30 ವರ್ಷ ಆಸುಪಾಸಿನ ಪುರುಷ ಮತ್ತು ಮಹಿಳೆಯರು ಇದನ್ನು ಓದಲೇಬೇಕು

ಬಜೆಟ್ ಪುನರ್ ಹಂಚಿಕೆ ಮಾಡಿ

30ನೇ ವಯಸ್ಸಿನಲ್ಲಿ ಹಣಕಾಸು ಬಜೆಟ್ ಅನ್ನು ಪುನರ್ ವಿಮರ್ಶೆ ಮಾಡಬೇಕಾಗುತ್ತದೆ. 20ನೇ ವಯಸ್ಸಿನಲ್ಲಿ ತಯಾರಿಸಿದ ಬಜೆಟ್ ಮಾದರಿ ಈಗ ಸೂಕ್ತವಾಗಲಾರದು. ಜೀವನದ ಆದ್ಯತೆಗಳು ಬದಲಾಗಿರುವುದರಿಂದ ಬಜೆಟ್ ಸಹ ಬದಲಾಗುವುದು ಅನಿವಾರ್ಯ. ಹೊಸ ಮನೆ ಕಟ್ಟುವುದು, ಇನ್ನಾವುದೋ ಬಿಸಿನೆಸ್ ಆರಂಭಿಸುವುದು ಅಥವಾ ಮಕ್ಕಳ ಮದುವೆ ಖರ್ಚು ಹೀಗೆ ಅನೇಕ ವಿಷಯಗಳನ್ನು ಬಜೆಟ್‌ನಲ್ಲಿ ಅಳವಡಿಸಿಕೊಳ್ಳಬೇಕಾಗುತ್ತದೆ. ಗ್ಯಾಜೆಟ್‌ಗಳ ಮೇಲೆ ಹೆಚ್ಚಿನ ಖರ್ಚು ಮಾಡುವುದು ಅಥವಾ ಶೋಕಿ ವಸ್ತುಗಳನ್ನು ಖರೀದಿಸುವ ಮುನ್ನ ವಿಚಾರ ಮಾಡಿ ಮುಂದುವರಿಯಬೇಕಾಗುತ್ತದೆ. ಹೀಗೆ ಸ್ವಲ್ಪ ವಿವೇಚನೆಯಿಂದ ಉಳಿತಾಯ ಮಾಡಿದ ಹಣವನ್ನು ಬೇರೆ ಹಣಕಾಸು ಅಗತ್ಯಗಳಿಗಾಗಿ ಬಳಸಿಕೊಳ್ಳಬಹುದು.

 

ವಿಮಾ ಸುರಕ್ಷೆ ಹೆಚ್ಚಿಸಿಕೊಳ್ಳಿ

ನಿಮ್ಮನ್ನು ಅವಲಂಬಿಸಿದ ಕುಟುಂಬಸ್ಥರಿಗೆ ವಿಮಾ ಸುರಕ್ಷೆ ಒದಗಿಸುವುದು ಅತಿ ಪ್ರಮುಖವಾಗಿ ನಿಭಾಯಿಸಬೇಕಾದ ಜವಾಬ್ದಾರಿಗಳಲ್ಲೊಂದಾಗಿದೆ. ಮಕ್ಕಳು ಅಥವಾ ವೃದ್ಧ ಪಾಲಕರ ಸುರಕ್ಷತೆಗಾಗಿ ವಿಮೆ ಪಡೆಯಬೇಕಾಗುತ್ತದೆ. ಆದರೆ ಸಮಯ ಕಳೆದಂತೆ ವ್ಯಕ್ತಿಯೋರ್ವ ತನ್ನ ಎಲ್ಲ ಕುಟುಂಬಸ್ಥರಿಗೂ ವಿಮಾ ಸುರಕ್ಷೆ ದೊರಕುವಂತೆ ವಿಮೆಯ ವ್ಯಾಪ್ತಿಯನ್ನು ಹೆಚ್ಚಿಸಬೇಕಾಗುತ್ತದೆ. ಆದಾಗ್ಯೂ ಆದಷ್ಟು ಬೇಗ ವಿಮೆ ಪಡೆಯುವುದು ಉತ್ತಮ. ವಯಸ್ಸು ಕಡಿಮೆ ಇರುವಾಗ ಕಡಿಮೆ ಖರ್ಚಿನಲ್ಲಿ ವಿಮಾ ಸೌಲಭ್ಯ ಮಾಡಿಸಬಹುದು. ಆದರೆ ವಯಸ್ಸು ಹೆಚ್ಚಾದಂತೆಲ್ಲ ಈ ಖರ್ಚು ಹೆಚ್ಚಾಗುತ್ತದೆ.
ನಿಮ್ಮ ಆದಾಯದ 10 ಪಟ್ಟು ಹೆಚ್ಚು ವಿಮಾ ಸುರಕ್ಷೆ ಪಡೆಯವುದು ಸೂಕ್ತ ಎಂಬುದು ಹಣಕಾಸು ತಜ್ಞರ ಸಲಹೆಯಾಗಿದೆ. ಇನ್ನು ಮಹಿಳೆಯರ ನಿರೀಕ್ಷಿತ ಜೀವಿತಾವಧಿ ಹೆಚ್ಚಾಗಿರುವುದರಿಂದ ಅವರು ಪುರುಷರಿಗಿಂತ ಕಡಿಮೆ ದರದಲ್ಲಿ ವಿಮಾ ಪಾಲಿಸಿ ಕೊಳ್ಳಬಹುದಾಗಿದೆ. ಉದಾಹರಣೆಗೆ ನೋಡುವುದಾದರೆ 31 ವರ್ಷದ ಪುರುಷ ಹಾಗೂ 34 ವರ್ಷದ ಮಹಿಳೆ ಇಬ್ಬರೂ ಒಂದೇ ರೀತಿಯ ಪ್ರೀಮಿಯಂ ಕಟ್ಟಬೇಕಾಗುತ್ತದೆ.

ಸಾಲಗಳನ್ನು ತೀರಿಸಿ

ಪ್ರತಿತಿಂಗಳು ಇಎಂಐ ರೂಪದಲ್ಲಿ ನಿಮ್ಮ ಆದಾಯವನ್ನು ಕಬಳಿಸುತ್ತಿರುವ ಸಾಲಗಳನ್ನು ಆದಷ್ಟೂ ಕಡಿಮೆ ಮಾಡಿಕೊಳ್ಳಿ. ಇಂಥ ಸಾಲಗಳನ್ನು ಬೇಗನೆ ತೀರಿಸುವುದರಿಂದ ಬಡ್ಡಿ ಕಟ್ಟುವುದು ಉಳಿತಾಯವಾಗುತ್ತದೆ. ಅಲ್ಲದೆ ದೀರ್ಘಾವಧಿಯಲ್ಲಿ ಸಾಕಷ್ಟು ಹಣವನ್ನು ನೀವು ಉಳಿಸಿದಂತಾಗುತ್ತದೆ.

ತುರ್ತು ನಿಧಿ ಇಟ್ಟುಕೊಳ್ಳಿ

ಭವಿಷ್ಯದಲ್ಲಿ ಎದುರಾಗಬಹುದಾದ ನಿರುದ್ಯೋಗ, ತುರ್ತು ಆರೋಗ್ಯ ಚಿಕಿತ್ಸೆಯ ಖರ್ಚು ಮುಂತಾದುವುಗಳ ಮೊದಲೇ ವಿಚಾರ ಮಾಡಿ ತುರ್ತು ನಿಧಿಯೊಂದನ್ನು ಯಾವಾಗಲೂ ಇಟ್ಟುಕೊಳ್ಳಬೇಕು. ಇದರಿಂದ ಆಪತ್ ಕಾಲದಲ್ಲಿ ಹಣಕಾಸಿನ ಭದ್ರತೆ ಇರುತ್ತದೆ. ಸಾಮಾನ್ಯವಾಗಿ 6 ತಿಂಗಳ ಜೀವನಾವಶ್ಯಕ ಖರ್ಚಿಗಾಗುವಷ್ಟು ಹಣವನ್ನು ತುರ್ತು ನಿಧಿಯಾಗಿ ಇಡಬೇಕು ಎಂಬುದು ಆರ್ಥಿಕ ತಜ್ಞರ ಸಲಹೆಯಾಗಿದೆ. ಇದಕ್ಕಾಗಿ ಹಣ ಉಳಿತಾಯ ಆರಂಭಿಸಿ, ಇದನ್ನೊಂದು ಪ್ರತ್ಯೇಕ ಖಾತೆಯಲ್ಲಿಯೇ ಇಡುವುದು ಸೂಕ್ತ. ಆದರೆ ಬೇಕೆಂದಾಗ ಶೀಘ್ರವಾಗಿ ನಗದೀಕರಣವಾಗುವಂತೆ ಹಣ ಇಟ್ಟಿರಬೇಕು.

ಕೆಲ ಭಾಗವನ್ನು ರಿಟೈರಮೆಂಟ್‌ಗಾಗಿ ಮೀಸಲಿಡಿ

ನಿವೃತ್ತರಾದ ನಂತರ ಈಗ ಆದಾಯಕ್ಕಾಗಿ ಏನು ಮಾಡುವುದು ಎಂದು ಚಿಂತಿಸುವಂತಾಗಬಾರದು. ಅದಕ್ಕಾಗಿ ಆದಷ್ಟೂ ಮೊದಲೇ ಯೋಜನೆ ತಯಾರಿಸಬೇಕು. ವೃತ್ತಿ ಜೀವನ ಆರಂಭವಾಗುತ್ತಲೇ ಆದಾಯದ ಕೆಲ ಭಾಗವನ್ನು ನಿವೃತ್ತ ಜೀವನಕ್ಕಾಗಿ ಹೂಡಿಕೆ ಮಾಡುತ್ತ ಸಾಗಬೇಕು. ಇನ್ನು ಹಣದುಬ್ಬರವನ್ನು ಗಣನೆಗೆ ತೆಗೆದುಕೊಂಡರೆ ಭವಿಷ್ಯದಲ್ಲಿ ಬದುಕಿಗೆ ಎಷ್ಟು ಹಣ ಬೇಕಾಗಬಹುದು ಎಂಬುದನ್ನು ಸಹ ಲೆಕ್ಕಾಚಾರ ಹಾಕಿಟ್ಟುಕೊಳ್ಳುವುದು ಸೂಕ್ತ. ಮಹಿಳೆಯರ ನಿರೀಕ್ಷಿತ ಜೀವಿತಾವಧಿ ಪುರುಷರಿಗಿಂತ ಹೆಚ್ಚಾಗಿರುವುದರಿಂದ ಸಹಜವಾಗಿಯೇ ಪುರುಷರಿಗಿಂತ ಹೆಚ್ಚು ಮೊತ್ತದ ರಿಟೈರಮೆಂಟ್ ಫಂಡ್ ಅನ್ನು ನೀವು ಹೊಂದಿಸಿಕೊಳ್ಳಬೇಕಾಗುತ್ತದೆ. ಆದರೆ ಪುರುಷರಿಗೆ ಹೋಲಿಸಿದರೆ ಮಹಿಳೆಯರ ವೃತ್ತಿ ಜೀವನದ ಅವಧಿ ಕಡಿಮೆಯಾಗಿರುತ್ತದೆ. ವಿವಿಧ ಮ್ಯೂಚುವಲ್ ಫಂಡ್‌ಗಳ ಸಿಪ್ ಯೋಜನೆಗಳಲ್ಲಿ ಹಣ ತೊಡಗಿಸುವ ಮೂಲಕ ಆದಾಯ ಹೆಚ್ಚಾದಂತೆಲ್ಲ ಹೂಡಿಕೆಯನ್ನೂ ಹೆಚ್ಚಿಸುತ್ತ ಹೋಗಬಹುದು.

ಹೂಡಿಕೆಯಲ್ಲಿ ಲೆಕ್ಕಾಚಾರ ಹಾಕಿ ರಿಸ್ಕ್ ತೆಗೆದುಕೊಳ್ಳಿ

ಸಮಯಾವಧಿಯಲ್ಲಿ ಉಳಿತಾಯ ಮಾಡಿ ಹೂಡಿಕೆ ಮಾಡಿದರೆ ಮಾತ್ರ ಸಂಪತ್ತು ಸೃಷ್ಟಿಸಲು ಸಾಧ್ಯ. ಆದರೆ ಹಾಗಂತ ಹೆಚ್ಚು ಬಡ್ಡಿಯ ಆಮಿಷ ಒಡ್ಡಿ ಹಣ ದೋಚುವ ವಂಚಕ ಸಂಸ್ಥೆಗಳಲ್ಲಿ ಎಂದಿಗೂ ಹಣ ಹಾಕಬಾರದು.
ವಾರೆನ್ ಬಫೆಟ್ ಹೇಳುವಂತೆ- ಯಾರಾದರೂ ತಕ್ಷಣದಲ್ಲಿ ನಿಮ್ಮ ಹಣವನ್ನು ಬೆಳೆಸಿಕೊಡುತ್ತೇನೆ ಎಂದಲ್ಲಿ ನೀವೂ ತಕ್ಷಣ 'ಬೇಡ' ಎಂದು ಬಿಡಿ ಎಂಬುದು ಯಾವಾಗಲೂ ಸತ್ಯವಾಗಿದೆ.
ಹಾಗೆಯೇ ವಿವಿಧ ರೀತಿಯ ಯೋಜನೆಗಳಲ್ಲಿ ಹೂಡಿಕೆ ಮಾಡುವುದರಿಂದ ರಿಸ್ಕ್ ಅಂಶವನ್ನು ಕಡಿಮೆ ಮಾಡಿಕೊಳ್ಳಬಹುದು.

ಸಂಪತ್ತು ಸೃಷ್ಟಿಸಿ

ಈಗಿನ ದಿನಮಾನಗಳಲ್ಲಿ ಸಾಲ ಪಡೆಯುವುದು ಅತಿ ಸುಲಭವಾಗಿದೆ. ಆದರೆ ಸಾಲ ಪಡೆಯುವ ಮುನ್ನ ನೂರು ಬಾರಿ ವಿಚಾರ ಮಾಡಬೇಕಾಗುತ್ತದೆ. ಸುಮ್ಮನೆ ಸಾಲ ಪಡೆದು ಅದಕ್ಕೆ ದುಬಾರಿ ಬಡ್ಡಿ ತೆರುವುದು ಜಾಣತನವಲ್ಲ. ಅದರಲ್ಲೂ ಯಾವುದೋ ದಿನ ಬಳಕೆಯ ವಸ್ತುಗಳನ್ನು ಸಾಲ ಮಾಡಿ ಕೊಳ್ಳುವುದು ಸರಿಯಲ್ಲ. ನಿಮ್ಮ ಆದಾಯಯವನ್ನು ಸೂಕ್ತವಾಗಿ ವಿನಿಯೋಜಿಸಿ ಅದರಿಂದ ಭವಿಷ್ಯದಲ್ಲಿ ಹೇಗೆ ಉತ್ತಮ ಆದಾಯ ಪಡೆಯಬಹುದು ಎಂಬ ಬಗ್ಗೆ ಯೋಚಿಸಿ, ಯೋಜನೆ ಹಾಕಿಕೊಳ್ಳಿ. ಮಹಿಳೆಯರಿಗೆ ಕಡಿಮೆ ಬಡ್ಡಿ ದರದಲ್ಲಿ ಬ್ಯಾಂಕ್‌ಗಳು ಗೃಹ ಸಾಲ ನೀಡುತ್ತವೆ ಎಂಬುದು ನಿಮಗೆ ಗೊತ್ತಿರಲಿ. ಇನ್ನು ಕೆಲ ರಾಜ್ಯ ಸರಕಾರಗಳು ಮಹಿಳೆಯರಿಗೆ ಶೇ. 2 ರಷ್ಟು ಮುದ್ರಾಂಕ ವಿನಾಯಿತಿಯನ್ನು ಸಹ ನೀಡುತ್ತವೆ.

ಸಂಗಾತಿಯೊಂದಿಗೆ ಚರ್ಚಿಸಿ

ನೀವು ವಿವಾಹಿತರಾಗಿದ್ದಲ್ಲಿ ಹಣಕಾಸು ಯೋಜನೆಗಳ ಕುರಿತು ನಿಮ್ಮ ಸಂಗಾತಿಯೊಂದಿಗೆ ಸಮಗ್ರವಾಗಿ ಚರ್ಚಿಸಿ. ಇಬ್ಬರೂ ಆದಾಯ ಹಾಗೂ ಖರ್ಚುಗಳನ್ನು ಸೂಕ್ತವಾಗಿ ನಿಭಾಯಿಸಲು ಇದರಿಂದ ಸಹಾಯವಾಗುತ್ತದೆ. ಜೊತೆಗೆ ಹಣಕಾಸು ಗುರಿಗಳನ್ನು ನಿರ್ಧರಿಸಿ ಅದಕ್ಕೆ ತಕ್ಕ ಯೋಜನೆ ರೂಪಿಸಿಕೊಳ್ಳಿ. ಆದಷ್ಟೂ ಜೊತೆಯಾಗಿಯೇ ಹಣಕಾಸು ಯೋಜನೆಗಳನ್ನು ತಯಾರಿಸುವುದು ಸೂಕ್ತ.

ಹೂಡಿಕೆಗಳನ್ನು ಪುನರ್ ಪರಿಶೀಲನೆ ಮಾಡಿ

ನಿಮ್ಮ ಹೂಡಿಕೆಗಳನ್ನು ಆಗಾಗ ಪರಿಶೀಲನೆ ಮಾಡುತ್ತಿರಬೇಕಾಗುತ್ತದೆ. ಉತ್ತಮ ಪ್ರತಿಫಲ ದೊರಕುವಂತೆ ಮಾಡಲು ಕೆಲ ಬಾರಿ ಹೂಡಿಕೆಗಳನ್ನು ಮರು ವಿನಿಯೋಜನೆ ಮಾಡುವುದು ಅಗತ್ಯ. ಕನಿಷ್ಠ ತ್ರೈಮಾಸಿಕಕ್ಕೊಮ್ಮೆಯಾದರೂ ಹೂಡಿಕೆಗಳನ್ನು ಪರಿಶೀಲಿಸಿ. ಹೂಡಿಕೆಯ ಮೊದಲ 5 ತಿಂಗಳ ಅವಧಿಯಲ್ಲಿ ನಿರೀಕ್ಷಿತಿ ಪ್ರತಿಫಲ ಬಂದಿಲ್ಲವೆಂದಾಗ ಆತಂಕಗೊಳ್ಳಬೇಡಿ. ಮ್ಯೂಚುವಲ್ ಫಂಡ್‌ಗಳಲ್ಲಿನ ಹೂಡಿಕೆ ಬೆಳೆಯಲು ಕನಿಷ್ಠ ವರ್ಷವಾದರೂ ಬೇಕಾಗುತ್ತದೆ ಎಂಬುದು ತಿಳಿದಿರಲಿ.

ಸರಕಾರಿ ಯೋಜನೆಗಳ ಪ್ರಯೋಜನ ಪಡೆದುಕೊಳ್ಳಿ

ನಿಮಗೆ ಹೆಣ್ಣು ಮಗಳಿದ್ದಲ್ಲಿ ಅವಳಿಗಾಗಿ ಸರಕಾರಿ ಯೋಜನೆಯಾದ ಸುಕನ್ಯಾ ಸಮೃದ್ಧಿ ಯೋಜನೆಯನ್ನು ಪಡೆದುಕೊಳ್ಳಬಹುದು. ವರ್ಷಕ್ಕೆ ಗರಿಷ್ಠ ೧.೫ ಲಕ್ಷ ರೂಪಾಯಿಗಳನ್ನು ಈ ಯೋಜನೆಯಲ್ಲಿ ಹೂಡಿಕೆ ಮಾಡಿ ಶೇ. 8.6 ಬಡ್ಡಿ ದರದಲ್ಲಿ ಆದಾಯ ಪಡೆಯಬಹುದು. ಜೊತೆಗೆ ಹೂಡಿಕೆ ಮೊತ್ತ, ಗಳಿಸಿದ ಬಡ್ಡಿ ಹಾಗೂ ಪಕ್ವತಾ ಮೊತ್ತ ಹೀಗೆ ಎಲ್ಲದರ ಮೇಲೂ ಕಾಯ್ದೆ ೮೦ಸಿ ಪ್ರಕಾರ ತೆರಿಗೆ ವಿನಾಯಿತಿ ಪಡೆದುಕೊಳ್ಳಬಹುದು.