ಮಾರುತಿ ಕಾರು ಖರೀದಿಸಲು ಐಸಿಐಸಿಐ ಬ್ಯಾಂಕ್ ನಿಂದ ಆಫರ್

ಭಾರತದ ಅತಿದೊಡ್ಡ ಕಾರು ತಯಾರಿಕೆ ಕಂಪೆನಿ ಮಾರುತಿ ಸುಜುಕಿ ಇಂಡಿಯಾ (ಎಂಎಸ್ ಐ) ಇದೀಗ ಐಸಿಐಸಿಐ ಬ್ಯಾಂಕ್ ಜತೆ ಕೈ ಜೋಡಿಸಿ, ತನ್ನ ಗ್ರಾಹಕರಿಗೆ ರೀಟೇಲ್ ಹಣಕಾಸು ಯೋಜನೆಗಳನ್ನು ಒದಗಿಸುತ್ತಿದೆ. ಈ ಯೋಜನೆ ಅಡಿಯಲ್ಲಿ ಗ್ರಾಹಕರಿಗೆ ಆರಂಭದ ಇಎಂಐಗಳು ಸಿಕ್ಕಾಪಟ್ಟೆ ಕಡಿಮೆ ಇರುತ್ತದೆ. ಕೊರೊನಾ ಸಮಸ್ಯೆ ಇರುವುದರಿಂದ ನಗದು ಸಮಸ್ಯೆ ಆಗಬಾರದು ಎಂದು ಈ ಯೋಜನೆ ತರಲಾಗಿದೆ.

ಖರೀದಿ ನಂತರದ ಆರಂಭದ ಮೂರು ತಿಂಗಳಿನ ಇಎಂಐ ಪ್ರತಿ 1 ಲಕ್ಷಕ್ಕೆ 899 ರುಪಾಯಿ ಇರುತ್ತದೆ. ಐಸಿಐಸಿಐ ಬ್ಯಾಂಕ್ ನಿಂದ ಮಾರುತಿ ಸುಜುಕಿ ಗ್ರಾಹಕರಿಗೆ ಬೇರೆ ಸಾಲದ ಯೋಜನೆಗಳನ್ನು ಸಹ ನೀಡಲಾಗುತ್ತಿದೆ. ಮಾರುತಿ ಸುಜುಕಿಗೆ 3000ಕ್ಕೂ ಹೆಚ್ಚು ಔಟ್ ಲೆಟ್ ಗಳು ಇದ್ದರೆ, ಐಸಿಐಸಿಐ ಬ್ಯಾಂಕ್ ಗೆ 5380ಕ್ಕೂ ಹೆಚ್ಚು ಶಾಖೆಗಳಿವೆ.

ಕಡಿಮೆ ಡೌನ್ ಪೇಮೆಂಟ್ ಮತ್ತು ಕಡಿಮೆ ಇಎಂಐಗಳ ಕಾರಣದಿಂದಾಗಿ ಗ್ರಾಹಕರು ಕಾರು ಖರೀದಿಸಲು ಉತ್ತೇಜನ ದೊರೆತಂತಾಗುತ್ತದೆ. ಜತೆಗೆ ಕೊರೊನಾ ಸಂದರ್ಭದಲ್ಲಿ ಹೆಚ್ಚಿನ ಆರ್ಥಿಕ ಹೊರೆ ಕೂಡ ಬೀಳುವುದಿಲ್ಲ ಎಂದು ಮಾರುತಿ ಸುಜುಕಿ ಇಂಡಿಯಾದಿಂದ ಹೇಳಲಾಗಿದೆ.