Shaila Merchant: ಅನಂತ್ ಅಂಬಾನಿಯ ಅತ್ತೆಯಾಗಲಿರುವ ಶೈಲಾ ಮರ್ಚೆಂಟ್ ಯಾರು ಗೊತ್ತೇ?

ಮುಕೇಶ್‌ ಅಂಬಾನಿ ಅವರ ಕಿರಿಯ ಮಗ ಅನಂತ್‌ ಅಂಬಾನಿ ಹಾಗೂ ರಾಧಿಕಾ ಮರ್ಚೆಂಟ್‌ ಅವರ ಪ್ರೀ-ವೆಡ್ಡಿಂಗ್‌ ಸಂಭ್ರಮಾಚರಣೆ ಆಮಂತ್ರಣ ಪತ್ರಿಕೆಯು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಭಾರತದ ಶ್ರೀಮಂತ ವ್ಯಕ್ತಿ ಮುಕೇಶ್‌ ಅಂಬಾನಿ ಹಾಗೂ ನೀತಿ ಅಂಬಾನಿ ಅವರ ಮೂವರು ಮಕ್ಕಳಲ್ಲಿ ಅನಂತ್‌ ಅಂಬಾನಿ ಕಿರಿಯ ಮಗನಾಗಿದ್ದಾರೆ.

ಹಾಗೆಯೇ, ರಾಧಿಕಾ ಮರ್ಚೆಂಟ್‌ ಅವರು ಬಿಲಿಯನೇರ್‌ ವೀರೇನ್‌ ಮರ್ಚೆಂಟ್‌ ಹಾಗೂ ಶೈಲಾ ಮರ್ಚೆಂಟ್‌ ಅವರ ಹಿರಿಯ ಪುತ್ರಿಯಾಗಿದ್ದಾರೆ. ವೀರೇನ್‌ ಮತ್ತು ಶೈಲಾ ಮರ್ಚೆಂಟ್‌ ಅವರು ಎನ್ಕೋರ್ ಹೆಲ್ತ್‌ಕೇರ್‌ ಲಿಮಿಟೆಡ್‌ನ ಮುಖ್ಯಸ್ಥರಾಗಿದ್ದಾರೆ. ಅನಂತ್‌ ಅಂಬಾನಿ ಅವರ ಅತ್ತೆ ಯಶಸ್ವಿ ಔಷಧೀಯ ಕಂಪನಿಯಾದ ಎನ್‌ಕೋರ್‌ ಹೆಲ್ತ್‌ಕೇರ್‌ನ ವ್ಯವಸ್ಥಾಪಕ ನಿರ್ದೇಶಕರಲ್ಲಿ ಒಬ್ಬರಾಗಿದ್ದಾರೆ.

ಶೈಲಾ ಅವರು 90ರ ದಶಕದಲ್ಲಿ ಬಹು-ಮಿಲಿಯನೇರ್‌ ವಿರೇನ್‌ ಮರ್ಚೆಂಟ್‌ ಅವರೊಂದಿಗೆ ವಿವಾಹವಾಗಿದ್ದರು. ಅವರ ಮದುವೆಯ ಬಳಿಕ ಶೈಲಾ ಅವರು ಎನ್‌ಕೋರ್‌ ಹೆಲ್ತ್‌ಕೇರ್‌ನ ವ್ಯವಸ್ಥಾಪಕ ನಿರ್ದೇಶಕರಾದರು. ಈಗ ಕಂಪನಿಯ ಒಟ್ಟಾರೆ ಮೌಲ್ಯ ಸುಮಾರು 2000 ಕೋಟಿ ರೂಪಾಯಿ ಆಗಿದೆ.

ವೀರೇನ್‌ ಮರ್ಚೆಂಟ್‌ ಅವರು ಈ ಔಷಧ ಕಂಪನಿಯ ಸಂಸ್ಥಾಪಕ ಹಾಗೂ ಸಿಇಒ ಆಗಿದ್ದು, ಎನ್‌ಕೋರ್‌ನ ಒಟ್ಟಾರೆ ಮೌಲ್ಯ 2000 ಕೋಟಿ ರೂಪಾಯಿ ಆಗಿದೆ. ಪತ್ನಿ ಶೈಲಜಾ ಜತೆಗೆ ರಾಧಿಕಾ ಹಾಗೂ ಅವರ ಸಹೋದರಿ ಅಂಜಲಿ ಕೂಡ ಕಂಪನಿಯ ನಿರ್ದೇಶಕ ಮಂಡಳಿಯಲ್ಲಿದ್ದಾರೆ.

ಶೈಲಾ ಮರ್ಚೆಂಟ್‌ ಅವರು ಉನ್ನತ ಉದ್ಯಮಿಯಾಗಿರುವ ಜತೆಗೆ ಫ್ಯಾಷನ್‌ ಸ್ಟೈಲ್‌ ಹಾಗೂ ಸೌಂದರ್ಯದಿಂದ ಗಮನ ಸೆಳೆದಿದ್ದಾರೆ. ಶೈಲಾ ಹಾಗೂ ರಾಧಿಕಾ ಮರ್ಚೆಂಟ್‌ ಅವರು 10 ಕೋಟಿ ರೂಪಾಯಿ ನಿವ್ವಳ ಆಸ್ತಿ ಹೊಂದಿದ್ದಾರೆ. ಇನ್ನು ರಾಧಿಕಾ ಅವರ ತಂದೆ ವೀರೇನ್‌ ಮರ್ಚೆಂಟ್‌ ಅವರು ಕೂಡ 755 ಕೋಟಿ ರೂಪಾಯಿ ನಿವ್ವಳ ಆಸ್ತಿ ಹೊಂದಿದ್ದಾರೆ.