ಬ್ರಿಟಿಷ್ ಬಿಲಿಯನೇರ್ ಉದ್ಯಮಿ ಬ್ರಾನ್ಸನ್ ಪೂರ್ವಜರ ಮೂಲ ತ.ನಾಡಿನ ಕಡಲೂರು

ಬ್ರಿಟಿಷ್ ಹೆಸರಾಂತ ಉದ್ಯಮಿ ಸರ್ ರಿಚರ್ಡ್ ಚಾರ್ಲ್ಸ್ ನಿಕೋಲಸ್ ಬ್ರಾನ್ಸನ್ ತನ್ನ ಪೂರ್ವಜರ ಮೂಲ ಭಾರತದ ತಮಿಳುನಾಡಿನಲ್ಲಿನ ಕಡಲೂರು ಎಂದು ಹೇಳಿಕೊಂಡಿರುವುದು ಭಾರೀ ಸುದ್ದಿಯಾಗಿದೆ. ವರ್ಜಿನ್ ಗ್ರೂಪ್ ನ ಸಂಸ್ಥಾಪಕರಾದ ಬ್ರಾನ್ಸನ್ ಭಾರತಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಈ ವಿಚಾರವನ್ನು ಬಹಿರಂಗಪಡಿಸಿದ್ದಾರೆ.

ಅಂದ ಹಾಗೆ ವರ್ಜಿನ್ ಗ್ರೂಪ್ ನಿಂದ ವಿಮಾನ ಯಾನವೂ ಸೇರಿದಂತೆ ನಾನೂರು ವಿವಿಧ ಕ್ಷೇತ್ರಗಳಲ್ಲಿ ಹಣ ತೊಡಗಿಸಿ, ವ್ಯವಹಾರ ಮಾಡಲಾಗುತ್ತಿದೆ. 'ಕೆಲ ವರ್ಷಗಳ ಹಿಂದೆ ಟೀವಿ ಕಾರ್ಯಕ್ರಮವೊಂದರ ಸಲುವಾಗಿ ನನ್ನ ಡಿಎನ್ ಎ ಪರೀಕ್ಷೆ ಮಾಡಿಸಿದಾಗ ನನ್ನ ಅಜ್ಜಿಯ ಮುತ್ತಜ್ಜಿ (ಪೂರ್ವಜರು) ಭಾರತದ ತಮಿಳುನಾಡು ರಾಜ್ಯದ ಕಡಲೂರಿನವರು ಎಂಬುದು ಗೊತ್ತಾಯಿತು' ಎಂದಿದ್ದಾರೆ.

1793ನೇ ಇಸವಿಯಿಂದ ನಾಲ್ಕು ತಲೆಮಾರಿನವರು ಕಡಲೂರಿನಲ್ಲೇ ವಾಸವಿದ್ದಾರೆ ಎಂದಿರುವ ಅವರು, ನಾನು ಯಾವಾಗೆಲ್ಲ ಭಾರತೀಯರನ್ನು ಭೇಟಿ ಮಾಡುತ್ತೀನೋ ಆಗ, "ನಾವು ಸಂಬಂಧಿಗಳಿರಬಹುದು ಎನ್ನಲು ಹೆಮ್ಮೆ ಎನಿಸುತ್ತದೆ" ಎಂದೇ ಹೇಳ್ತೀನಿ ಎಂಬ ಮಾತನ್ನು ಬ್ರಾನ್ಸನ್ ಹೇಳಿಕೊಂಡಿದ್ದಾರೆ.

ಭಾರತದೊಂದಿಗಿನ ತಮ್ಮ ನಂಟನ್ನು ಸಂಭ್ರಮಿಸುವ ಕಾರಣಕ್ಕೆ ವರ್ಜಿನ್ ಆಟ್ಲಾಂಟಿಕ್ ನಿಂದ ಭಾರತಕ್ಕಾಗಿ ಹೊಸ ಐಕಾನ್ ಸಿದ್ಧಪಡಿಸಲಾಗಿದೆ. ಅದನ್ನು 'ಅರಿಯಾ' ಎನ್ನಲಾಗಿದೆ. ಬ್ರಾನ್ಸನ್ ನ ಅಜ್ಜಿಯ ಮುತ್ತಜ್ಜಿಯನ್ನು ಇದೇ ಹೆಸರಿನಿಂದ ಕರೆಯಲಾಗುತ್ತಿತ್ತಂತೆ. ಬಿಲಿಯನೇರ್ ಬ್ರಾನ್ಸನ್ ಬಾಹ್ಯಾಕಾಶ ಪ್ರವಾಸೋದ್ಯಮದಲ್ಲೂ ಹಣ ತೊಡಗಿಸಿದ್ದಾರೆ.