Best Investment: ಹತ್ತು ಸಾವಿರ ಹೂಡಿಕೆ ಮಾಡಿ 7 ಲಕ್ಷ ರೂಪಾಯಿ ಪಡೆಯುವುದು ಹೇಗೆ?!

ಹಣಕಾಸು ಸಚಿವಾಲಯವು ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕಕ್ಕೆ ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿದರಗಳಲ್ಲಿ ಬದಲಾವಣೆಗಳನ್ನು ಪ್ರಕಟಿಸಿದೆ. ಈ ಬದಲಾವಣೆಯ ಅಡಿಯಲ್ಲಿ, 5 ವರ್ಷಗಳ ರೆಕ್ಯೂರಿಂಗ್ ಡೆಪಾಸಿಟ್‌ಗಳು ಈಗ ಮತ್ತಷ್ಟು ಆಕರ್ಷಕವಾಗಿದೆ. ಇದರಿಂದಾಗಿ ನೀವು ಹೂಡಿಕೆ ಮಾಡಿದ ಮೊತ್ತಕ್ಕೆ ಉತ್ತಮ ರಿಟರ್ನ್ ಅನ್ನು ಪಡೆಯಲು ಸಾಧ್ಯವಾಗುತ್ತದೆ.

ಸರ್ಕಾರವು ತನ್ನ ಬಡ್ಡಿದರವನ್ನು 30 ಬೇಸಿಸ್ ಪಾಯಿಂಟ್‌ಗಳಷ್ಟು ಹೆಚ್ಚಿಸಿದೆ. ಈಗ ಪೋಸ್ಟ್ ಆಫೀಸ್ ರೆಕ್ಯೂರಿಂಗ್ ಡೆಪಾಸಿಟ್‌ಗಳ ಮೇಲಿನ ಬಡ್ಡಿಯು ಶೇಕಡಾ 6.2 ರ ಬದಲಿಗೆ ಶೇಕಡಾ 6.5 ರಷ್ಟಿರುತ್ತದೆ. ಇದಲ್ಲದೇ, 1 ವರ್ಷ ಮತ್ತು 2 ವರ್ಷಗಳ ಟರ್ಮ್ ಡೆಪಾಸಿಟ್‌ಗಳ ಮೇಲಿನ ಬಡ್ಡಿ ದರವನ್ನು ಸಹ 10 ಬೇಸಿಸ್ ಪಾಯಿಂಟ್‌ಗಳಷ್ಟು ಹೆಚ್ಚಿಸಲಾಗಿದೆ.

ಇದು ಮಧ್ಯಮ ಅವಧಿಯ ಹೂಡಿಕೆದಾರರಿಗೆ ಇರುವ ಯೋಜನೆಯಾಗಿದೆ. 6.5 ರಷ್ಟು ಬಡ್ಡಿ ವಾರ್ಷಿಕವಾಗಿ ಲಭ್ಯವಿದೆ. ಆದರೆ ಲೆಕ್ಕಾಚಾರವನ್ನು ತ್ರೈಮಾಸಿಕ ಸಂಯೋಜನೆಯ ಆಧಾರದ ಮೇಲೆ ಮಾಡಲಾಗುತ್ತದೆ. ಇದರ ಬಗ್ಗೆ ಅಧಿಕ ಮಾಹಿತಿ ಈ ಕೆಳಗಿದೆ ಮುಂದೆ ಓದಿ...

ಕನಿಷ್ಠ ಹೂಡಿಕೆ ಎಷ್ಟು?

ಕನಿಷ್ಠ ಡೆಪಾಸಿಟ್ ಮೊತ್ತವು 100 ರೂಪಾಯಿ ಆಗಿದೆ. ನೂರು ರೂಪಾಯಿಯ ಗುಣಕಗಳಲ್ಲಿ ಯಾವುದೇ ಮೊತ್ತವನ್ನು ಠೇವಣಿ ಮಾಡಬಹುದು. ಬ್ಯಾಂಕ್‌ಗಳಿಗಿಂತ ಭಿನ್ನವಾಗಿ, ಪೋಸ್ಟ್ ಆಫೀಸ್‌ನ ರೆಕ್ಯೂರಿಂಗ್ ಡೆಪಾಸಿಟ್‌ ಅಥವಾ ಆರ್‌ಡಿಗಳು ಕೇವಲ 5 ವರ್ಷಗಳವರೆಗೆ ಮಾತ್ರ. ನಂತರ ಅದನ್ನು ಮತ್ತೆ 5 ವರ್ಷಗಳವರೆಗೆ ವಿಸ್ತರಿಸಬಹುದು. ವಿಸ್ತರಣೆಯ ಸಮಯದಲ್ಲಿ, ನೀವು ಹಳೆಯ ಬಡ್ಡಿದರಗಳ ಲಾಭವನ್ನು ಮಾತ್ರ ಪಡೆಯುತ್ತೀರಿ.

10 ಸಾವಿರ ಡೆಪಾಸಿಟ್ ಮಾಡಿದರೆ 7.10 ಲಕ್ಷ ರೂಪಾಯಿ ಲಭ್ಯ!

ಪೋಸ್ಟ್ ಆಫೀಸ್ ಆರ್‌ಡಿ ಕ್ಯಾಲ್ಕುಲೇಟರ್ ಪ್ರಕಾರ, ಹೂಡಿಕೆದಾರರು ಪ್ರತಿ ತಿಂಗಳು ಹತ್ತು ಸಾವಿರ ರೂಪಾಯಿ ಡೆಪಾಸಿಟ್ ಮಾಡಿದರೆ, ಐದು ವರ್ಷಗಳ ನಂತರ ಅವರು 7 ಲಕ್ಷ ರೂಪಾಯಿ 10 ಸಾವಿರ ಪಡೆಯುತ್ತಾರೆ. ಅವರು ಒಟ್ಟಾಗಿ ಆರು ಲಕ್ಷ ರೂಪಾಯಿ ಡೆಪಾಸಿಟ್ ಮಾಡಿದಂತೆ ಆಗುತ್ತದೆ ಮತ್ತು ಬಡ್ಡಿಯಾಗಿ 1 ಲಕ್ಷ 10 ಸಾವಿರ ರೂಪಾಯಿಯನ್ನು ಪಡೆಯುತ್ತಾರೆ.

ಯಾವ ದಿನಾಂಕದೊಳಗೆ ಕಂತನ್ನು ಠೇವಣಿ ಮಾಡುವುದು ಅವಶ್ಯಕ?

ನೀವು ಸಹ ಪೋಸ್ಟ್ ಆಫೀಸ್‌ನಲ್ಲಿ ರೆಕ್ಯೂರಿಂಗ್ ಡೆಪಾಸಿಟ್ ಖಾತೆಯನ್ನು ತೆರೆಯಲು ಬಯಸಿದರೆ, ನೀವು 1 ರಿಂದ 15 ರ ನಡುವೆ ಖಾತೆಯನ್ನು ತೆರೆಯಬೇಕಾಗುತ್ತದೆ. ಹಾಗಾಗಿ ಪ್ರತಿ ತಿಂಗಳು 15ನೇ ತಾರೀಖಿನೊಳಗೆ ಠೇವಣಿ ಮಾಡಬೇಕಾಗುತ್ತದೆ. 15ರ ನಂತರ ಯಾವುದೇ ತಿಂಗಳಲ್ಲಿ ಖಾತೆ ತೆರೆದರೆ ಪ್ರತಿ ತಿಂಗಳ ಕೊನೆಯೊಳಗೆ ಕಂತು ಕಟ್ಟಬೇಕಾಗುತ್ತದೆ.

ಒಂದು ದಿನದ ಆತುರವು ದೊಡ್ಡ ನಷ್ಟಕ್ಕೆ ಕಾರಣ!

12 ಕಂತುಗಳನ್ನು ಠೇವಣಿ ಮಾಡಿದ ನಂತರ ಸಾಲ ಸೌಲಭ್ಯವೂ ಲಭ್ಯವಿದೆ. ಬಡ್ಡಿ ದರವು ಆರ್‌ಡಿ ಖಾತೆಯ ಬಡ್ಡಿ ದರಕ್ಕಿಂತ 2 ಶೇಕಡಾ ಹೆಚ್ಚು ಇರುತ್ತದೆ. 5 ವರ್ಷ ಅವಧಿಯಲ್ಲಿ ಒಂದು ದಿನ ಮುನ್ನವಾದರೂ ಖಾತೆಯನ್ನು ಮುಚ್ಚಿದರೆ ಉಳಿತಾಯ ಖಾತೆಯ ಬಡ್ಡಿಯ ಲಾಭ ಮಾತ್ರ ಲಭ್ಯವಿರುತ್ತದೆ. ಪ್ರಸ್ತುತ ಉಳಿತಾಯ ಖಾತೆಯ ಮೇಲಿನ ಬಡ್ಡಿ ದರವು ಶೇಕಡಾ 4 ರಷ್ಟಿದೆ.