Personal Finance: ಅಕ್ಟೋಬರ್‌ನಲ್ಲಿ ಈ ಹಣಕಾಸು ಬದಲಾವಣೆ, ಈಗಲೇ ಓದಿ

ಸೆಪ್ಟೆಂಬರ್ ತಿಂಗಳು ಕೊನೆಯಾಗುತ್ತಿದೆ, ಅಕ್ಟೋಬರ್ ತಿಂಗಳು ಆರಂಭವಾಗಲು ಇನ್ನು ಕೆಲವೇ ದಿನಗಳು ಮಾತ್ರ ಬಾಕಿ ಉಳಿದಿದೆ. ಅಕ್ಟೋಬರ್ ಎಂದರೆ ಹಬ್ಬದ ಸೀಸನ್ ಆಗಿದೆ. ಸೆಪ್ಟೆಂಬರ್‌ನಿಂದಲೇ ಹಬ್ಬಗಳು ಆರಂಭವಾಗಿದ್ದು, ಅಕ್ಟೋಬರ್‌ನಲ್ಲಿಯೂ ಹಲವಾರು ಹಬ್ಬಗಳು ಇದೆ. ಹಾಗೆಯೇ ಪ್ರತಿ ತಿಂಗಳಲ್ಲಿ ಆಗುವ ಹಣಕಾಸು ಬದಲಾವಣೆಗಳು ಈ ತಿಂಗಳಿನಲ್ಲಿಯೂ ಆಗಲಿದೆ.

ಸೆಪ್ಟೆಂಬರ್‌ಗೂ ಮುನ್ನ ಹಲವಾರು ಮಹತ್ವದ ಹಣಕಾಸಿನ ಕಾರ್ಯದ ಗಡುವುಗಳು ಬರಲಿವೆ. ಹೊಸ ನಿಯಮ ಅಕ್ಟೋಬರ್‌ನಲ್ಲಿ ಅನ್ವಯವಾಗಲಿದೆ. ಹೊಸ ಟಿಸಿಎಸ್ ನಿಯಮಗಳು, ಮ್ಯೂಚುವಲ್ ಫಂಡ್, ಡಿಮ್ಯಾಟ್ ಖಾತೆ ಸಂಬಂಧಿಸಿದ ಮಹತ್ವದ ಬದಲಾವಣೆಗಳು ಅಕ್ಟೋಬರ್‌ನಿಂದ ಜಾರಿಗೆ ಬರಲಿವೆ. ಹಾಗೆಯೇ 2000 ರೂಪಾಯಿ ನೋಟು ಬದಲಾವಣೆಗೆ ಸೆಪ್ಟೆಂಬರ್ 30 ಕೊನೆಯ ದಿನಾಂಕವಾಗಿದೆ.

ಟಿಸಿಎಸ್ ನಿಯಮ ಬದಲಾವಣೆ

ಮೂಲ ನಿಯಮಗಳು ಅಥವಾ ಟಿಸಿಎಸ್ ನಿಯಮಗಳ ಹೊಸ ತೆರಿಗೆ ಸಂಗ್ರಹವು ಅಕ್ಟೋಬರ್ 1 ರಿಂದ ಜಾರಿಗೆ ಬರುತ್ತದೆ. ವ್ಯಾಪಾರ, ಅಧ್ಯಯನ ಅಥವಾ ರಜೆಗಾಗಿ ವಿದೇಶಕ್ಕೆ ಪ್ರಯಾಣಿಸಲು ಬಯಸುವವರಿಗೆ ಇದು ಪ್ರಭಾವ ಬೀರಲಿದೆ. ಹೆಚ್ಚುವರಿಯಾಗಿ, ವೈದ್ಯಕೀಯ ಅಥವಾ ಶೈಕ್ಷಣಿಕ ವೆಚ್ಚಗಳ ಮೇಲೆ ಶೇಕಡ 5 ರಷ್ಟು ಟಿಸಿಎಸ್ ವಿಧಿಸಲಾಗುತ್ತದೆ. ವಾರ್ಷಿಕವಾಗಿ ವಿದೇಶಗಳಲ್ಲಿ 7 ಲಕ್ಷ ರೂಪಾಯಿಗಿಂತ ಹೆಚ್ಚಿನ ಕ್ರೆಡಿಟ್ ಕಾರ್ಡ್ ವೆಚ್ಚಗಳಿಗೆ ಶೇಕಡ 20 ರಷ್ಟು ಟಿಸಿಎಸ್ ಇರುತ್ತದೆ.

2000 ರೂಪಾಯಿ ನೋಟುಗಳ ಬದಲಾವಣೆ, ಡೆಪಾಸಿಟ್

ಸೆಪ್ಟೆಂಬರ್ 30, 2023ರ ಒಳಗಾಗಿ 2,000 ರೂಪಾಯಿ ನೋಟುಗಳನ್ನು ಡೆಪಾಸಿಟ್ ಮಾಡಲು ಅಥವಾ ಬದಲಾವಣೆ ಮಾಡಬೇಕಾಗುತ್ತದೆ. ಆರ್‌ಬಿಐ ನಿಗದಿಪಡಿಸಿದ ಗಡುವಿನವರೆಗೆ ನೋಟುಗಳನ್ನು ಬ್ಯಾಂಕ್‌ಗಳಲ್ಲಿ ಸ್ವೀಕರಿಸಲಾಗುತ್ತದೆ. ಅದರ ಬಳಿಕ ಬ್ಯಾಂಕ್‌ಗಳು ನೋಟುಗಳನ್ನು ಸ್ವೀಕರಿಸದಿರಬಹುದು.

ಉಳಿತಾಯ ಖಾತೆಗೆ ಆಧಾರ್ ಲಿಂಕ್

ಈ ತಿಂಗಳ ಅಂತ್ಯದ ವೇಳೆಗೆ, ಸಾರ್ವಜನಿಕ ಭವಿಷ್ಯ ನಿಧಿ (ಪಿಪಿಎಫ್), ಸುಕನ್ಯಾ ಸಮೃದ್ಧಿ ಯೋಜನೆ (ಎಸ್‌ಎಸ್‌ವೈ), ಅಂಚೆ ಕಚೇರಿ ಡೆಪಾಸಿಟ್‌ಗಳು ಮತ್ತು ಇತರ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆದಾರರು ತಮ್ಮ ಆಧಾರ್ ಸಂಖ್ಯೆಯನ್ನು ಲಿಂಕ್ ಮಾಡಬೇಕಾಗುತ್ತದೆ. ಅದಕ್ಕಾಗಿ ಅಂಚೆ ಕಚೇರಿ ಅಥವಾ ಬ್ಯಾಂಕ್‌ ಶಾಖೆಗೆ ಭೇಟಿ ನೀಡಬೇಕಾಗುತ್ತದೆ. ಸಮಯಕ್ಕೆ ಸರಿಯಾಗಿ ಲಿಂಕ್ ಮಾಡದಿದ್ದರೆ, ಖಾತೆ ಫ್ರೀಜ್ ಮಾಡಲಾಗುತ್ತದೆ.

ಸೆಬಿ ನಾಮಿನೇಷನ್ ಅಂತಿಮ ದಿನಾಂಕ

ಅರ್ಹ ಟ್ರೇಡಿಂಗ್ ಮತ್ತು ಡಿಮ್ಯಾಟ್ ಖಾತೆಗಳನ್ನು ಪ್ರಸ್ತುತ ಹೊಂದಿರುವವರು ತಮ್ಮ ಖಾತೆಗಳಿಗೆ ಫಲಾನುಭವಿಯನ್ನು ಅಥವಾ ನಾಮಿನಿದಾರರನ್ನು ನಮೂದಿಸಲು ಸೆಪ್ಟೆಂಬರ್ 30 ರವರೆಗೆ ಕಾಲಾವಕಾಶವಿದೆ.

ಮ್ಯೂಚುವಲ್ ಫಂಡ್‌ಗೆ ನಾಮಿನೇಷನ್

ಹೂಡಿಕೆದಾರರು ತಮ್ಮ ಪ್ರಸ್ತುತ ಮ್ಯೂಚುಯಲ್ ಫಂಡ್ ಫೋಲಿಯೊಗಳಿಗೆ ನಾಮಿನೇಷನ್ ಮಾಡಲು ಸೆಪ್ಟೆಂಬರ್ 30 ರವರೆಗೆ ಕಾಲಾವಕಾಶವಿದೆ. ನೀವು ಮಾಡದಿದ್ದರೆ, ಅಕ್ಟೋಬರ್ 1 ರಿಂದ ಪ್ರಾರಂಭವಾಗುವ ಡೆಬಿಟ್ ವಹಿವಾಟುಗಳಿಗಾಗಿ ಖಾತೆಯನ್ನು ನಿರ್ಬಂಧಿಸಲಾಗುತ್ತದೆ.

ಸರ್ಕಾರಿ ಉದ್ಯೋಗಗಳಿಗೆ ಜನನ ಪ್ರಮಾಣ ಪತ್ರ ಕಡ್ಡಾಯ

ಆರ್ಥಿಕ ಸಮಸ್ಯೆಗಳ ಹೊರತಾಗಿ, ಮುಂದಿನ ತಿಂಗಳಿನಿಂದ ಆಧಾರ್ ಮತ್ತು ಸರ್ಕಾರಿ ಉದ್ಯೋಗಗಳಿಗೆ ಜನನ ಪ್ರಮಾಣಪತ್ರದ ಅಗತ್ಯವಿದೆ. ಅಕ್ಟೋಬರ್ 1, 2023 ರಿಂದ 2023 ರ ಜನನ ಮತ್ತು ಮರಣಗಳ ನೋಂದಣಿ (ತಿದ್ದುಪಡಿ) ಕಾಯ್ದೆಯು ರಾಷ್ಟ್ರದಾದ್ಯಂತ ಜಾರಿಯಲ್ಲಿರುತ್ತದೆ.

ಎಲ್‌ಪಿಜಿ ದರ ಬದಲಾವಣೆ ಸಾಧ್ಯತೆ

ಎಲ್‌ಪಿಜಿ ದರವನ್ನು ಪ್ರತಿ ತಿಂಗಳು ಕೂಡಾ ಪರಿಷ್ಕರಣೆ ಮಾಡಲಾಗುತ್ತದೆ. ಪ್ರತಿ ತಿಂಗಳ ಮೊದಲ ದಿನ ಸರ್ಕಾರಿ ತೈಲ ಕಂಪನಿಗಳು ಎಲ್‌ಪಿಜಿ ದರವನ್ನು ಪರಿಷ್ಕರಣೆ ಮಾಡುತ್ತದೆ. ಈ ಬಾರಿ ಅಕ್ಟೋಬರ್ 1 ರಂದು ಎಲ್‌ಪಿಜಿ ಗ್ಯಾಸ್ ಬೆಲೆಯಲ್ಲಿ ಬದಲಾವಣೆ ಮಾಡುವ ನಿರೀಕ್ಷೆಯಿದೆ.