ಎಲ್ ಐಸಿ ಹೌಸಿಂಗ್ ಫೈನಾನ್ಸ್ ಗೃಹ ಸಾಲದ ಬಡ್ಡಿ ದರದಲ್ಲಿ ಭರ್ಜರಿ ಇಳಿಕೆ

ಗೃಹ ಸಾಲ ಪಡೆಯುವವರಿಗೆ ಅಲ್ ಐಸಿ ಹೌಸಿಂಗ್ ಫೈನಾನ್ಸ್ ನಿಂದ ಭರ್ಜರಿ ಸುದ್ದಿ ಇದೆ. ಯಾರ CIBIL ಸ್ಕೋರ್ 800 ಅಥವಾ ಅದಕ್ಕಿಂತ ಹೆಚ್ಚಿರುತ್ತದೋ ಅಂಥ ಹೊಸ ಗ್ರಾಹಕರಿಗೆ 7.5 ಪರ್ಸೆಂಟ್ ಬಡ್ಡಿ ದರದಲ್ಲಿ ಗೃಹ ಸಾಲ ನೀಡಲಾಗುತ್ತದೆ. ಮತ್ತು ಸಾಲದ ಮೊತ್ತ ಎಷ್ಟೇ ಆದರೂ ಇದೇ ಬಡ್ಡಿ ದರ ಇರುತ್ತದೆ. ಈ ಹಿಂದೆ ಇದೇ ಕ್ರೆಡಿಟ್ ಸ್ಕೋರ್ ಇರುವವರಿಗೆ ವಾರ್ಷಿಕ 8.10 ಪರ್ಸೆಂಟ್ ಬಡ್ಡಿ ಹಾಕಲಾಗುತ್ತಿತ್ತು.

ಇನ್ನು ಈಗ ಪಡೆಯುತ್ತಿರುವ ಗೃಹ ಸಾಲದ ಮೊತ್ತ ಹಾಗೂ ಒಂದೇ ಸಲಕ್ಕೆ ಪಾವತಿಸಲಾದ ಎಲ್ ಐಸಿ ಟರ್ಮ್ ಇನ್ಷೂರೆನ್ಸ್ ಮೊತ್ತ ಒಂದೇ ಆಗಿದ್ದರೆ ಅಂಥವರಿಗೆ ಬಡ್ಡಿ ದರವು 7.40 ಪರ್ಸೆಂಟ್ ಆಗಲಿದೆ. CIBIL ಸ್ಕೋರ್ ಗಮನಿಸಿ ಬಡ್ಡಿ ದರ ನಿಗದಿ ಆಗಿರುತ್ತದೆ. ತಕ್ಷಣದಿಂದಲೇ ಈ ಬಡ್ಡಿ ದರವು ಜಾರಿಗೆ ಬರಲಿದೆ.

ಎಚ್ ಡಿಎಫ್ ಸಿ ಬ್ಯಾಂಕ್ ಕೂಡ ಕೆಲ ದಿನದ ಹಿಂದೆ ಗೃಹ ಸಾಲದ ಬಡ್ಡಿ ದರವನ್ನು 15 ಬೇಸಿಸ್ ಪಾಯಿಂಟ್ ಇಳಿಕೆ ಮಾಡಿತ್ತು. ಅದಕ್ಕೂ ಮುನ್ನ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಕೂಡ ಇಂಥದ್ದೇ ಕ್ರಮ ಕೈಗೊಂಡಿತ್ತು. ಮಾರ್ಚ್ 27ನೇ ತಾರೀಕು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ 75 ಬೇಸಿಸ್ ಪಾಯಿಂಟ್ ರೆಪೋ ದರ ಹಾಗೂ 90 ಬೇಸಿಸ್ ಪಾಯಿಂಟ್ ರಿವರ್ಸ್ ರೆಪೋ ದರ ಇಳಿಕೆ ಮಾಡಿದೆ. ಈ ಕಾರಣಕ್ಕೆ ಸಾಲದ ಮೇಲಿನ ಬಡ್ಡಿ ದರದಲ್ಲೂ ಇಳಿಕೆ ಆಗಲಿದೆ.