ಸ್ಟಾರ್ಟ್‌ಅಪ್‌ ಆರಂಭಿಸಬೇಕೇ, ಫಂಡಿಂಗ್ ಮಾಡುವುದು ಹೇಗೆ?

ನೀವು ಭಾರತದಲ್ಲಿ ವ್ಯಾಪಾರ ಅಥವಾ ಸ್ಟಾರ್ಟ್ಅಪ್ ಅನ್ನು ಪ್ರಾರಂಭಿಸಲು ಯೋಚಿಸುತ್ತಿದ್ದರೆ ಈಗ ಸಮಯ ಬಂದಿದೆ. ಈಗ ಭಾರತದಲ್ಲಿ ಹೆಚ್ಚಾಗಿ ಸ್ಟಾರ್ಟ್‌ಅಪ್‌ಗಳು ಆರಂಭವಾಗುತ್ತಿದೆ. ಯುವಕರು ಸ್ಟಾರ್ಟ್ಅಪ್‌ನತ್ತ ಮುಖಮಾಡುತ್ತಿದ್ದಾರೆ. ಇಡೀ ಪರಿಸರವು ಇಂದಿನ ದಿನಗಳಲ್ಲಿ ಉದ್ಯಮದ ಪರವಾಗಿದೆ.

ಪ್ರಸ್ತುತ ವಾತಾವರಣವು ಯುವ ಮನಸ್ಸುಗಳು, ಅವರ ಅದ್ಭುತ ಆಲೋಚನೆಗಳನ್ನು ಬೆಂಬಲಿಸುತ್ತದೆ. ನಾವು ಯಾವುದೇ ವ್ಯವಹಾರವನ್ನು ಪ್ರಾರಂಭ ಮಾಡುವುದು ನಾವು ಅಂದುಕೊಂಡಷ್ಟು ಸುಲಭವೇನಲ್ಲ. ವ್ಯವಹಾರ ಆರಂಭ ಮಾಡುವುದಕ್ಕೂ ಮುನ್ನ ಹಲವಾರು ತಯಾರಿಗಳನ್ನು ಮಾಡಿಕೊಳ್ಳಬೇಕಾಗುತ್ತದೆ. ನಮ್ಮಲ್ಲಿ ಇರುವ ಯಾವುದೇ ವ್ಯವಹಾರದ ಪ್ಲ್ಯಾನ್ ಅನ್ನು ನಾವು ಸರಿಯಾದ ರೀತಿಯಲ್ಲಿ ಯಶಸ್ವಿಯಾಗಿ ಜಾರಿಗೆ ತರಬೇಕಾದರೆ ಅದಕ್ಕೆ ಮುಖ್ಯವಾಗಿ ಬೇಕಾಗಿರುವುದು ಹಣ ಅಥವಾ ಬಂಡವಾಳವಾಗಿದೆ.

ಯಾವುದೇ ರೀತಿಯ ವ್ಯವಹಾರವನ್ನು ಪ್ರಾರಂಭಿಸಲು, ಅದು ಸ್ಟಾರ್ಟ್ಅಪ್ ಆಗಿರಲಿ, ದೊಡ್ಡ ಕಂಪನಿಯಾಗಿರಲಿ ಬಂಡವಾಳ ಹೂಡಿಕೆ ಅಥವಾ ನಿಧಿಯ ಅಗತ್ಯವಿರುತ್ತದೆ. ಈ ಆಧುನಿಕ ವ್ಯಾಪಾರ ಪರಿಸರ ವ್ಯವಸ್ಥೆಯಲ್ಲಿ ವ್ಯಾಪಾರ ಅಥವಾ ಸ್ಟಾರ್ಟ್‌ಅಪ್‌ ಪ್ರಾರಂಭ ಮಾಡಲು ಹಣವು ಮೂಲಭೂತವಾಗಿದೆ. ಭಾರತದಲ್ಲಿ ನಿಮ್ಮ ಸ್ಟಾರ್ಟ್‌ಅಪ್‌ ಅನ್ನು ಆರಂಭ ಮಾಡಲು ಹಣವನ್ನು ಸಂಗ್ರಹ ಮಾಡುವುದು ದೊಡ್ಡ ಸವಾಲಿನ ವಿಷಯವಾಗಿದೆ. ಹಾಗಾದರೆ ನೀವು ಭಾರತದಲ್ಲಿ ಸ್ಟಾರ್ಟ್‌ಅಪ್‌ಗೆ ಹಣವನ್ನು ಹೇಗೆ ಸಂಗ್ರಹ ಮಾಡಬಹುದು ಎಂಬುವುದಕ್ಕೆ ನಾವು ಇಲ್ಲಿ ತಿಳಿಸಿದ್ದೇವೆ ಮುಂದೆ ಓದಿ...

ಕ್ರೌಡ್ ಫಂಡಿಂಗ್ ಮಾಡಿ

ಭಾರತದಲ್ಲಿ ನಿಮ್ಮ ಸ್ಟಾರ್ಟ್‌ಅಪ್ ಕಲ್ಪನೆಗಾಗಿ ನೀವು ಹಣವನ್ನು ಪಡೆಯಬೇಕಾದ ಮೊದಲ ಆಯ್ಕೆಯೆಂದರೆ ಕ್ರೌಡ್‌ಫಂಡಿಂಗ್. ನೀವು ಸ್ಟಾರ್ಟ್‌ಅಪ್‌ಗೆ ಸಹಾಯ ಮಾಡಲು ಬಯಸುವ ಹಲವಾರು ವೇದಿಕೆಗಳ ಮೂಲಕ ಬಹು ಹೂಡಿಕೆದಾರರಿಂದ ಹಣವನ್ನು ಪಡೆಯುವುದು ಕ್ರೌಡ್ ಫಂಡಿಂಗ್ ಆಗಿದೆ. ಕ್ರೌಡ್‌ಫಂಡಿಂಗ್‌ನಲ್ಲಿ, ಬಹು ಹೂಡಿಕೆದಾರರು ತೊಡಗಿಸಿಕೊಂಡಿದ್ದಾರೆ. ಹೂಡಿಕೆದಾರರು ನಿಮ್ಮ ಆಲೋಚನೆಯನ್ನು ಎಷ್ಟು ಇಷ್ಟಪಡುತ್ತಾರೆ ಎಂಬ ಆಧಾರದ ಮೇಲೆ ನಿಮ್ಮ ಸ್ಟಾರ್ಟ್ಅಪ್ ಯೋಜನೆಗೆ ಧನಸಹಾಯವು ನಿರ್ಧರಿಯತವಾಗಲಿದೆ.

ಸೆಲ್ಫ್ ಫಿನಾನ್ಸಿಂಗ್ ಕೂಡಾ ಉತ್ತಮ

ಸ್ಟಾರ್ಟ್‌ಅಪ್‌ಗೆ ಹಣ ಹೂಡಿಕೆ ಮಾಡುವ ಉತ್ತಮ ಆಯ್ಕೆ ಬಗ್ಗೆ ನಾವು ಮಾತನಾಡುವುದಾದರೆ ಅದು ನಿಸ್ಸಂದೇಹವಾಗಿ ಅದು ಸ್ವಯಂ-ಹಣಕಾಸು ಆಗಿರುತ್ತದೆ. ಸಂಪನ್ಮೂಲಗಳನ್ನು ಹೊಂದಿರುವ ಅನೇಕ ವ್ಯಕ್ತಿಗಳು ಮತ್ತು ಉದ್ಯಮಿಗಳು ಇತರ ಮೂಲಗಳ ಮೇಲೆ ಅವಲಂಬಿತರಾಗುವ ಬದಲು ತಮ್ಮ ಹಣವನ್ನೇ ಅದಕ್ಕೆ ಹೂಡಿಕೆ ಮಾಡಬಹುದು. ಸಾಲವನ್ನು ಕೇಳಿದಾಗ ಅಥವಾ ನಿಮ್ಮ ಸ್ಟಾರ್ಟ್‌ಅಪ್‌ಗೆ ನಿಧಿಯನ್ನು ನೀಡಲು ಸರ್ಕಾರಿ ಘಟಕವನ್ನು ಸಂಪರ್ಕಿಸಿದಾಗ, ಹಲವಾರು ಅಡೆತಡೆಗಳು ಉಂಡಾಗುತ್ತದೆ. ಅದಕ್ಕಿಂತ ನೀವು ನಿಮ್ಮಲ್ಲಿ ಇರುವ ಹಣವನ್ನೇ ಹೂಡಿಕೆ ಮಾಡುವುದು ಉತ್ತಮವಾಗಿದೆ. ನೀವು ಸಾಕಷ್ಟು ಉಳಿತಾಯವನ್ನು ಹೊಂದಿದ್ದರೆ, ಅದನ್ನೇ ಹೂಡಿಕೆ ಮಾಡುವುದು ಉತ್ತಮ.

ಸಾರ್ವಜನಿಕ ಮತ್ತು ಖಾಸಗಿ ವಲಯದ ಬ್ಯಾಂಕ್‌ಗಳಿಂದ ಸಾಲಗಳು

ಉದ್ಯಮಿಗಳು ತಮ್ಮ ಸ್ಟಾರ್ಟ್‌ಅಪ್‌ ಯೋಜನೆಗಳಿಗೆ ಹಣವನ್ನು ಪಡೆಯಲು ಸಾರ್ವಜನಿಕ ಮತ್ತು ಖಾಸಗಿ ವಲಯದ ಬ್ಯಾಂಕುಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಇತರ ವಿಧಾನಗಳಿಗೆ ಹೋಲಿಸಿದರೆ ಸಾಲಗಳು ಮತ್ತು ಹಣವನ್ನು ಪಡೆಯುವ ವಿಶ್ವಾಸಾರ್ಹ ಮತ್ತು ಅನುಕೂಲಕರ ಮಾರ್ಗವೆಂದು ಪರಿಗಣಿಸಲಾಗುತ್ತದೆ. ಭಾರತದಲ್ಲಿ, ಸಾರ್ವಜನಿಕ ಮತ್ತು ಖಾಸಗಿ ವಲಯದ ಬ್ಯಾಂಕ್‌ಗಳು ಸ್ಟಾರ್ಟ್‌ಅಪ್‌ಗಳಿಗೆ ಎರಡು ರೂಪಗಳಲ್ಲಿ ಸಾಲವನ್ನು ನೀಡುತ್ತವೆ. ಟರ್ಮ್ ಲೋನ್ ಹಾಗೂ ವರ್ಕಿಂಗ್ ಕ್ಯಾಪಿಟಲ್ ಲೋನ್ ಈ ಎರಡು ವಿಧಾನವಾಗಿದೆ. ಖಾಸಗಿ ಮತ್ತು ಸಾರ್ವಜನಿಕ ವಲಯದ ಬ್ಯಾಂಕ್‌ಗಳು ಸೇರಿದಂತೆ ಬಹುತೇಕ ಎಲ್ಲಾ ಬ್ಯಾಂಕ್‌ಗಳು ಸ್ಟಾರ್ಟ್‌ಅಪ್ ಐಡಿಯಾಗಳಿಗೆ ಹಣ ನೀಡಲು ವ್ಯಾಪಾರ ಸಾಲಗಳನ್ನು ನೀಡುತ್ತವೆ. ಆದರೆ ಬಡ್ಡಿ ದರ, ಸಾಲದ ಮೊತ್ತ, ಮರುಪಾವತಿ ಅವಧಿ ಇತ್ಯಾದಿಗಳ ನಡುವೆ ವ್ಯತ್ಯಾಸಗಳಿವೆ.

ಭಾರತ ಸರ್ಕಾರದಿಂದ ಸಾಲ ಯೋಜನೆಗಳು

ಇತ್ತೀಚೆಗೆ, ಭಾರತ ಸರ್ಕಾರವು ತಮ್ಮ ಆಲೋಚನೆಗಳನ್ನು ವಾಸ್ತವಕ್ಕೆ ತರಲು ಬಯಸುವ ಸ್ಟಾರ್ಟಪ್‌ಗಳಿಗೆ ಮತ್ತು ಇತರ ಉದ್ಯಮಿಗಳನ್ನು ಬೆಂಬಲಿಸಲು ವಿವಿಧ ಸಾಲ ಯೋಜನೆಗಳನ್ನು ಘೋಷಿಸಿದೆ. ಭಾರತ ಸರ್ಕಾರವು ಪ್ರಾರಂಭಿಸಿದ ವಿವಿಧ ಸಾಲ ಯೋಜನೆಗಳಲ್ಲಿ ಮುದ್ರಾ ಸಾಲ ಯೋಜನೆ, ಸ್ಟ್ಯಾಂಡ್-ಅಪ್ ಇಂಡಿಯಾ ಯೋಜನೆ, ಮೈಕ್ರೋ ಮತ್ತು ಸಣ್ಣ ಉದ್ಯಮಗಳಿಗೆ ಕ್ರೆಡಿಟ್ ಗ್ಯಾರಂಟಿ ಫಂಡ್ ಯೋಜನೆ, ರಾಷ್ಟ್ರೀಯ ಸಣ್ಣ ಕೈಗಾರಿಕೆಗಳ ನಿಗಮದ ಸಬ್ಸಿಡಿ, ತಂತ್ರಜ್ಞಾನದ ಉನ್ನತೀಕರಣಕ್ಕಾಗಿ ಕ್ರೆಡಿಟ್ ಲಿಂಕ್ ಕ್ಯಾಪಿಟಲ್ ಸಬ್ಸಿಡಿ ಯೋಜನೆ, ಮತ್ತು ವಿವಿಧ ಇತರ ಯೋಜನೆಗಳು ಇದೆ.

ಏಂಜೆಲ್ ಹೂಡಿಕೆ: ಏನಿದು?

ನಿಮ್ಮ ಸ್ಟಾರ್ಟ್‌ಅಪ್‌ಗೆ ಹಣವನ್ನು ಪಡೆಯುವ ಇನ್ನೊಂದು ವಿಧಾನವೆಂದರೆ ಹೆಚ್ಚುವರಿ ನಗದು ಹೊಂದಿರುವ ವ್ಯಕ್ತಿಗಳಾಗಿರುವ ಏಂಜೆಲ್ ಹೂಡಿಕೆದಾರರ ಮೂಲಕ ಹಣವನ್ನು ಪಡೆಯುವುದು. ಏಂಜೆಲ್ ಹೂಡಿಕೆದಾರರು ಭರವಸೆಯ ಸ್ಟಾರ್ಟ್‌ಅಪ್‌ಗಳಲ್ಲಿ ಹೂಡಿಕೆ ಮಾಡುತ್ತಾರೆ ಮತ್ತು ಸ್ಟಾರ್ಟ್‌ಅಪ್‌ಗಳು ತಮ್ಮ ಸಾಮರ್ಥ್ಯವನ್ನು ತಲುಪಿದ ನಂತರ, ಅವರು ಅದರಲ್ಲಿ ಪಾಲನ್ನು ಪಡೆಯುತ್ತಾರೆ. ನಾವು ಬ್ಯಾಂಕ್, ಇತರೆ ಮೂಲಗಳಿಂದ ಸಾಲ ಪಡೆಯುವುದಕ್ಕಿಂತ ಏಂಜೆಲ್ ಹೂಡಿಕೆಯಲ್ಲಿ ಸಾಲವನ್ನು ಪಡೆಯುವುದು ಹೆಚ್ಚು ಅಪಾಯಕಾರಿಯಾಗಿದೆ. ಏಕೆಂದರೆ ಏಂಜೆಲ್ ಹೂಡಿಕೆದಾರರು ಹೆಚ್ಚಿನ ಲಾಭದ ಆದಾಯಕ್ಕಾಗಿ ಮಾತ್ರ ಹೂಡಿಕೆ ಮಾಡುತ್ತಾರೆ. ಹಣಕಾಸು ಸಂಸ್ಥೆಗಳಿಗೆ ಹೋಲಿಸಿದರೆ ಹೂಡಿಕೆಗಳು ಕಡಿಮೆ ಆದರೆ ಗೂಗಲ್, ಅಲಿಬಾಬಾ ಮತ್ತು ಯಾಹೂ ಕಂಪನಿಗಳು ಎಲ್ಲಾ ಏಂಜಲ್ ಹೂಡಿಕೆಯ ಫಲಿತಾಂಶವಾಗಿದೆ. ಭಾರತದಲ್ಲಿ, ಜನಪ್ರಿಯ ಏಂಜೆಲ್ ಹೂಡಿಕೆದಾರರು ಮುಂಬೈ ಏಂಜಲ್ಸ್, ಹೈದರಾಬಾದ್ ಏಂಜಲ್ಸ್ ಮತ್ತು ಇಂಡಿಯನ್ ಏಂಜಲ್ ನೆಟ್‌ವರ್ಕ್‌ನಂತಹ ಕಂಪನಿಗಳನ್ನು ಒಳಗೊಂಡಿದ್ದಾರೆ.