ರೈತರಿಂದ ನೇರವಾಗಿ ತಾಜಾ ತರಕಾರಿ, ಹಣ್ಣು ಖರೀದಿಗೆ ಮುಂದಾದ ಅಮೆಜಾನ್

ಅಮೆರಿಕ ಮೂಲದ ಇ ಕಾಮರ್ಸ್ ಕಂಪೆನಿಯಿಂದ ಪುಣೆಯಲ್ಲಿ ಪ್ರಾಯೋಗಿಕ ಯೋಜನೆಯೊಂದನ್ನು ನಡೆಸುತ್ತಿದ್ದು, ಇದೇ ಮೊದಲ ಬಾರಿಗೆ ರೈತರಿಂದ ತಾಜಾ ಉತ್ಪನ್ನಗಳ ಖರೀದಿಗೆ ಮುಂದಾಗಿದೆ. 'ಫಾರ್ಮ್ ಟು ಫೋರ್ಕ್' ಅಭಿಯಾನದ ಅಡಿಯಲ್ಲಿ ಈ ಮಾರಾಟಕ್ಕೆ ಮುಂದಾಗಿದೆ ಅಮೆಜಾನ್.

ಅಮೆಜಾನ್ ರೀಟೇಲ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಸಂಪೂರ್ಣವಾಗಿ ಅಮೆರಿಕದ ದೈತ್ಯ ಇ ಕಾಮರ್ಸ್ ಕಂಪೆನಿ ಅಮೆಜಾನ್ ನಿಂದ ನಡೆಯುತ್ತದೆ. ಈಗಾಗಲೇ ಪುಣೆ ಭಾಗದ ಹಲವು ರೈತರ ಜತೆಗೆ ಮಾತುಕತೆ ನಡೆಸಲಾಗಿದೆ. ಅಮೆಜಾನ್ ಫ್ರೆಷ್ ಮತ್ತು ಅಮೆಜಾನ್ ಪ್ಯಾಂಟ್ರಿ ಮೂಲಕ ಆನ್ ಲೈನ್ ನಲ್ಲಿ ಉತ್ಪನ್ನಗಳನ್ನು ಮಾರಾಟ ಮಾಡುವ ಉದ್ದೇಶದಿಂದ ಕಂಪೆನಿಯಿಂದ ಶೀತಲಗೃಹಗಳ ನಿರ್ಮಾಣ ಮಾಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಈ ಯೋಜನೆ ಸಫಲವಾದಲ್ಲಿ ಇತರ ಭಾಗಗಳಲ್ಲೂ ವಿಸ್ತರಿಸುವ ಉದ್ದೇಶ ಇದೆ. ಸದ್ಯಕ್ಕೆ ಅಮೆಜಾನ್ ನಿಂದ ವಿವಿಧ ಮಂಡಿಗಳಿಂದ ಹಣ್ಣು, ತರಕಾರಿ ಖರೀದಿಸಲಾಗುತ್ತಿದೆ. ಭಾರತದ ಚಿಲ್ಲರೆ ಮಾರುಕಟ್ಟೆಯಲ್ಲಿ ಆಹಾರ ಮತ್ತು ದಿನಸಿ ಪದಾರ್ಥಗಳು ಬಹಳ ಮುಖ್ಯವಾದ ಪಾಲು ಹೊಂದಿವೆ. ಇದರಲ್ಲಿ ಪಾರಮ್ಯ ಸಾಧಿಸಲು ಇ ಕಾಮರ್ಸ್ ಕಂಪೆನಿಗಳು ಸೇರಿದಂತೆ ಸಂಘಟಿತ ಚಿಲ್ಲರೆ ಮಾರಾಟಗಾರರು ಯತ್ನಿಸುತ್ತಿದ್ದಾರೆ.