ಈ ಎರಡು ಬ್ಯಾಂಕ್ ನಲ್ಲಿ ಫಿಕ್ಸೆಡ್ ಡೆಪಾಸಿಟ್ ಬಡ್ಡಿ ದರ ಈಗಲೂ 7%

ಬ್ಯಾಂಕ್ ಫಿಕ್ಸೆಡ್ ಡೆಪಾಸಿಟ್ ಗಳ ಮೇಲೆ ಬರುತ್ತಿದ್ದ ಬಡ್ಡಿಯಲ್ಲೇ ಜೀವನ ನಡೆಸುತ್ತಿದ್ದ ಕಾಲವೊಂದಿತ್ತು. ಈಗ ಅದೆಲ್ಲ ನೆನಪಷ್ಟೇ ಎನ್ನುವ ಹಾಗೆ ಆಗಿದೆ. ಈ ದೇಶದ ಅತಿ ದೊಡ್ಡ ಬ್ಯಾಂಕ್ ಆದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದಿಂದ ಸಿಗುವ ಗರಿಷ್ಠ ಬಡ್ಡಿ ದರ ಅಂದರೆ ಅದು 5.4%. ಅದು ಕೂಡ ಮಾಮೂಲಿ ಠೇವಣಿಗಳಿಗೆ.

ಇನ್ನು ಇಂಥದ್ದೇ ಮಾಮೂಲಿ ಡೆಪಾಸಿಟ್ ಗೆ ಎಚ್ ಡಿಎಫ್ ಸಿ ಬ್ಯಾಂಕ್ ನಿಂದ ಗರಿಷ್ಠ ದರ 5.5% ಇದೆ. ಐಸಿಐಸಿಐ ಬ್ಯಾಂಕ್ ನಲ್ಲೂ ಗರಿಷ್ಠ ಪ್ರಮಾಣದ ದರ ಇಷ್ಟೇ ಇದೆ. ಹಾಗಿದ್ದರೆ ಯಾವ ಬ್ಯಾಂಕ್ ನಲ್ಲಿ ಗರಿಷ್ಠ ಬಡ್ಡಿ ದರ ಎಷ್ಟಿದೆ ಎಂಬ ಮಾಹಿತಿ ಹೀಗಿದೆ: ಐಸಿಐಸಿಐ ಬ್ಯಾಂಕ್- ಗರಿಷ್ಠ 5.5%, ಎಸ್ ಬಿಐ- ಗರಿಷ್ಠ 5.4%, ಎಚ್ ಡಿಎಫ್ ಸಿ ಬ್ಯಾಂಕ್- ಗರಿಷ್ಠ 5.5%, ಇಂಡಸ್ ಇಂಡ್ ಬ್ಯಾಂಕ್- 7%, ಯೆಸ್ ಬ್ಯಾಂಕ್- 7%.

ಇವು ಪ್ರಮುಖ ವಾಣಿಜ್ಯ ಬ್ಯಾಂಕ್ ಗಳು

ಇಲ್ಲಿ ಸಣ್ಣ ಹಣಕಾಸು ಬ್ಯಾಂಕ್ ಗಳ ಬಡ್ಡಿ ದರವನ್ನು ಹೋಲಿಸಿಲ್ಲ. ದೇಶದಲ್ಲಿನ ಪೂರ್ಣ ಪ್ರಮಾಣದ ವಾಣಿಜ್ಯ ಬ್ಯಾಂಕ್ ಗಳನ್ನು ಮಾತ್ರ ಗಣನೆಗೆ ತೆಗೆದುಕೊಳ್ಳಲಾಗಿದೆ. ಈ ಪಟ್ಟಿಯಲ್ಲಿ ನೋಡಿದರೆ ಸ್ಪಷ್ಟವಾಗುತ್ತದೆ; ಅತಿ ಹೆಚ್ಚು ಬಡ್ಡಿ ನೀಡುತ್ತಿರುವ ಆ ಎರಡು ಬ್ಯಾಂಕ್ ಗಳೆಂದರೆ, ಇಂಡಸ್ ಇಂಡ್ ಬ್ಯಾಂಕ್ ಹಾಗೂ ಯೆಸ್ ಬ್ಯಾಂಕ್. ಇನ್ನು ಹಿರಿಯ ನಾಗರಿಕ ಹೆಸರಿನಲ್ಲಿ ಠೇವಣಿ ಮಾಡಿದರೆ ವಾರ್ಷಿಕವಾಗಿ 7.5% ಬಡ್ಡಿ ದೊರೆಯುತ್ತದೆ.

1ರಿಂದ 3 ವರ್ಷದ ಅವಧಿಗೆ 7% ಬಡ್ಡಿ

ಇಂಡಸ್ ಇಂಡ್ ಬ್ಯಾಂಕ್ ನಲ್ಲಿ ವಿವಿಧ ಅವಧಿಗೆ ಠೇವಣಿ ಮಾಡಬಹುದು. 1ರಿಂದ 3 ವರ್ಷದ ಅವಧಿಗೆ ಮಾಮೂಲಿ ಠೇವಣಿಗೆ ವಾರ್ಷಿಕ 7 ಪರ್ಸೆಂಟ್ ಬಡ್ಡಿ ದರ ದೊರೆಯುತ್ತದೆ. ಅದೇ ರೀತಿ ಯೆಸ್ ಬ್ಯಾಂಕ್ ನಲ್ಲೂ 1ರಿಂದ 3 ವರ್ಷಗಳ ಅವಧಿಗೆ ವಾರ್ಷಿಕವಾಗಿ 7% ಬಡ್ಡಿ ದರ ದೊರೆಯುತ್ತದೆ.

5 ಲಕ್ಷ ರುಪಾಯಿಯೊಳಗಿನ ಬ್ಯಾಂಕ್ ಡೆಪಾಸಿಟ್ ಗೆ ಇನ್ಷೂರೆನ್ಸ್

ಅಂದ ಹಾಗೆ 5 ಲಕ್ಷ ರುಪಾಯಿಯೊಳಗಿನ ಬ್ಯಾಂಕ್ ಡೆಪಾಸಿಟ್ ಗೆ ಇನ್ಷೂರೆನ್ಸ್ ಇದೆ. ಡೆಪಾಸಿಟ್ ಇನ್ಷೂರೆನ್ಸ್ ಅಂಡ್ ಕ್ರೆಡಿಟ್ ಗ್ಯಾರಂಟಿ ಕಾರ್ಪೊರೇಷನ್ ಆಫ್ ಇಂಡಿಯಾದಿಂದ ಈ ಇನ್ಷೂರೆನ್ಸ್ ದೊರೆಯಲಿದ್ದು, ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾಗೆ ಸೇರಿದ ಸಂಸ್ಥೆ ಇದು. ನೀವು ಐದು ಲಕ್ಷ ರುಪಾಯಿಯೊಳಗೆ ಮಾಡಿರುವ ಡೆಪಾಸಿಟ್ ಸುರಕ್ಷಿತ. ಇನ್ಷೂರೆನ್ಸ್ ಕ್ಲೇಮ್ ಗಳಿಗೆ ಸಂಬಂಧಿಸಿದಂತೆ ಯಾವ್ಯಾವ ವಿಚಾರಗಳು ಒಳಗೊಂಡಿರುತ್ತವೆ ಎಂಬುದು ನಮಗೆ ಗೊತ್ತಿರುತ್ತದೆ.