ವಿಳಂಬವಾಗಿ ಜಿಎಸ್‌ಟಿ ಕಟ್ಟುವ ವ್ಯಾಪಾರಸ್ಥರಿಗೆ ಸಿಹಿ ಸುದ್ದಿ

ನವದೆಹಲಿ, ಜೂನ್ 13: ವಿಳಂಬವಾಗಿ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಪಾವತಿಸುವ ವರ್ತಕರಿಗೆ ಕೇಂದ್ರ ಸರ್ಕಾರ ಸಿಹಿ ಸುದ್ದಿ ನೀಡಿದೆ.

ವಿಳಂಬವಾಗಿ ಜಿಎಸ್‌ಟಿ ಪಾವತಿಸುತ್ತಿದ್ದ ವರ್ತಕರಿಗೆ ಈ ಮೊದಲು ಶೇ 18 ರಷ್ಟು ಬಡ್ಡಿ ವಿಧಿಸಲಾಗುತ್ತಿತ್ತು. ಈಗ ಕೊರೊನಾ ಲಾಕ್‌ಡೌನ್ ಪರಿಣಾಮವಾಗಿ ಅನೇಕ ವರ್ತಕರು ತೊಂದರೆಗೆ ಸಿಲುಕಿಕೊಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ವಿಳಂಬವಾಗಿ ಜಿಎಸ್‌ಟಿ ಕಟ್ಟಿದರೆ ಶೇ 18 ರ ಬಡ್ಡಿಯನ್ನು ಅರ್ಧಕ್ಕೆ ಇಳಿಸಲಾಗಿದೆ.

ಶುಕ್ರವಾರ ನಡೆದ ಕೇಂದ್ರ ಜಿಎಸ್‌ಟಿ ಕೌನ್ಸಿಲ್‌ನಲ್ಲಿ ಈ ತೀರ್ಮಾನ ತೆಗೆದುಕೊಳ್ಳಲಾಗಿದೆ. ನೆರವಿನ ಪ್ಯಾಕೇಜ್ ರೂಪದಲ್ಲಿ ಜಿಎಸ್‌ಟಿ ಮಂಡಳಿ ಈ ತೀರ್ಮಾನ ತೆಗೆದುಕೊಂಡಿದೆ. ಫೆಬ್ರವರಿ, ಮಾರ್ಚ್ ಏಪ್ರಿಲ್ ತಿಂಗಳಿನ ಜಿಎಸ್‌ಟಿ ಕಟ್ಟಲು ಆಗಸ್ಟ್‌ವರೆಗೆ ಸಮಯ ನೀಡಲಾಗಿದೆ.

ಇದರಿಂದ 5 ಕೋಟಿ ರುಪಾಯಿ ಒಳಗೆ ಜಿಎಸ್‌ಟಿ ಕಟ್ಟುವ ವಹಿವಾಟುದಾರರಿಗೆ ಇದು ಅನುಕೂಲ ಆಗಲಿದೆ. ಈಗಾಗಲೇ ಮೇ, ಜೂನ್ ಹಾಗೂ ಜುಲೈ ತಿಂಗಳ ಜಿಎಸ್‌ಟಿ ಯನ್ನು ಯಾವುದೇ ಬಡ್ಡಿ ಅಥವಾ ದಂಡವಿಲ್ಲದೇ ಕಟ್ಟಲು ಸೆಪ್ಟೆಂಬರ್ ವರೆಗೆ ಅವಧಿ ನೀಡಲಾಗಿದೆ.