OYO ದಿಂದ ಎಲ್ಲ ಸಿಬ್ಬಂದಿಗೂ 4 ತಿಂಗಳು 25% ವೇತನ ಕಡಿತ

OYO ಹೋಟೆಲ್ಸ್ ಮತ್ತು ಹೋಮ್ಸ್ ತನ್ನ ಎಲ್ಲ ಸಿಬ್ಬಂದಿಗೆ ನಾಲ್ಕು ತಿಂಗಳು 25% ವೇತನ ಕಡಿತ ಮಾಡಲಿದೆ. ಏಪ್ರಿಲ್ ತಿಂಗಳಿಂದ ಇದು ಶುರು ಆಗಲಿದೆ. ನಿಯಮಿತವಾದ ಸವಲತ್ತುಗಳೊಂದಿಗೆ ಕೆಲವರನ್ನು ರಜಾ ಮೇಲೆ ಕಳಿಸಿದೆ ಎಂದು ಕಂಪೆನಿಯ ಆಂತರಿಕ ಸುತ್ತೋಲೆಯನ್ನು ಉದಾಹರಿಸಿ ರಾಯಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಕೊರೊನಾ ವ್ಯಾಪಕಾವಾಗಿ ಹಬ್ಬಿದ್ದು, ಜಾಗತಿಕ ಮಟ್ಟದಲ್ಲಿ ಪ್ರವಾಸೋದ್ಯಮಕ್ಕೆ ಭರ್ತಿ ಪೆಟ್ಟು ಬಿದ್ದಿದೆ. ಈ ಕಾರಣಕ್ಕೆ ಏಪ್ರಿಲ್ ನ ಆರಂಭದಲ್ಲೇ ಸಾವಿರಾರು ಮಂದಿ ಅಂತರರಾಷ್ಟ್ರೀಯ ಸಿಬ್ಬಂದಿಯನ್ನು ಕೆಲಸದಿಂದ ತೆಗೆದಿತ್ತು. "ನಮ್ಮ ಕಂಪೆನಿ ಬಹಳ ಕಷ್ಟದ, ಆದರೆ ಅಗತ್ಯದ ಹೆಜ್ಜೆಯನ್ನು ಭಾರತದಲ್ಲಿ ಇಟ್ಟಿದೆ. OYOದ ಎಲ್ಲ ಸಿಬ್ಬಂದಿಗೆ 25 ಪರ್ಸೆಂಟ್ ವೇತನ ಕಡಿತಕ್ಕೆ ಒಪ್ಪಿಕೊಳ್ಳುವಂತೆ ಕೇಳಿದ್ದೇವೆ" ಎಂದು ಕಂಪೆನಿಯ ರೋಹಿತ್ ಕಪೂರ್ ಬುಧವಾರ ತಿಳಿಸಿದ್ದಾರೆ.

ಕೆಲವು ಸಿಬ್ಬಂದಿಯನ್ನು ನಿಯಮಿತ ಸವಲತ್ತಿನೊಂದಿಗೆ ಮೇ 4ನೇ ತಾರೀಕಿನಿಂದ ಆಗಸ್ಟ್ ತನಕ ರಜಾ ಮೇಲೆ ಕಳಿಸಲಿದ್ದೇವೆ ಎಂದು ಕಪೂರ್ ಮಾಹಿತಿ ನೀಡಿದ್ದಾರೆ. ಆದರೆ ಈ ಆಂತರಿಕ ಸುತ್ತೋಲೆಯ ಬಗ್ಗೆ ಪ್ರತಿಕ್ರಿಯೆ ನೀಡಲು ಕೇಳಿರುವುದಕ್ಕೆ ತಕ್ಷಣಕ್ಕೆ ಯಾವುದೇ ಉತ್ತರವನ್ನು OYO ನೀಡಿಲ್ಲ.