ಕರ್ನಾಟಕಕ್ಕೆ ಮದ್ಯ ಮಾರಾಟದಿಂದ 2460 ಕೋಟಿ ರುಪಾಯಿ ಆದಾಯ

ಕರ್ನಾಟಕಕ್ಕೆ ಜೂನ್ ತಿಂಗಳಲ್ಲಿ ಮದ್ಯ ಮಾರಾಟದಿಂದ 2460 ಕೋಟಿ ರುಪಾಯಿ ಆದಾಯ ಬಂದಿದೆ. ಮೇ ತಿಂಗಳಿಗೆ ಹೋಲಿಸಿದರೆ ಇದು ಹೆಚ್ಚು. ಕೊರೊನಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ಆರ್ಥಿಕ ಸಮಸ್ಯೆ ಎದುರಾಗಿರುವಾಗ ತುಂಬ ಅಗತ್ಯ ಇರುವ ಹಣಕಾಸು ಆದಾಯದ ಮೂಲ ಹೆಚ್ಚಾಗಿದೆ. ಮೇ ತಿಂಗಳಲ್ಲಿ ಮದ್ಯ ಮಾರಾಟದ ಮೂಲಕ 1,400 ಕೋಟಿ ರುಪಾಯಿ ಆದಾಯ ಬಂದಿತ್ತು.

ಲೈಸೆನ್ಸ್ ಶುಲ್ಕದಲ್ಲಿನ ಹೆಚ್ಚಳ ಮತ್ತು ಹಲವು ಮಳಿಗೆಗಳಿಗೆ ಮದ್ಯ ಮಾರಾಟಕ್ಕೆ ಅವಕಾಶ ನೀಡಿದ್ದರಿಂದ ಆದಾಯದಲ್ಲಿ ಗಮನಾರ್ಹವಾದ ಏರಿಕೆ ಆಗಿದೆ. ಒಟ್ಟು 2,460 ಕೋಟಿ ರುಪಾಯಿಯ ಆದಾಯದ ಪೈಕಿ 2,000 ಕೋಟಿ ಬಂದಿರುವುದು ಭಾರತೀಯ ಮದ್ಯದಿಂದ ಹಾಗೂ 190 ಕೋಟಿ ರುಪಾಯಿ ಬಿಯರ್ ಮಾರಾಟದಿಂದ ಎಂದು ಕರ್ನಾಟಕ ಅಬಕಾರಿ ಇಲಾಖೆ ತಿಳಿಸಿದೆ.

"270 ಕೋಟಿ ರುಪಾಯಿಯಷ್ಟು ಮೊತ್ತ ಪರವಾನಗಿ ಶುಲ್ಕದ ರೂಪದಲ್ಲಿ ಬಂದಿದೆ" ಎಂದು ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ. 56.30 ಲಕ್ಷ ಭಾರತೀಯ ಮದ್ಯ ಮತ್ತು 21.54 ಲಕ್ಷ ಬಾಕ್ಸ್ ಬಿಯರ್ ಮಾರಾಟ ಮಾಡಲಾಗಿದೆ. ಅತಿ ಹೆಚ್ಚು ಮದ್ಯ ಸೇವನೆ ಮಾಡುವ ರಾಜ್ಯಗಳಲ್ಲಿ ಕರ್ನಾಟಕವೂ ಒಂದು. 2020- 21ನೇ ಸಾಲಿಗೆ 22,700 ಕೋಟಿ ರುಪಾಯಿ ಗುರಿ ಹಾಕಿಕೊಳ್ಳಲಾಗಿದೆ.