2018ರಲ್ಲಿ ಪ್ರತಿ ಗಂಟೆಗೆ, ದೇಶದಲ್ಲಿ ಒಬ್ಬ ನಿರುದ್ಯೋಗಿ ಆತ್ಮಹತ್ಯೆ: NCRB ವರದಿ

ಈ ವಿಚಾರವನ್ನು ನಂಬಲು ಕಷ್ಟವಾದ್ರೂ, ನಂಬಲೇಬೇಕಾದ ಪರಿಸ್ಥಿತಿ ಇದೆ. 2018ರಲ್ಲಿ ಪ್ರತಿ ಒಂದು ಗಂಟೆಗೆ ಒಬ್ಬ ನಿರುದ್ಯೋಗಿಯು ದೇಶದಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಎನ್‌ಸಿಆರ್‌ಬಿ ವರದಿ ಮಾಡಿದೆ.

2018ರಲ್ಲಿ ದೇಶದಲ್ಲಿ ಒಟ್ಟಾರೆ 1,34,516 ಜನರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇದರಲ್ಲಿ 92,914 ಪುರುಷರು ಮತ್ತು 42,391 ಮಹಿಳೆಯರಾಗಿದ್ದಾರೆ ಎಂದು ರಾಷ್ಟ್ರೀಯ ಅಪರಾಧ ದಾಖಲೆಗಳ ಸಂಸ್ಥೆಯ (NCRB) ವರದಿಯಲ್ಲಿ ತಿಳಿದುಬಂದಿದೆ.

2018ರಲ್ಲಿ 12,936 ನಿರುದ್ಯೋಗಿಗಳ ಆತ್ಮಹತ್ಯೆ

ಗೃಹ ಸಚಿವಾಲಯದ ಅಧೀನದಲ್ಲಿರುವ NCRB ಕಳೆದ ವಾರ ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, 2018ರಲ್ಲಿ ಒಟ್ಟು 12,936 ನಿರುದ್ಯೋಗಿಗಳು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇದು ಒಟ್ಟು ಆತ್ಮಹತ್ಯೆಗಳಲ್ಲಿ 9.6 ಪರ್ಸೆಂಟ್ ರಷ್ಟಿದೆ ಎಂದು ಹೇಳಿದೆ. ಆತ್ಮಹತ್ಯೆ ಮಾಡಿಕೊಂಡವರಲ್ಲಿ 18 ವರ್ಷಕ್ಕಿಂತ ಕಡಿಮೆ ಮತ್ತು 60 ವರ್ಷಕ್ಕಿಂತ ಮೇಲ್ಪಟ್ಟವರಾಗಿದ್ದಾರೆ.

18 ರಿಂದ 30 ವಯಸ್ಸಿನ 1,240 ಯುವಕರು ಆತ್ಮಹತ್ಯೆ

ಒಟ್ಟು ಆತ್ಮಹತ್ಯೆ ಮಾಡಿಕೊಂಡ ನಿರುದ್ಯೋಗಿಗಳಲ್ಲಿ 18 ರಿಂದ 30ವರ್ಷ ವಯಸ್ಸಿನವರು ಕೂಡ ಹೆಚ್ಚಿದ್ದಾರೆ. ಈ ವಯೋಮಿತಿಯಲ್ಲಿ 1,240 ಪುರುಷರು ಆತ್ಮಹತ್ಯೆಗೆ ಶರಣಾಗಿದ್ದು, 180 ಮಹಿಳೆಯರು ಸೇರಿದ್ದಾರೆ. ಇನ್ನು 30 ರಿಂದ 45 ವಯಸ್ಸಿನವರಲ್ಲಿ 868 ಪುರುಷರು ಮತ್ತು 95 ಮಹಿಳೆಯರು ಸೇರಿದ್ದಾರೆ. 45 ರಿಂದ 60 ವಯಸ್ಸಿನೊಳಗಿರುವ 237 ಪುರುಷರು ಮತ್ತು 21 ಮಹಿಳೆಯರು , 60 ವರ್ಷ ಮೇಲ್ಪಟ್ಟ 2,431 ಪುರುಷರು ಮತ್ತು 310 ಮಹಿಳೆಯರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

2018ರಲ್ಲಿ ಒಟ್ಟಾರೆ ಆತ್ಮಹತ್ಯೆ ಮಾಡಿಕೊಂಡ ನಿರುದ್ಯೋಗಿಗಳಲ್ಲಿ 10,687 ಪುರುಷರು ಮತ್ತು 2,249 ಮಹಿಳೆಯರಿದ್ದಾರೆ.

 

ಕೇರಳ-ತಮಿಳುನಾಡಿನಲ್ಲೇ ನಿರುದ್ಯೋಗಿಗಳ ಆತ್ಮಹತ್ಯೆ ಹೆಚ್ಚು

ಕೇರಳ ರಾಜ್ಯದಲ್ಲಿ ಅತಿ ಹೆಚ್ಚು ನಿರುದ್ಯೋಗಿಗಳು ಆತ್ಮಹತ್ಯೆ ಮಾಡಿಕೊಂಡಿರುವುದು ವರದಿಯಾಗಿದೆ. ಒಟ್ಟಾರೆ ನಿರುದ್ಯೋಗಿಗಳ ಆತ್ಮಹತ್ಯೆಯಲ್ಲಿ 12.3 ಪರ್ಸೆಂಟ್‌ನಷ್ಟು (12,936 ರಲ್ಲಿ 1,586) ಜನರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ತಮಿಳುನಾಡಿನಲ್ಲಿ 12.2 ಪರ್ಸೆಂಟ್( 1,579), ಮಹಾರಾಷ್ಟ್ರದಲ್ಲಿ 9.7 ಪರ್ಸೆಂಟ್ (1,260), ಕರ್ನಾಟಕದಲ್ಲಿ 8.5 ಪರ್ಸೆಂಟ್ (1,094) , ಉತ್ತರ ಪ್ರದೇಶದಲ್ಲಿ 7 ಪರ್ಸೆಂಟ್ (902) ಜನರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಎನ್‌ಸಿಆರ್‌ಬಿ ಪ್ರಕಾರ ಜನಗಣತಿ ರಹಿತ ವರ್ಷಗಳಲ್ಲಿ ಯೋಜಿತ ಜನಸಂಖ್ಯೆಯನ್ನು ಬಳಸಿಕೊಂಡು ಆತ್ಮಹತ್ಯೆಗಳ ಪ್ರಮಾಣವನ್ನು ಲೆಕ್ಕ ಹಾಕಲಾಗಿದೆ. 2011ರ ಜನಸಂಖ್ಯೆಯನ್ನು ಬಳಸಲಾಗಿದೆ.

2018ರಲ್ಲಿ ಆತ್ಮಹತ್ಯೆ ಪ್ರಮಾಣ 3.6 ಪರ್ಸೆಂಟ್ ಏರಿಕೆ

NCRB ಅಂಕಿ-ಅಂಶಗಳ ಪ್ರಕಾರ ಒಟ್ಟಾರೆ 1,34,516 ಜನರು 2018ರಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದು, 2017ಕ್ಕೆ ಹೋಲಿಸಿದರೆ ಇದರ ಪ್ರಮಾಣದಲ್ಲಿ 3.6 ಪರ್ಸೆಂಟ್ ಏರಿಕೆಗೊಂಡಿದೆ. ಒಟ್ಟಾರೆ ಆತ್ಮಹತ್ಯೆ ಮಾಡಿಕೊಂಡಿದ್ದವರಲ್ಲಿ 1.3 ಪರ್ಸೆಂಟ್ (1,707) ಜನರು ಸರ್ಕಾರಿ ಉದ್ಯೋಗಿಗಳಾಗಿದ್ದು, 6.1 ಪರ್ಸೆಂಟ್(8,246) ಜನರು ಖಾಸಗಿ ಕಂಪನಿಗಳಲ್ಲಿ ಕೆಲಸ ಮಾಡುತ್ತಿದ್ದವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಕೃಷಿ ಕ್ಷೇತ್ರದ 10,349 ಜನರು ಆತ್ಮಹತ್ಯೆ

2018ರಲ್ಲಿ ಆತ್ಮಹತ್ಯೆಗೆ ಶರಣಾದವರಲ್ಲಿ ಕೃಷಿ ಕ್ಷೇತ್ರಕ್ಕೆ ಸೇರಿದವರು 10,349 ರಷ್ಟಿದೆ. ಇದರಲ್ಲಿ 5,763 ರೈತರು ಇದ್ದು, ಕೃಷಿಕರು ಮತ್ತು ಕೃಷಿ ಕಾರ್ಮಿಕರು 4,586 ಜನರು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಇದು ಒಟ್ಟಾರೆ ಆತ್ಮಹತ್ಯೆ ಪ್ರಕರಣಗಳಲ್ಲಿ 7.7 ಪರ್ಸೆಂಟ್‌ನಷ್ಟಿದೆ.