ಸೆಪ್ಟೆಂಬರ್ ರಿಟೇಲ್ ಹಣದುಬ್ಬರ ಶೇ.7.41ಕ್ಕೆ ಏರಿಕೆ, ಏಪ್ರಿಲ್ ಬಳಿಕ ಭಾರಿ ಅಧಿಕ!

ಭಾರತದ ಚಿಲ್ಲರೆ ಹಣದುಬ್ಬರವು ಸೆಪ್ಟೆಂಬರ್‌ನಲ್ಲಿ 7.41 ಶೇಕಡಾಕ್ಕೆ ಏರಿಕೆಯಾಗಿದೆ. ಏಪ್ರಿಲ್‌ನ ಬಳಿಕ ಹಣದುಬ್ಬರವು ಮೊದಲ ಬಾರಿಗೆ ಭಾರಿ ಹೆಚ್ಚಳವಾಗಿದೆ. ಈ ವರ್ಷ ಪ್ರತಿ ತಿಂಗಳು ರಿಟೇಲ್ ಹಣದುಬ್ಬರವು ಆರ್‌ಬಿಐನ ಶೇಕಡ 2-6 ಮಿತಿಗಿಂತ ಅಧಿಕವಾಗಿದೆ.

ರಾಷ್ಟ್ರೀಯ ಅಂಕಿಅಂಶಗಳ ಕಚೇರಿ ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ ಸೆಪ್ಟೆಂಬರ್‌ನಲ್ಲಿ ಗ್ರಾಹಕ ಬೆಲೆ ಸೂಚ್ಯಂಕ ಆಧಾರಿತ ಹಣದುಬ್ಬರ (ಸಿಪಿಐ) ಆಗಸ್ಟ್‌ನ ಶೇಕಡ 7ಕ್ಕಿಂತ ಹೆಚ್ಚಳವಾಗಿದೆ. ಸೆಪ್ಟೆಂಬರ್‌ನಲ್ಲಿ ಶೇಕಡ 7.41ಕ್ಕೆ ಏರಿಕೆಯಾಗಿದ್ದು ಇದು ಒಂದು ವರ್ಷದ ಬಳಿಕ ಭಾರಿ ಹೆಚ್ಚಳವಾಗಿದೆ.

ಈ ವರ್ಷದಲ್ಲಿ ಹಣದುಬ್ಬರವು ಏರಿಕೆಯಾಗುತ್ತಿದೆ. ಎಲ್ಲ ಅಗತ್ಯ ವಸ್ತುಗಳ ಬೆಲೆಯು ಗಗನಕ್ಕೆ ಏರಿದೆ. ಈ ನಡುವೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್‌ಬಿಐ) ರೆಪೋ ದರವನ್ನು ನಾಲ್ಕು ಬಾರಿ ಹೆಚ್ಚಳ ಮಾಡಿದೆ. ಪ್ರಸ್ತುತ ರೆಪೋ ದರ ಶೇಕಡ 5.9ಕ್ಕೆ ಏರಿದೆ. ಈಗ ಮತ್ತೆ ರಿಟೇಲ್ ದರ ಭಾರೀ ಹೆಚ್ಚಿದ್ದು ಆರ್‌ಬಿಐ ಮೇಲೆ ಮತ್ತಷ್ಟು ಒತ್ತಡ ಸೃಷ್ಟಿಸಿದೆ.

ಆಹಾರ ಹಣದುಬ್ಬರ ಭಾರೀ ಏರಿಕೆ

ಇನ್ನು ಕಳೆದ ತಿಂಗಳು ಮಾತನಾಡಿದ್ದ ಆರ್‌ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಯಾವುದೇ ಸಂದರ್ಭದಲ್ಲಿ ಹಣದುಬ್ಬರದ ವಿರುದ್ಧ ಹೋರಾಡಲು ಕೇಂದ್ರ ಬ್ಯಾಂಕ್ ಸಿದ್ಧವಾಗಿದೆ. ಆಹಾರ ಹಣದುಬ್ಬರವು ಗ್ರಾಹಕರ ಬೆಲೆ ಸೂಚ್ಯಂಕದ (ಸಿಪಿಐ) ಅರ್ಧದಷ್ಟಿದೆ. ಗೋಧಿ, ಅಕ್ಕಿ ಮತ್ತು ಬೇಳೆಕಾಳುಗಳಂತಹ ಅಗತ್ಯ ಬೆಳೆಗಳ ದರವು ಗಗನಕ್ಕೆ ಏರಿದೆ. ಜನರ ಮಾಸಿಕ ಬಜೆಟ್ ಏರುಪೇರಾಗಿದೆ.

ಭಾರತದ ಬಡ ಮತ್ತು ಮಧ್ಯಮ ವರ್ಗಗಳು, ಈಗಾಗಲೇ ಕೊರೊನಾ ಸಾಂಕ್ರಾಮಿಕದಿಂದಾಗಿ ಆರ್ಥಿಕ ಆಘಾತಕ್ಕೆ ಒಳಗಾಗಿದ್ದಾರೆ, ಈ ನಡುವೆ ಈಗ ಹಣದುಬ್ಬರವು ಜನರ ಜೇಬಿಗೆ ಕತ್ತರಿ ಹಾಕಿದೆ. ಆಹಾರ ಮತ್ತು ಇಂಧನ ಬೆಲೆಗಳ ಹೆಚ್ಚಳದಿಂದ ಹಲವಾರು ಕುಟುಂಬಗಳು ಆರ್ಥಿಕ ಸಂಕಷ್ಟಕ್ಕೆ ಒಳಗಾಗಿದೆ. ಇನ್ನು ಗ್ರಾಮೀಣ ಹಣದುಬ್ಬರವು ಪ್ರಸ್ತುತ ಅಧಿಕವಾಗಿದೆ.

ಇನ್ನು ಹಣದುಬ್ಬರವನ್ನು ನಿಯಂತ್ರಣಕ್ಕೆ ತರುವ ನಿಟ್ಟಿನಲ್ಲಿ ಈಗಾಗಲೇ ಭಾರತ ಸರ್ಕಾರವು ಹಲವಾರು ವಸ್ತುಗಳ ರಫ್ತಿನ ಮೇಲೆ ಮಿತಿಯನ್ನು ಅಥವಾ ನಿಷೇದವನ್ನು ಹೇರಿದೆ. ಸಕ್ಕರೆ, ಗೋಧಿ ಮೊದಲಾದ ವಸ್ತುಗಳ ಬೆಲೆಯು ಏರಿಕೆಯಾಗಿದೆ.