ನವೆಂಬರ್ ಐದು ಟ್ರೇಡಿಂಗ್ ಸೆಷನ್ ನಲ್ಲಿ 8381 ಕೋಟಿ ರು. FPI ನಿವ್ವಳ ಹೂಡಿಕೆ

ಫಾರಿನ್ ಪೋರ್ಟ್ ಫೋಲಿಯೋ ಇನ್ವೆಸ್ಟರ್ಸ್ (ಎಫ್ ಪಿಐ) ಭಾರತದ ಮಾರುಕಟ್ಟೆಯಲ್ಲಿ ನವೆಂಬರ್ ತಿಂಗಳ ಐದು ಟ್ರೇಡಿಂಗ್ ಸೆಷನ್ ನಲ್ಲಿ 8381 ಕೋಟಿ ರುಪಾಯಿ ನಿವ್ವಳ ಹೂಡಿಕೆ ಮಾಡಿದ್ದಾರೆ. ವ್ಯವಹಾರ ಚಟುವಟಿಕೆಗಳು ಮತ್ತೆ ಆರಂಭಗೊಂಡಿರುವುದು ಮತ್ತು ನಿರೀಕ್ಷೆಗಿಂತ ಉತ್ತಮವಾಗಿ ತ್ರೈಮಾಸಿಕ ಫಲಿತಾಂಶ ಬಂದಿರುವುದು ಮತ್ತಿತರ ಕಾರಣಗಳಿಗಾಗಿ ಈ ಬೆಳವಣಿಗೆ ಆಗಿದೆ.

ಡೆಪಾಸಿಟಿರಿಗಳ ದತ್ತಾಂಶದ ಪ್ರಕಾರ, ನವೆಂಬರ್ 2ರಿಂದ 6ನೇ ತಾರೀಕಿನ ಮಧ್ಯೆ ಎಫ್ ಪಿಐನಿಂದ ನಿವ್ವಳ 6,564 ಕೋಟಿ ರುಪಾಯಿ ಈಕ್ವಿಟಿಯಲ್ಲಿ ಹಾಗೂ 1817 ಕೋಟಿ ರುಪಾಯಿ ಡೆಟ್ ಸೆಗ್ಮೆಂಟ್ ನಲ್ಲಿ ಸೇರಿ ಒಟ್ಟಾರೆ 8381 ಕೋಟಿ ರುಪಾಯಿ ನಿವ್ವಳವಾಗಿ ಹರಿದುಬಂದಿದೆ. ಅಕ್ಟೋಬರ್ ನಲ್ಲಿ ವಿದೇಶೀ ಹೂಡಿಕೆದಾರರು ಭಾರತದಲ್ಲಿ ನಿವ್ವಳ ಖರೀದಿ 22,033 ಕೋಟಿ ರುಪಾಯಿಯಷ್ಟು ಮಾಡಿದ್ದರು.

ಈಚೆಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದಿಂದ ಘೋಷಣೆ ಮಾಡಿದ ಕ್ರಮಗಳಿಂದ ಕೂಡ ಎಫ್ ಪಿಐ ಹೂಡಿಕೆ ಆಕರ್ಷಿತವಾಗುತ್ತಿದೆ ಎಂದು ವಿಶ್ಲೇಷಕರು ಅಭಿಪ್ರಾಯ ಪಟ್ಟಿದ್ದಾರೆ. ಇನ್ನು ಎಲ್ಲ ವಲಯಗಳಿಗೂ ಬಂಡವಾಳ ಹರಿದುಬರುತ್ತಿದೆ. ಇಂಥದ್ದೇ ನಿರ್ದಿಷ್ಟ ವಲಯ ಎಂದೇನಿಲ್ಲ ಅಂತಲೂ ತಿಳಿಸಲಾಗಿದೆ.