ಭಾರ್ತಿ ಏರ್ ಟೆಲ್ ನಲ್ಲಿ ಶೇ 100ರಷ್ಟು ವಿದೇಶ ನೇರ ಹೂಡಿಕೆಗೆ ಸರ್ಕಾರ ಸಮ್ಮತಿ
ಭಾರ್ತಿ ಏರ್ ಟೆಲ್ ನಲ್ಲಿ ವಿದೇಶ ನೇರ ಹೂಡಿಕೆಯನ್ನು 49 ಪರ್ಸೆಂಟ್ ನಿಂದ 100 ಪರ್ಸೆಂಟ್ ಗೆ ಏರಿಸಲು ಟೆಲಿಕಾಂ ಇಲಾಖೆಯು (ಡಿಒಟಿ) ಒಪ್ಪಿಗೆ ನೀಡಿದೆ. ಮಂಗಳವಾರದಂದು ಈ ಬಗ್ಗೆ ಕಂಪೆನಿ ಮಾಹಿತಿಯನ್ನು ನೀಡಿದೆ. ಇದರ ಜತೆಗೆ ಕಂಪೆನಿಯಲ್ಲಿ 74ರಷ್ಟು ಪಾಲು ಹೊಂದಲು ವಿದೇಶಿ ಹೂಡಿಕೆದಾರರಿಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾವು ಅನುಮತಿ ನೀಡಿದೆ ಎಂದು ತಿಳಿಸಲಾಗಿದೆ.
ಏರ್ ಟೆಲ್ ನಿಂದ 179 ರುಪಾಯಿಯ ಪ್ರೀಪೇಯ್ಡ್ ಪ್ಲಾನ್, ಜತೆಗೆ ಇನ್ಷೂರೆನ್ಸ್
"ಭಾರ್ತಿ ಏರ್ ಟೆಲ್ ಲಿಮಿಟೆಡ್ ಟೆಲಿಕಾಂ ಇಲಾಖೆಯಿಂದ (DOT) ಒಪ್ಪಿಗೆ ಪಡೆದಿದೆ. ಜನವರಿ 20,2020ಕ್ಕೆ ಬಂದ ಪತ್ರದಲ್ಲಿ, ಕಂಪೆನಿಯ ಪೇಯ್ಡ್ ಅಪ್ ಬಂಡವಾಳದಲ್ಲಿ ಶೇಕಡಾ 100ಕ್ಕೆ ವಿದೇಶ ನೇರ ಹೂಡಿಕೆ ಮಿತಿಯನ್ನು ಹೆಚ್ಚಿಸಲು ಅನುಮತಿ ನೀಡಿದೆ" ಎಂದು ಸ್ಟಾಕ್ ಎಕ್ಸ್ ಚೇಂಜ್ ನಲ್ಲಿ ದಾಖಲಿಸಿರುವ ಮಾಹಿತಿಯಲ್ಲಿ ತಿಳಿಸಲಾಗಿದೆ.
ಭಾರ್ತಿ ಏರ್ ಟೆಲ್ ನಿಂದ ಪರವಾನಗಿ ಶುಲ್ಕ 21,682 ಕೋಟಿ ಮತ್ತು ಸ್ಪೆಕ್ಟ್ರಂ ಶುಲ್ಕ 13,904.01 ಕೋಟಿ ರುಪಾಯಿ (ಟೆಲಿನಾರ್ ಹಾಗೂ ಟಾಟಾ ಟೆಲಿ ಸರ್ವೀಸಸ್ ಬಾಕಿ ಹೊರತುಪಡಿಸಿ) ಸರ್ಕಾರಕ್ಕೆ ಪಾವತಿಸಲು ಕೆಲ ದಿನ ಬಾಕಿ ಇರುವಂತೆಯೇ ಈ ಮಾಹಿತಿ ಹೊರಬಿದ್ದಿದೆ.