39 ಲಕ್ಷ ಟಿಕೆಟ್ ರದ್ದು ಮಾಡಲು ಭಾರತೀಯ ರೈಲ್ವೆ ಸಿದ್ಧತೆ

ಕೊರೊನಾದ ಕಾರಣಕ್ಕೆ ದೇಶದಾದ್ಯಂತ ಲಾಕ್ ಡೌನ್ ಅವಧಿಯನ್ನು ಮಂಗಳವಾರ ವಿಸ್ತರಿಸಿದ ಹಿನ್ನೆಲೆಯಲ್ಲಿ ಏಪ್ರಿಲ್ 15ರಿಂದ ಮೇ 3ರ ತನಕ ಬುಕ್ ಮಾಡಿದ್ದ 39 ಲಕ್ಷ ಟಿಕೆಟ್ ಅನ್ನು ರದ್ದು ಮಾಡಲು ಸಿದ್ಧತೆ ನಡೆಸಿದೆ. ಏಪ್ರಿಲ್ 14ನೇ ತಾರೀಕಿನ ನಂತರ ಪ್ರಯಾಣ ಮಾಡುವುದಕ್ಕೆ ಟಿಕೆಟ್ ಬುಕಿಂಗ್ ಗೆ ಲಾಕ್ ಡೌನ್ ಅವಧಿಯಲ್ಲಿ ರೈಲ್ವೆ ಇಲಾಖೆ ಅವಕಾಶ ಮಾಡಿಕೊಟ್ಟಿತ್ತು. ಲಾಕ್ ಡೌನ್ ನಂತರ ರೈಲುಗಳು ಕಾರ್ಯಾರಂಭ ಮಾಡಬಹುದು ಎಂದು ಪ್ರಯಾಣಿಕರು ಟಿಕೆಟ್ ಬುಕ್ ಮಾಡಿದ್ದರು.

ಆದರೆ, ಮಂಗಳವಾರದಂದು (ಏಪ್ರಿಲ್ 14) ಪ್ರಧಾನಿ ನರೇಂದ್ರ ಮೋದಿ ಅವರು ಲಾಕ್ ಡೌನ್ ಅವಧಿ ವಿಸ್ತರಣೆ ಮಾಡಿದ್ದಾರೆ. ಆ ಕಾರಣಕ್ಕೆ ರೈಲ್ವೆ ಇಲಾಖೆಯಿಂದ ಪ್ರಯಾಣಿಕರ ಎಲ್ಲ ಸೇವೆಯನ್ನು ಮೇ 3ನೇ ತಾರೀಕಿನ ತನಕ ನಿಲ್ಲಿಸಿದೆ. ಜತೆಗೆ ಮುಂಗಡ ಬುಕಿಂಗ್ ಕೂಡ ತೆಗೆದುಕೊಳ್ಳುತ್ತಿಲ್ಲ.

ರದ್ದು ಆಗಿರುವ ಎಲ್ಲ ರೈಲುಗಳಿಗೆ ಬುಕ್ ಮಾಡಿದ್ದ ಟಿಕೆಟ್ ನ ಹಣ ಮರುಪಾವತಿ ಆಗಲಿದೆ. ಜತೆಗೆ ಮುಂಚಿತವಾಗಿ ರೈಲು ಟಿಕೆಟ್ ಬುಕ್ ಮಾಡಿದವರಿಗೂ ಹಣ ಹಿಂತಿರುಗಿಸಲಾಗುತ್ತಿದೆ. ಆನ್ ಲೈನ್ ಗ್ರಾಹಕರಿಗೆ ಪೂರ್ತಿ ಮರುಪಾವತಿ ತಾನಾಗಿಯೇ ಮಾಡಲಾಗುತ್ತದೆ. ಕೌಂಟರ್ ಗಳಲ್ಲಿ ಟಿಕೆಟ್ ಬುಕ್ ಮಾಡಿದವರು ಜುಲೈ 31ನೇ ತಾರೀಕಿನ ತನಕ ಮರುಪಾವತಿ ಪಡೆಯಬಹುದು.