ನಾನ್ ಸಬ್ಸಿಡೈಸ್ಡ್ ಎಲ್ ಪಿಜಿ ದರ ಫೆ. 4ರಿಂದ ರು. 25 ಹೆಚ್ಚಳ

ಸರ್ಕಾರಿ ಸ್ವಾಮ್ಯದ ತೈಲ ಮಾರ್ಕೆಟಿಂಗ್ ಕಂಪೆನಿಗಳು (OMC's) ಗುರುವಾರದಂದು (ಫೆಬ್ರವರಿ 4, 2021) ನಾನ್ ಸಬ್ಸಿಡೈಸ್ಡ್ ಎಲ್ ಪಿಜಿ ದರವನ್ನು ಮೆಟ್ರೋ ನಗರಗಳಲ್ಲಿ 25 ರುಪಾಯಿ ಹೆಚ್ಚಳ ಮಾಡಿವೆ. ಇಂದಿನಿಂದ ಹೊಸ ದರಗಳು ಜಾರಿಗೆ ಬರಲಿವೆ. ಈಗ ಹೊಸ ಬೆಲೆ ಜಾರಿಗೆ ಬಂದ ಮೇಲೆ 14.2 ಕೇಜಿಯ ಅಡುಗೆ ಅನಿಲ ಸಿಲಿಂಡರ್ ಬೆಲೆ ದೆಹಲಿಯಲ್ಲಿ ರು. 719 ಆಗಿದೆ.

ಕೋಲ್ಕತ್ತಾ, ಮುಂಬೈ ಮತ್ತು ಚೆನ್ನೈನಲ್ಲಿ ಕೂಡ ರು. 25 ಹೆಚ್ಚಳ ಮಾಡಲಾಗಿದೆ. ದರವು ಕ್ರಮವಾಗಿ ರು. 745.5, ರು. 719 ಹಾಗೂ ರು. 735 ಆಗಿದೆ. ಜನವರಿಯಲ್ಲಿ ಎಲ್ ಪಿಜಿ ದರದಲ್ಲಿ ಯಾವುದೇ ಬದಲಾವಣೆ ಆಗಿರಲಿಲ್ಲ. ಡಿಸೆಂಬರ್ ನಲ್ಲಿ ದೆಹಲಿಯಲ್ಲಿ ಎರಡು ಬಾರಿಯಿಂದ ಸೇರಿ ಸಿಲಿಂಡರ್ ಗೆ ರು. 100 ಮೇಲೇರಿತ್ತು.

ಅಂತರರಾಷ್ಟ್ರೀಯ ಬೆಂಚ್ ಮಾರ್ಕ್ ದರ ಮತ್ತು ಯುಎಸ್ ಡಾಲರ್ ವಿರುದ್ಧದ ರುಪಾಯಿ ಮೌಲ್ಯ ಇವುಗಳ ಆಧಾರದ ಮೇಲೆ ತೈಲ ಮಾರ್ಕೆಟಿಂಗ್ ಕಂಪೆನಿಗಳು ಎಲ್ ಪಿಜಿ ದರದ ಪರಿಷ್ಕರಣೆ ಮಾಡುತ್ತವೆ. ಅಡುಗೆ ಅನಿಲ ಸಿಲಿಂಡರ್ ಮಾರುಕಟ್ಟೆ ದರದಲ್ಲೇ ಖರೀದಿ ಆಗುತ್ತದೆ. ಸಬ್ಸಿಡಿ ಹಣವನ್ನು ಸರ್ಕಾರವು ಅರ್ಹ ಗ್ರಾಹಕರ ಬ್ಯಾಂಕ್ ಖಾತೆಗೆ ನೇರವಾಗಿ ವರ್ಗಾವಣೆ ಮಾಡುತ್ತದೆ.

ಎಲ್ ಪಿಜಿ ಸಿಲಿಂಡರ್ ಮಾರುಕಟ್ಟೆ ದರ ಮತ್ತು ಸಬ್ಸಿಡೈಸ್ಡ್ ಎಲ್ ಪಿಜಿ ಸಿಲಿಂಡರ್ ದರದ ವ್ಯತ್ಯಾಸವೇ ಸಬ್ಸಿಡಿ. ಗ್ರಾಹಕರಿಗೆ 14.2 ಕೇಜಿ ತೂಕದ ಹನ್ನೆರಡು ಅಡುಗೆ ಅನಿಲ ಸಿಲಿಂಡರ್ ಸಬ್ಸಿಡೈಸ್ಡ್ ದರದಲ್ಲಿ ದೊರೆಯುತ್ತದೆ.