ಈ ಋತುವಿನಲ್ಲಿ ಸಕ್ಕರೆ ಉತ್ಪಾದನೆ ಶೇ. 24 ರಷ್ಟು ಹೆಚ್ಚಳ: 25 ಲಕ್ಷ ಟನ್‌ಗೆ ರಫ್ತು ಒಪ್ಪಂದ

ಅಕ್ಟೋಬರ್‌ 1 ರಿಂದ ನವೆಂಬರ್‌ 15 ರ ಅವಧಿಯಲ್ಲಿ ಭಾರತದ ಸಕ್ಕರೆ ಉತ್ಪಾದನೆಯು ಶೇಕಡ 24 ರಷ್ಟು ಏರಿಕೆ ಆಗಿದೆ. ಅಂದರೆ ಅಕ್ಟೋಬರ್‌ 1 ರಿಂದ ನವೆಂಬರ್‌ 15 ರ ಅವಧಿಯಲ್ಲಿ ಭಾರತದಲ್ಲಿ 20.9 ಲಕ್ಷ ಟನ್‌ ಸಕ್ಕರೆ ಉತ್ಪಾದನೆ ಆಗಿದೆ.

ಸಕ್ಕರೆ ಮಾರುಕಟ್ಟೆಯು ವರ್ಷದಿಂದ ವರ್ಷಕ್ಕೆ ಅಕ್ಟೋಬರ್‌ನಿಂದ ಸೆಪ್ಟೆಂಬರ್‌ವರೆಗೆ ಇರುತ್ತದೆ. ಈ ಬಾರಿ ಕರ್ನಾಟಕ ಹಾಗೂ ಮಹಾರಾಷ್ಟ್ರದಿಂದ ಅಧಿಕ ಸಕ್ಕರೆ ಉತ್ಪಾದನೆ ಆದ ಕಾರಣದಿಂದಾಗಿ ದೇಶದಲ್ಲಿ ಒಟ್ಟು 20.9 ಲಕ್ಷ ಟನ್‌ ಉತ್ಪಾದನೆ ಆಗಿದೆ. ಅಂದರೆ ಸಕ್ಕರೆ ಉತ್ಪಾದನೆಯು ಶೇಕಡ 24 ರಷ್ಟು ಏರಿಕೆ ಕಂಡಿದೆ. ಆದರೆ "ಕಾರ್ಖಾನೆಗಳು ಮಾತ್ರ ಈವರೆಗೆ ಒಟ್ಟು 25 ಲಕ್ಷ ಟನ್ ಸಕ್ಕರೆಯನ್ನು ರಫ್ತು ಮಾಡುವ ಒಪ್ಪಂದವನ್ನು ಮಾಡಿಕೊಂಡಿದೆ," ಎಂದು ಉದ್ಯಮ ಸಂಸ್ಥೆ ಐಎಸ್‌ಎಂಎ ತಿಳಿಸಿದೆ.

ಈ ಬಗ್ಗೆ ಹೇಳಿಕೆ ನೀಡಿರುವ ಭಾರತೀಯ ಸಕ್ಕರೆ ಕಾರ್ಖಾನೆಗಳ ಸಂಘ (ಐಎಸ್‌ಎಂಎ), "2021 ರ ನವೆಂಬರ್‌ 15 ರವರೆಗೆ 2021-22 ಋತುವಿನ ಸಕ್ಕರೆ ಉತ್ಪಾದನೆಯು 20.90 ಲಕ್ಷ ಟನ್‌ ಆಗಿದೆ. ಕಳೆದ ವರ್ಷ 2020 ರ ನವೆಂಬರ್‌ 15 ರವರೆಗೆ ಒಟ್ಟು 16.82 ಲಕ್ಷ ಸಕ್ಕರೆಯನ್ನು ಉತ್ಪಾದನೆ ಮಾಡಲಾಗಿತ್ತು," ಎಂದು ಮಾಹಿತಿ ನೀಡಿದೆ.

ಸಕ್ಕರೆ ಉತ್ಪಾದನೆ ಅಧಿಕವಾಗಲು ಕಾರಣವೇನು?

ಇನ್ನು ಈ ಬಾರಿ ಸಕ್ಕರೆ ಉತ್ಪಾದನೆ ಅಧಿಕ ಆಗಲು ಕಾರಣ ಏನು ಎಂಬುವುದನ್ನು ಕೂಡಾ ಭಾರತೀಯ ಸಕ್ಕರೆ ಕಾರ್ಖಾನೆಗಳ ಸಂಘ ಹೇಳಿಕೆಯಲ್ಲಿ ತಿಳಿಸಿದೆ. "ಈ ಋತುವಿನಲ್ಲಿ ದಕ್ಷಿಣ ಮತ್ತು ಪಶ್ಚಿಮದಲ್ಲಿ ಹಲವಾರು ಸಕ್ಕರೆ ಕಾರ್ಖಾನೆಗಳು ಎಂದಿಗಿಂತಲೂ ಶೀಘ್ರವೇ ಸಕ್ಕರೆ ಉತ್ಪಾದನೆಯನ್ನು ಆರಂಭ ಮಾಡಿದೆ. ಆದರಿಂದಾಗಿ ಈ ಬಾರಿ ಸಕ್ಕರೆ ಉತ್ಪಾದನೆಯೂ ಅಧಿಕವಾಗಿದೆ," ಎಂದು ಭಾರತೀಯ ಸಕ್ಕರೆ ಕಾರ್ಖಾನೆಗಳ ಸಂಘ (ಐಎಸ್‌ಎಂಎ) ತನ್ನ ಪತ್ರಿಕಾ ಹೇಳಿಕೆಯಲ್ಲಿ ಉಲ್ಲೇಖ ಮಾಡಿದೆ.

ಉತ್ತರ ಪ್ರದೇಶದಲ್ಲಿ ಸಕ್ಕರೆ ಉತ್ಪಾದನೆ ಕುಸಿತ

ಇನ್ನು ಈ ಋತುವಿನಲ್ಲಿ ದೇಶದಲ್ಲಿ ಸಕ್ಕರೆ ಉತ್ಪಾದನೆ ಹೆಚ್ಚಳವಾಗಿದ್ದರೂ ಕೂಡಾ ಉತ್ತರ ಪ್ರದೇಶ ರಾಜ್ಯದಲ್ಲಿ ಸಕ್ಕರೆ ಉತ್ಪಾದನೆಯು ಕುಸಿತ ಕಂಡಿದೆ. ಉತ್ತರ ಪ್ರದೇಶದಲ್ಲಿ ಅಕ್ಟೋಬರ್ ಮೂರನೇ ವಾರದಲ್ಲಿ ಅಕಾಲಿಕ ಮಳೆ ಸುರಿಯಲು ಆರಂಭವಾದ ಹಿನ್ನೆಲೆಯಿಂದಾಗಿ ಈ ಋತುವಿನ ಸಕ್ಕರೆ ಉತ್ಪಾದನೆಯು ಕೆಲವು ದಿನಗಳು ವಿಳಂಬವಾಗಿದೆ. ಉತ್ತರ ಪ್ರದೇಶ ರಾಜ್ಯದಲ್ಲಿ ಸಕ್ಕರೆ ಉತ್ಪಾದನೆಯು 2.88 ಲಕ್ಷ ಟನ್‌ ಆಗಿದೆ. ಕಳೆದ ಋತುವಿನಲ್ಲಿ ಉತ್ತರ ಪ್ರದೇಶದಲ್ಲಿ 4 ಲಕ್ಷ ಟನ್‌ ಸಕ್ಕರೆ ಉತ್ಪಾದನೆ ಆಗಿತ್ತು. ಆದರೆ ಈ ಬಾರಿ ಸಕ್ಕರೆ ಉತ್ಪಾದನೆಯು 2.88 ಲಕ್ಷ ಟನ್‌ಗೆ ಕುಸಿತ ಕಂಡಿದೆ.

ಕರ್ನಾಟಕ, ಮಹಾರಾಷ್ಟ್ರದಲ್ಲಿ ಎಷ್ಟು ಸಕ್ಕರೆ ಉತ್ಪಾದನೆ?

ಉತ್ತರ ಪ್ರದೇಶದಲ್ಲಿ ಸಕ್ಕರೆ ಉತ್ಪಾದನೆಯು ಕಡಿಮೆ ಆದರೂ ಕೂಡಾ ಮಹಾರಾಷ್ಟ್ರ ಹಾಗೂ ಕರ್ನಾಟಕ ರಾಜ್ಯದಲ್ಲಿ ಸಕ್ಕರೆ ಉತ್ಪಾದನೆಯು ಅಧಿಕವಾಗಿದೆ. ಮಹಾರಾಷ್ಟ್ರದಲ್ಲಿ ಕಳೆದ ವರ್ಷ ಆರು ಲಕ್ಷ ಟನ್‌ ಸಕ್ಕರೆಯನ್ನು ಉತ್ಪಾದನೆ ಮಾಡಲಾಗಿತ್ತು. ಆದರೆ ಈ ಬಾರಿ 8.91 ಲಕ್ಷ ಟನ್‌ ಸಕ್ಕರೆಯನ್ನು ಉತ್ಪಾದನೆ ಮಾಡಲಾಗಿದೆ. ಇನ್ನು ಕರ್ನಾಟಕದಲ್ಲಿ ಕಳೆದ ವರ್ಷ 5.66 ಲಕ್ಷ ಟನ್‌ ಸಕ್ಕರೆಯನ್ನು ಉತ್ಪಾದನೆ ಮಾಡಲಾಗಿತ್ತು. ಆದರೆ ಈ ಬಾರಿ ನವೆಂಬರ್‌ 15 ರವರೆಗೆ 7.62 ಲಕ್ಷ ಟನ್‌ ಸಕ್ಕರೆಯನ್ನು ಉತ್ಪಾದನೆ ಮಾಡಲಾಗಿದೆ.

25 ಲಕ್ಷ ಟನ್‌ ಸಕ್ಕರೆ ರಫ್ತಿಗೆ ಒಪ್ಪಂದ

ಇನ್ನು ಈ ನಡುವೆ ಭಾರತವು 25 ಲಕ್ಷ ಟನ್‌ ಸಕ್ಕರೆಯನ್ನು ರಫ್ತು ಮಾಡುವ ಒಪ್ಪಂದವನ್ನು ಮಾಡಿಕೊಂಡಿದೆ. ಬಂದರು ಮಾಹಿತಿ ಮತ್ತು ಮಾರುಕಟ್ಟೆ ವರದಿಗಳ ಪ್ರಕಾರ, ಈಗಾಗಲೇ ಸುಮಾರು 25 ಲಕ್ಷ ಟನ್‌ಗಳಷ್ಟು ಸಕ್ಕರೆ ರಫ್ತಿಗೆ ಒಪ್ಪಂದವನ್ನು ಮಾಡಿಕೊಳ್ಳಲಾಗಿದೆ ಎಂದು ಐಎಸ್‌ಎಂಎ ಹೇಳಿದೆ. ಈ ಪೈಕಿ 2.7 ಲಕ್ಷ ಟನ್‌ ಸಕ್ಕರೆಯನ್ನು ದೇಶದಿಂದ ಹೊರಕ್ಕೆ ರಫ್ತು ಮಾಡಲಾಗುತ್ತದೆ. ಕಳೆದ ವರ್ಷ ಈ ತಿಂಗಳಿನಲ್ಲಿ 1.96 ಲಕ್ಷ ಟನ್‌ ಸಕ್ಕರೆಯನ್ನು ರಫ್ತು ಮಾಡಲಾಗಿತ್ತು. ನವೆಂಬರ್‌ 2021 ರವರೆಗೆ ಎರಡು ಲಕ್ಷಕ್ಕೂ ಅಧಿಕ ಸಕ್ಕರೆಯನ್ನು ಉತ್ಪಾದನೆ ಮಾಡಲಾಗುತ್ತಿದೆ.