ಹಣದಿಂದ ಹಣ ದುಪ್ಪಟ್ಟು ಮಾಡುವುದು ಹೇಗೆ?

ಲಿಕ್ವಿಡ್ ಫಂಡ್ಸ್

ನಿರೀಕ್ಷಿತ ರಿಟರ್ನ್ಸ್ (ಪ್ರತಿಫಲ): ಶೇ. 6 ರಿಂದ 8
ಲಿಕ್ವಿಡಿಟಿ: ಅದೇ ದಿನ ಅಥವಾ ಮರುದಿನ
ಹೆಸರೇ ಹೇಳುವಂತೆ ಈ ಫಂಡ್‌ಗಳಲ್ಲಿನ ಹೂಡಿಕೆಯನ್ನು ಯಾವಾಗ ಬೇಕಾದರೂ ಶೀಘ್ರ ಹಾಗೂ ಸುಲಭವಾಗಿ ಹಿಂಪಡೆಯಬಹುದು. ಯಾವುದೇ ಲಾಕ್ ಇನ್ ಅವಧಿಯ ನಿರ್ಬಂಧವಿರುವುದಿಲ್ಲ. ಹಾಗೆಯೇ ಪ್ರವೇಶ ಅಥವಾ ನಿರ್ಗಮನ ಶುಲ್ಕಗಳು ಸಹ ಇಲ್ಲ. ಬೇಕೆಂದಾಗ ನಗದು ಪಡೆಯುವ ಇವು ಕಡಿಮೆ ಅಪಾಯದ ಹೂಡಿಕೆ ಫಂಡ್‌ಗಳಾಗಿವೆ. ಆನ್ಲೈನ್ ಮೂಲಕ ಫಂಡ್‌ಗಳನ್ನು ಖರೀದಿಸಬಹುದಾಗಿದ್ದು, ಬೇಕೆಂದಾಗ ಹಣ ಸೇರಿಸಬಹುದು ಅಥವಾ ಹಿಂಪಡೆಯಬಹುದು.

ಫಿಕ್ಸೆಡ್ ಡಿಪಾಸಿಟ್

ನಿರೀಕ್ಷಿತ ರಿಟರ್ನ್ಸ್: ಶೇ.3 ರಿಂದ 7
ಲಿಕ್ವಿಡಿಟಿ (ನಗದೀಕರಣ): ಅದೇ ದಿನ. ದಂಡ ಶುಲ್ಕಗಳ ಬಗ್ಗೆ ಪರಿಶೀಲನೆ ಅಗತ್ಯ
ಫಿಕ್ಸೆಡ್ ಡಿಪಾಸಿಟ್‌ಗಳು ಸಾಂಪ್ರದಾಯಿಕ ಹಾಗೂ ನಿಧಾನವಾಗಿ ಹಣ ಬೆಳೆಯುವ ಹೂಡಿಕೆ ವಿಧಾನವಾಗಿವೆ. ಇತ್ತೀಚೆಗೆ ಕೆಲ ಬ್ಯಾಂಕುಗಳು ಎಫ್‌ಡಿ ಬಡ್ಡಿದರಗಳನ್ನು ಹೆಚ್ಚಿಸಿದ್ದು, ಅವಧಿಪೂರ್ವ ಎಫ್‌ಡಿ ನಗದೀಕರಣಕ್ಕೆ ಯಾವುದೇ ಶುಲ್ಕಗಳನ್ನು ವಿಧಿಸುತ್ತಿಲ್ಲ. ಭವಿಷ್ಯದಲ್ಲಿ ನಿಖರವಾಗಿ ಹಣ ಯಾವಾಗ ಬೇಕಾಗಲಿದೆ ಎಂಬುದು ತಿಳಿದಾಗ ಹಾಗೂ ಕೈಯಲ್ಲಿ ಹೆಚ್ಚುವರಿ ಮೊತ್ತ ಇರುವಾಗ ಎಫ್‌ಡಿಗಳಲ್ಲಿ ಹೂಡಿಕೆ ಸೂಕ್ತ. ಹೂಡಿಕೆಗೆ ಸಂಪೂರ್ಣ ಸುರಕ್ಷತೆಯನ್ನು ಬಯಸುವವರಿಗೆ ಎಫ್‌ಡಿ ಹೇಳಿ ಮಾಡಿಸಿದಂತಿವೆ.

ಇಕ್ವಿಟಿ

ನಿರೀಕ್ಷಿತ ರಿಟರ್ನ್ಸ್: ಹಲವಾರು ಅಂಶಗಳನ್ನು ಆಧರಿಸಿ ಹೆಚ್ಚು ಕಡಿಮೆ ಆಗಬಹುದು
ಲಿಕ್ವಿಡಿಟಿ: ಮರುದಿನ
ಉಳಿತಾಯದ ಹಣದಿಂದ ಸಂಪತ್ತು ಸೃಷ್ಟಿಗೆ ಇಕ್ವಿಟಿಗಳು ಉತ್ತಮ ಯೋಜನೆಗಳಾಗಿವೆ. ಆಗಾಗ ಮಾರ್ಕೆಟ್‌ನ ಏರಿಳಿತಗಳನ್ನು ನೋಡಿ ಆತಂಕ ಪಡುವುದು ಬೇಡವೆಂದಾದಲ್ಲಿ ಪ್ರತಿ ತಿಂಗಳು ಸಿಪ್ (ಯೋಜನಾಬದ್ಧ ಹೂಡಿಕೆ ಯೋಜನೆ) ಮೂಲಕ ಹಣ ಜಮೆ ಮಾಡುತ್ತ ಹೋಗಬಹುದು. ಇಕ್ವಿಟಿಗಳಲ್ಲಿ ದೊಡ್ಡ ಮೊತ್ತದ ಪ್ರತಿಫಲವನ್ನು ಪಡೆಯುವ ಅವಕಾಶಗಳು ಹೇರಳವಾಗಿವೆ. ಅದರ ಜೊತೆಗೆ ರಿಸ್ಕ್ ಸಹ ಅಷ್ಟೇ ಹೆಚ್ಚಾಗಿರುತ್ತದೆ ಎಂಬುದು ಗೊತ್ತಿರಲಿ. ಇತರ ಯೋಜನೆಗಳಿಗೆ ಹೋಲಿಸಿದಲ್ಲಿ ಇಕ್ವಿಟಿಗಳಲ್ಲಿನ ಹೂಡಿಕೆಯ ಗಳಿಕೆಗೆ ಅಲ್ಪ ಪ್ರಮಾಣದ ತೆರಿಗೆಯನ್ನು ವಿಧಿಸಲಾಗುತ್ತದೆ.

ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ (ಪಿಪಿಎಫ್)

ನಿರೀಕ್ಷಿತ ರಿಟರ್ನ್ಸ್: ಶೇ. 7
ಲಿಕ್ವಿಡಿಟಿ: ಹೂಡಿಕೆಯ ಕನಿಷ್ಠ ನಿಗದಿತ ಅವಧಿ (ದೀರ್ಘಾವಧಿ)
ಬಹು ಹಿಂದಿನಿಂದಲೂ ಅತ್ಯಂತ ಜನಪ್ರಿಯ ಹೂಡಿಕೆ ಯೋಜನೆಯಾಗಿರುವ ಪಿಪಿಎಫ್ 80 ರ ದಶಕದ ನಂತರ ಇತ್ತೀಚೆಗೆ ಅತಿ ಕಡಿಮೆ ಪ್ರತಿಫಲ ನೀಡಿದೆ. ಇದರಲ್ಲಿನ ಹೂಡಿಕೆಯ ಬಡ್ಡಿಗೆ ಸರಕಾರದ ಖಾತ್ರಿ ಇರುವುದು ಹಾಗೂ ತೆರಿಗೆ ರಿಯಾಯಿತಿಗಳು ಇದರ ವೈಶಿಷ್ಟ್ಯವಾಗಿವೆ. ಗರಿಷ್ಠ ಹಾಗೂ ಕನಿಷ್ಠ ಹೂಡಿಕೆಯ ಮಿತಿ ಹಾಗೂ ವರ್ಷಕ್ಕೆ ಹಣ ಜಮೆ ಮಾಡುವ ಸಂಖ್ಯೆಗಳ ಮೇಲಿನ ಮಿತಿಗಳಿಂದ ಇದು ಎಲ್ಲರಿಗೂ ಸೂಕ್ತವಾದ ಯೋಜನೆಯಾಗಿಲ್ಲ.

ಪಿ2ಪಿ ಲೆಂಡಿಂಗ್

ನಿರೀಕ್ಷಿತ ರಿಟರ್ನ್ಸ್: ಶೇ. 18 ರಿಂದ 26
ಲಿಕ್ವಿಡಿಟಿ: ನೀವು ನೀಡುವ ಸಾಲದ ಅವಧಿ ಆಧರಿತ
ಬಹುತೇಕ ಆನ್ಲೈನ್ ಮೂಲಕ ನಿರ್ದಿಷ್ಟ ಪ್ಲಾಟಫಾರ್ಮ ಬಳಸಿ ಹಣದ ಅವಶ್ಯಕತೆ ಇರುವವರಿಗೆ ನಮ್ಮ ದುಡ್ಡನ್ನು ಸಾಲವಾಗಿ ನೀಡುವುದು ಪಿ2ಪಿ ಲೆಂಡಿಂಗ್ ಆಗಿದೆ. ಆರಂಭದಲ್ಲಿ ಚಿಕ್ಕ ಮೊತ್ತದೊಂದಿಗೆ ವ್ಯವಹಾರ ಆರಂಭಿಸಬಹುದು. ಒಂದೇ ದೊಡ್ಡ ಮೊತ್ತದ ಸಾಲದಲ್ಲಿ ಎಲ್ಲ ಹಣ ತೊಡಗಿಸುವುದಕ್ಕಿಂತ ವಿವಿಧ ರೀತಿಯ ಚಿಕ್ಕ ಸಾಲಗಳಲ್ಲಿ ಹಣ ವಿನಿಯೋಜನೆಯಿಂದ ಆದಷ್ಟೂ ರಿಸ್ಕ್ ಕಡಿಮೆ ಮಾಡಿಕೊಳ್ಳಬಹುದು. ಪ್ರತಿ ತಿಂಗಳು ಹೂಡಿಕೆಯ ಕೆಲ ಭಾಗ ಹಾಗು ಬಡ್ಡಿಯು ವಾಪಸ್ ಬರುವಂತೆ ನೋಡಿಕೊಳ್ಳಬೇಕು. ಈ ವ್ಯವಹಾರಕ್ಕೆ ಯಾವುದೇ ವಿಮಾ ಸುರಕ್ಷೆ ಇರುವುದಿಲ್ಲವಾದ್ದರಿಂದ ಯಾವ ರೀತಿಯ ಸಾಲದ ವ್ಯವಹಾರ ನಡೆಸಬೇಕೆಂಬ ಬಗ್ಗೆ ಸೂಕ್ತ ನಿರ್ಧಾರ ಕೈಗೊಳ್ಳುವುದು ನಿಮ್ಮದೇ ಜವಾಬ್ದಾರಿಯಾಗಿರುತ್ತದೆ.