗಳ ಬೆಲೆ 36 ಪರ್ಸೆಂಟ್ ಹೆಚ್ಚಳವಾಗಿದೆ.