ಕಾಗ್ನಿಜಂಟ್ ನೌಕರರ ಮೇಲೆ ಹೆಚ್ಚಲಿದೆ ಒತ್ತಡ, ಬೆಂಚ್ ಸಮಯ ಕಡಿತ

ಅಮೆರಿಕಾದ ಬಹುರಾಷ್ಟ್ರೀಯ ಮಾಹಿತಿ ತಂತ್ರಜ್ಞಾನ ಕಂಪನಿ ಕಾಗ್ನಿಜಂಟ್ ತಮ್ಮ ಉದ್ಯೋಗಿಗಳಿಗೆ ಗರಿಷ್ಟ ಬೆಂಚ್ ಸಮಯವನ್ನು ಕಡಿತಗೊಳಿಸಿದೆ. ಈ ಮೂಲಕ ಮುಂಬರುವ ತಿಂಗಳುಗಳಲ್ಲಿ ಕಂಪನಿಯಿಂದ ಹೊರಬೀಳುವವರ ಸಂಖ್ಯೆ ಹೆಚ್ಚಾಗಲಿದೆ.

ನಾಸ್ದಾಕ್ ಪಟ್ಟಿಮಾಡಿದ ಐಟಿ ಸೇವೆಗಳ ಸಂಸ್ಥೆ ಬೆಂಚ್ ಸಮಯವನ್ನು 60 ದಿನಗಳಿಂದ 35 ದಿನಗಳವರೆಗೆ ಕುಗ್ಗಿಸಿದೆ. 35 ದಿನಗಳ ಬಳಿಕ ಅವರನ್ನು ಕಂಪನಿ ಬಿಡಲು ಕೇಳಬಹುದು. ಆದರೆ ಪ್ರಚಾರಿಕ ನಿರ್ಗಮನ(Formal exit) 60 ರಿಂದ 90 ದಿನ ತೆಗೆದುಕೊಳ್ಳಬಹುದು ಎಂದು ಟೈಮ್ಸ್‌ ಆಫ್ ಇಂಡಿಯಾ ಶನಿವಾರ ವರದಿ ಮಾಡಿದೆ.

ಹಿಂದೆ, ಅಂತಹ ಉದ್ಯೋಗಿಗಳು ತಮ್ಮ ವ್ಯಾಪಾರ ಘಟಕಗಳಲ್ಲಿ(business units) ಅಥವಾ ಕಾರ್ಪೋರೇಟ್ ಪೂಲ್ ಗಳಲ್ಲಿ ಪ್ರಾಜೆಕ್ಟ್‌ಗಳನ್ನು ಹುಡುಕಲು ಹೆಚ್ಚು ಸಮಯವನ್ನು ಪಡೆಯುತ್ತಿದ್ದರು. ಬೇರೆ ನಗರಕ್ಕೆ ಸ್ಥಳಾಂತರಗೊಳ್ಳಲು ಅಥವಾ ಡೊಮೇನ್‌ಗಳಿಗೆ ತೆರಳಲು ಹಿಂಜರಿಯುವ ನೌಕರರು ಅಥವಾ ಇತರೆ ಕಾರ್ಯಗಳಿಗೆ ಈ ಬೆಂಚ್ ಗರಿಷ್ಟ ಸಮಯವು ಸಹಾಯವಾಗುತ್ತಿತ್ತು. ಆದರೆ ಈಗ ಸಮಯ ಕಡಿತದಿಂದ ನೌಕರರು ಮೊದಲೇ ಕಂಪನಿಯಿಂದ ಹೊರಬೀಳುವಂತಾಗಿದೆ ಎಂದು ವರದಿಯಾಗಿದೆ.

ದಿನಕ್ಕೆ 30 ಲಕ್ಷ, 12 ವರ್ಷಕ್ಕೆ 1350 ಕೋಟಿ; ಇದು ಕಾಗ್ನಿಜಂಟ್ ಸಿಇಒ ವೇತನ

ಕಾಗ್ನಿಜಂಟ್ ಕಂಪನಿಯ ಈ ಹೊಸ ನಿಯಮವು Fit for-growth ಯೋಜನೆಯ ಒಂದು ಭಾಗವಾಗಿದ್ದು, ನೌಕರರ ಬೆಂಚ್ ಸಮಯ ಪರಿಷ್ಕರಣೆ ಕುರಿತು ಕೇಳಲಾದ ಇ-ಮೇಲ್‌ಗೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ ಎಂದು ಟೈಮ್ಸ್‌ ಆಫ್ ಇಂಡಿಯಾ ವರದಿ ಪ್ರಕಟಿಸಿದೆ. ಈ ನಿಯಮ ಪರಿಷ್ಕರಣೆಯು ನೌಕರರ ಮೇಲೆ ಒತ್ತಡ ಹೆಚ್ಚಿಸುವುದರ ಜೊತೆಗೆ ಉತ್ತಮ ಕೆಲಸ ಹೊರತೆಗೆಯುವ ಪ್ರಕ್ರಿಯೆಯು ಆಗಿದೆ ಎಂದು ಹೇಳಲಾಗುತ್ತಿದೆ.