New Facility: ಡೆಬಿಟ್, ಕ್ರೆಡಿಟ್ ಕಾರ್ಡ್ ಬಳಕೆದಾರರಿಗಾಗಿ ಹೊಸ ಸೌಲಭ್ಯ, ಏನಿದು ತಿಳಿಯಿರಿ

ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್‌ಬಿಐ) ಶುಕ್ರವಾರ ಸತತ ನಾಲ್ಕನೇ ಬಾರಿಗೆ ರೆಪೋ ದರವನ್ನು ಶೇಕಡ 6.5 ರಲ್ಲಿ ಸ್ಥಿರವಾಗಿ ಉಳಿಸಿಕೊಂಡಿದೆ. ಹಣದುಬ್ಬರವು ಕೊಂಚ ಕಡಿಮೆಯಾಗುತ್ತಾ ಇರುವ ಕಾರಣ ಆರ್‌ಬಿಐ ಈ ನಿರ್ಧಾರವನ್ನು ಕೈಗೊಂಡಿದೆ. ವಿತ್ತೀಯ ನೀತಿ ಸಮಿತಿಯು (ಎಂಪಿಸಿ) ರೆಪೋ ದರದಲ್ಲಿ ಯಥಾಸ್ಥಿತಿ ಕಾಯ್ದುಕೊಳ್ಳಲು ಸರ್ವಾನುಮತದಿಂದ ನಿರ್ಧರಿಸಿದೆ ಎಂದು ಆರ್‌ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ತಿಳಿಸಿದರು.

ಗಮನಾರ್ಹವಾಗಿ, ಮೇ 2022 ರಿಂದ ಸತತ ಆರು ಬಾರಿ ಆರ್‌ಬಿಐ ದರ ಏರಿಕೆಯನ್ನು ಮಾಡಿದೆ. ಒಟ್ಟಾಗಿ 250 ಪಾಯಿಂಟ್‌ಗಳಷ್ಟು ದರ ಏರಿಕೆಯನ್ನು ಕಳೆದ ವರ್ಷದಿಂದ ಆರ್‌ಬಿಐ ಮಾಡುತ್ತಾ ಬಂದಿದೆ. ಆರ್‌ಬಿಐ ಮೇ ತಿಂಗಳಲ್ಲಿ 40 ಬೇಸಿಸ್ ಪಾಯಿಂಟ್‌ಗಳು, ಜೂನ್‌ನಲ್ಲಿ 50 ಬೇಸಿಸ್ ಪಾಯಿಂಟ್‌ಗಳು, ಆ ಬಳಿಕ ಆಗಸ್ಟ್, ಸೆಪ್ಟೆಂಬರ್, ಅಕ್ಟೋಬರ್ ಮತ್ತು ಡಿಸೆಂಬರ್ 2022ರಲ್ಲಿ 50 ಬಿಪಿಎಸ್ ಹೆಚ್ಚಿಸಿದೆ. ಇಲ್ಲಿದೆ ವಿವರ ಮುಂದೆ ಓದಿ....

ಕಾರ್ಡ್-ಆನ್-ಫೈಲ್ ಟೋಕನೈಸೇಶನ್ ವಿಸ್ತರಿಸಿದ ಆರ್‌ಬಿಐ

ಆರ್‌ಬಿಐ ಕಾರ್ಡ್-ಆನ್-ಫೈಲ್ ಟೋಕನೈಸೇಶನ್ ಅಥವಾ ಬ್ಯಾಂಕ್ ಮಟ್ಟದಲ್ಲಿ ಟೋಕನ್ ರಚನೆ ಸೌಲಭ್ಯವನ್ನು ವಿಸ್ತರಿಸಿದೆ. ಇದು ಮೊದಲು ಮೆರ್ಚೆಂಟ್ ಅಪ್ಲಿಕೇಶನ್‌ಗಳು ಅಥವಾ ವೆಬ್‌ಸೈಟ್‌ಗಳ ಮೂಲಕ ಮಾತ್ರ ಲಭ್ಯವಿತ್ತು.

ಇದರರ್ಥ ಗ್ರಾಹಕರು ಈಗ ತಮ್ಮ ಕಾರ್ಡ್‌ಗಳನ್ನು ಮೆರ್ಚೆಂಟ್‌ಗಳ ಮೂಲಕ ಟೋಕನೈಸ್ ಮಾಡುವ ಬದಲಾಗಿ ನೇರವಾಗಿ ತಮ್ಮ ಬ್ಯಾಂಕ್‌ಗಳೊಂದಿಗೆ ಟೋಕನೈಸ್ ಮಾಡಬಹುದು. ಇದು ಟೋಕನೈಸೇಶನ್ ಪ್ರಕ್ರಿಯೆಯನ್ನು ಗ್ರಾಹಕರಿಗೆ ಹೆಚ್ಚು ಅನುಕೂಲಕರ ಮತ್ತು ಸುರಕ್ಷಿತವಾಗಿಸುತ್ತದೆ.

"ಈಗ ನೇರವಾಗಿ ಬ್ಯಾಂಕ್ ಮಟ್ಟದಲ್ಲಿ ಕಾರ್ಡ್-ಆನ್-ಫೈಲ್ ಟೋಕನ್ ರಚನೆ ಸೌಲಭ್ಯಗಳನ್ನು ಪರಿಚಯಿಸಲು ಪ್ರಸ್ತಾಪಿಸಲಾಗಿದೆ. ಈ ಕ್ರಮವು ಕಾರ್ಡ್‌ದಾರರಿಗೆ ವಿವಿಧ ಇ-ಕಾಮರ್ಸ್ ಅಪ್ಲಿಕೇಶನ್‌ಗಳೊಂದಿಗೆ ಟೋಕನ್‌ಗಳನ್ನು ರಚಿಸಲು ಮತ್ತು ಅವರ ಅಸ್ತಿತ್ವದಲ್ಲಿರುವ ಖಾತೆಗಳಿಗೆ ಲಿಂಕ್ ಮಾಡಲು ಅನುಕೂಲವನ್ನು ಹೆಚ್ಚಿಸುತ್ತದೆ. ಈ ನಿಟ್ಟಿನಲ್ಲಿ ಪ್ರತ್ಯೇಕವಾಗಿ ಸೂಚನೆಗಳನ್ನು ನೀಡಲಾಗುವುದು," ಎಂದು ಆರ್‌ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ತಿಳಿಸಿದರು.

ಏನಿದು ಟೋಕನೈಸೇಶನ್, ಹೇಗೆ ಕಾರ್ಯನಿರ್ವಹಣೆ?

ಟೋಕನೈಸೇಶನ್ ಎನ್ನುವುದು ಕಾರ್ಡ್‌ನ 16-ಅಂಕಿಯ ಸಂಖ್ಯೆಯನ್ನು ಯುನಿಕ್ ಕಾರ್ಡ್ ಸಂಖ್ಯೆ ಅಥವಾ 'ಟೋಕನ್' ನೊಂದಿಗೆ ಬದಲಾಯಿಸುವ ಪ್ರಕ್ರಿಯೆಯಾಗಿದೆ. ನಿಜವಾದ ಕಾರ್ಡ್ ಸಂಖ್ಯೆಯನ್ನು ಬಹಿರಂಗಪಡಿಸದೆಯೇ ಪಾವತಿಗಳನ್ನು ಮಾಡಲು ಈ ಟೋಕನ್ ಅನ್ನು ಬಳಸಬಹುದು. ಇದು ಆನ್‌ಲೈನ್ ಪಾವತಿಗಳನ್ನು ಮಾಡಲು ಟೋಕನೈಸೇಶನ್ ಅನ್ನು ಹೆಚ್ಚು ಸುರಕ್ಷಿತ ಮಾರ್ಗವನ್ನಾಗಿ ಮಾಡುತ್ತದೆ.

ಕಾರ್ಡ್-ಆನ್-ಫೈಲ್ ಟೋಕನೈಸೇಶನ್ ಪ್ರಯೋಜನಗಳು

ಕಾರ್ಡ್-ಆನ್-ಫೈಲ್ ಟೋಕನೈಸೇಶನ್ ಗ್ರಾಹಕರು ಮತ್ತು ವ್ಯಾಪಾರಿಗಳಿಗೆ ಹಲವಾರು ಪ್ರಯೋಜನಗಳನ್ನು ನೀಡುತ್ತದೆ. ಗ್ರಾಹಕರಿಗೆ, ಟೋಕನೈಸೇಶನ್ ಆನ್‌ಲೈನ್ ಪಾವತಿಗಳನ್ನು ಹೆಚ್ಚು ಸುರಕ್ಷಿತ ಮತ್ತು ಅನುಕೂಲಕರವಾಗಿಸುತ್ತದೆ. ವ್ಯಾಪಾರಿಗಳಿಗೆ, ಟೋಕನೈಸೇಶನ್ ವಂಚನೆ ಮತ್ತು ಚಾರ್ಜ್‌ಬ್ಯಾಕ್‌ಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ಆರ್‌ಬಿಐ ಅಕ್ಟೋಬರ್ 1, 2022 ರಂದು ಟೋಕನೈಸೇಶನ್ ಸೌಲಭ್ಯವನ್ನು ಪ್ರಾರಂಭಿಸಿದ್ದು, ಇದು ಆನ್‌ಲೈನ್ ಪಾವತಿಗಳನ್ನು ಹೆಚ್ಚು ಸುರಕ್ಷಿತಗೊಳಿಸುವಲ್ಲಿ ಯಶಸ್ವಿಯಾಗಿದೆ. 56 ಕೋಟಿಗೂ ಹೆಚ್ಚು ಟೋಕನ್‌ಗಳನ್ನು ರಚಿಸಲಾಗಿದೆ ಮತ್ತು ಈ ಟೋಕನ್‌ಗಳನ್ನು ಬಳಸಿಕೊಂಡು 5 ಲಕ್ಷಕ್ಕೂ ಹೆಚ್ಚು ವ್ಯವಹಾರಗಳನ್ನು ಮಾಡಲಾಗಿದೆ.

ಟೋಕನೈಸೇಶನ್ ಸೌಲಭ್ಯಕ್ಕಾಗಿ ಬ್ಯಾಂಕ್‌ಗಳಿಗೆ ಇನ್ನೂ ಆರ್‌ಬಿಐ ಮಾರ್ಗಸೂಚಿಗಳ ಅಗತ್ಯವಿದೆ. ಅದನ್ನು ಶೀಘ್ರದಲ್ಲೇ ನೀಡಲಾಗುವುದು. ಇದು ಕಾರ್ಡ್‌ದಾರರಿಗೆ ಸುಲಭವಾಗಿಸುತ್ತದೆ. ಪ್ರಸ್ತುತ ತಮ್ಮ ಕಾರ್ಡ್‌ಗಳನ್ನು ಪ್ರತಿ ವ್ಯಾಪಾರಿಯೊಂದಿಗೆ ಪ್ರತ್ಯೇಕವಾಗಿ ಟೋಕನೈಸ್ ಮಾಡಬೇಕಾಗುತ್ತದೆ.