ಕೊರೊನೊ ಎಫೆಕ್ಟ್: 101 ಉದ್ಯೋಗಿಗಳನ್ನು ವಜಾಗೊಳಿಸಿದ 'ಶೇರ್ ಚಾಟ್'

ಕೊರೊನಾವೈರಸ್ ಪರಿಣಾಮ ಪ್ರಪಂಚದಾದ್ಯಂತ ಭಾರೀ ಪ್ರಮಾಣದಲ್ಲಿ ಉದ್ಯೋಗ ನಷ್ಟವುಂಟಾಗುತ್ತಿದ್ದು, ಒಂದರ ಹಿಂದೆ ಮತ್ತೊಂದರಂತೆ ಖಾಸಗಿ ಕಂಪನಿಗಳು ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸುತ್ತಿವೆ. ಇದೇ ಸಾಲಿಗೆ ದೇಶಿಯ ಸಾಮಾಜಿಕ ಜಾಲತಾಣ 'ಶೇರ್ ಚಾಟ್' 101 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಿದೆ.

ಸಂಸ್ಥೆಯ ಒಟ್ಟಾರೆ ನೌಕರರ ಪೈಕಿ 4 ನೇ ಒಂದು ಭಾಗದಷ್ಟು ನೌಕರರನ್ನು ಉದ್ಯೋಗದಿಂದ ತೆಗೆದುಹಾಕುತ್ತಿರುವುದಾಗಿ ಶೇರ್ ಚಾಟ್ ಬುಧವಾರ (ಮೇ 20) ಘೋಷಿಸಿದೆ.

ಈ ಬಗ್ಗೆ ಮಾಹಿತಿ ನೀಡಿರುವ ಕಂಪನಿಯ ಸಹ ಸಂಸ್ಥಾಪಕ ಹಾಗೂ ಸಿಇಒ ಅಂಕುಶ್ ಸಚದೇವ ''ಜಾಹಿರಾತು ಮಾರುಕಟ್ಟೆಯಲ್ಲಿ ಕೋವಿಡ್-19 ರ ಅಸ್ಥಿರತೆಯ ಪರಿಣಾಮ ಸಂಸ್ಥೆಯ ನೌಕರರ ಪೈಕಿ 101 ಜನರನ್ನು ಉದ್ಯೋಗದಿಂದ ತೆಗೆದುಹಾಕಲಾಗಿದೆ. ಮಾರುಕಟ್ಟೆಯಲ್ಲಿ ಉಂಟಾಗಿರುವ ಅಸ್ಥಿರತೆಗಳಿಂದಾಗಿ ಉದ್ಯಮಕ್ಕೆ ಸಂಬಂಧಿಸಿದಂತೆ ಹಲವು ಕ್ರಮ ಕೈಗೊಳ್ಳಲಾಗುತ್ತಿದೆ. ಇದರ ಭಾಗವಾಗಿ ನೌಕರರನ್ನು ಉದ್ಯೋಗದಿಂದ ತೆಗೆದುಹಾಕಲಾಗಿದೆ'' ಎಂದು ಹೇಳಿದ್ದಾರೆ.

ವರ್ಕ್‌ ಫ್ರಮ್ ಹೋಮ್ ಕೆಲಸ ಮಾಡುವ ವಾತಾವರಣವನ್ನು ನಾವು ಅಳವಡಿಕೆ ಮಾಡಿಕೊಳ್ಳಲಾಗಿದೆ. ಕಚೇರಿಯಲ್ಲೇ ನಡೆಯುವ ಕೆಲಸಗಳ ಕುರಿತು ನಾವು ಮರುಪರಿಶೀಲನೆ ಮಾಡಿದ್ದೇವೆ ಎಂದು ಸಿಇಒ ಹೇಳಿದ್ದಾರೆ.

ತಿಂಗಳಿಗೆ 60 ಮಿಲಿಯನ್ ಬಳಕೆದಾರರನ್ನು ಹೊಂದಿರುವ ಬೆಂಗಳೂರು ಮೂಲದ ಶೇರ್ ಚಾಟ್ ಮೈಕ್ರೋಬ್ಲಾಗಿಂಗ್ ಸೈಟ್ ಟ್ವಿಟರ್ ಮತ್ತು ಇತರೆ ಕೆಲವು ಹೂಡಿಕೆದಾರರಿಂದ ಕಳೆದ ಆಗಸ್ಟ್ ನಲ್ಲಿ 100 ಮಿಲಿಯನ್ ಡಾಲರ್ ನಷ್ಟು ಗಳಿಸಿತ್ತು.