Credit Score: ಸಾಲ ಪಡೆಯಲಷ್ಟೇ ಅಲ್ಲ, ಬ್ಯಾಂಕ್ ಉದ್ಯೋಗಕ್ಕೂ ಬೇಕಿದೆ ಕ್ರೆಡಿಟ್ ಸ್ಕೋರ್; ಈ ಬಗ್ಗೆ ತಿಳಿಯಿರಿ

ಬಹುತೇಕ ಜನರು ಕ್ರೆಡಿಟ್ ಸ್ಕೋರ್ ಅಂದರೆ ಅದು ಕೇವಲ ಸಾಲ ಪಡೆಯಲು ಅಥವಾ ಕ್ರೆಡಿಟ್ ಕಾರ್ಡ್ ತೆಗೆದುಕೊಳ್ಳಲು ಮಾತ್ರ ಬೇಕು ಎಂದು ಭಾವಿಸುತ್ತಾರೆ. ಆದರೆ ಈಗ ಬ್ಯಾಂಕ್ ಉದ್ಯೋಗ ಪಡೆಯುವವರಿಗೂ ಇದು ಕೆಲವು ಮಟ್ಟಿಗೆ ಮಹತ್ವ ಹೊಂದಿದೆ ಎಂಬುದು ಬೆಳಕಿಗೆ ಬಂದಿದೆ. ರಾಜ್ಯಸಭೆಯಲ್ಲಿ ಕೇಳಲಾದ ಪ್ರಶ್ನೆಗೆ ಸರ್ಕಾರ ನೀಡಿದ ಉತ್ತರದ ಪ್ರಕಾರ, ಸಾರ್ವಜನಿಕ ವಲಯದ ಬ್ಯಾಂಕುಗಳಲ್ಲಿ ನೇಮಕಾತಿ ಸಮಯದಲ್ಲಿ ಅಭ್ಯರ್ಥಿಗಳ ಕ್ರೆಡಿಟ್ ಇತಿಹಾಸವನ್ನೂ ಪರಿಗಣಿಸಲಾಗುತ್ತದೆ.

ಹಣಕಾಸು ಸಚಿವಾಲಯದ ರಾಜ್ಯ ಸಚಿವ ಪಂಕಜ್ ಚೌಧರಿ ನೀಡಿದ ಉತ್ತರದಲ್ಲಿ, ಐಬಿಪಿಎಸ್ ಮೂಲಕ ಆಯ್ಕೆಯಾದ ಅಭ್ಯರ್ಥಿಗಳು ಬ್ಯಾಂಕ್‌ನಲ್ಲಿ ಸೇರುವ ವೇಳೆಗೆ "ಆರೋಗ್ಯಕರ ಕ್ರೆಡಿಟ್ ಇತಿಹಾಸ" ಹೊಂದಿರಬೇಕು ಎಂದು ತಿಳಿಸಲಾಗಿದೆ. ಆದರೆ ಇದು ಅರ್ಜಿ ಸಲ್ಲಿಸಲು ಮುಂಚಿನ ಕಡ್ಡಾಯ ಷರತ್ತು ಅಲ್ಲ ಎಂದು ಕೂಡ ಸ್ಪಷ್ಟಪಡಿಸಲಾಗಿದೆ. ಅಂದರೆ, ಕ್ರೆಡಿಟ್ ಸ್ಕೋರ್ ಇಲ್ಲದಿದ್ದರೂ ಅಭ್ಯರ್ಥಿ ಪರೀಕ್ಷೆಗೆ ಅರ್ಜಿ ಹಾಕಬಹುದು, ಆಯ್ಕೆಯಾದರೂ ಕೂಡಬಹುದು. ಆದರೆ ಅಂತಿಮ ನೇಮಕಾತಿಯ ಹಂತದಲ್ಲಿ ಬ್ಯಾಂಕುಗಳು ಈ ವಿಚಾರವನ್ನು ಪರಿಶೀಲಿಸಬಹುದು.

ಇಲ್ಲಿ ಗಮನಿಸಬೇಕಾದ ಮುಖ್ಯ ವಿಷಯವೆಂದರೆ, ಐಬಿಪಿಎಸ್ ಕೇವಲ ಪರೀಕ್ಷೆ ಮತ್ತು ಆಯ್ಕೆ ಪ್ರಕ್ರಿಯೆಯನ್ನು ನಡೆಸುವ ಸಂಸ್ಥೆ ಮಾತ್ರ. ಅಭ್ಯರ್ಥಿಯ ಕ್ರೆಡಿಟ್ ಪ್ರೊಫೈಲ್ ಒಪ್ಪಿಕೊಳ್ಳಬೇಕೇ ಬೇಡವೇ ಎಂಬ ಅಂತಿಮ ತೀರ್ಮಾನವನ್ನು ಸಂಬಂಧಿಸಿದ ಬ್ಯಾಂಕ್‌ವೇ ತೆಗೆದುಕೊಳ್ಳುತ್ತದೆ. ಪ್ರತಿ ಬ್ಯಾಂಕ್ ತನ್ನದೇ ಆದ ಒಳಗಿನ ನಿಯಮ ಮತ್ತು ಮಾನದಂಡಗಳನ್ನು ಅನುಸರಿಸುತ್ತದೆ. ಕನಿಷ್ಠ ಎಷ್ಟು ಕ್ರೆಡಿಟ್ ಸ್ಕೋರ್ ಬೇಕು ಎಂಬುದೂ ಬ್ಯಾಂಕ್‌ನ ನೀತಿಗನುಸಾರ ಬದಲಾಗಬಹುದು.

ಬ್ಯಾಂಕುಗಳು ಈ ರೀತಿಯ ಪರಿಶೀಲನೆ ಏಕೆ ಮಾಡುತ್ತವೆ ಎಂಬ ಪ್ರಶ್ನೆಗೆ ಸರ್ಕಾರ ನೀಡಿರುವ ವಿವರಣೆ ಸಹ ಸ್ಪಷ್ಟವಾಗಿದೆ. ಬ್ಯಾಂಕ್ ಉದ್ಯೋಗಿಗಳು ಹಣಕಾಸಿನ ವ್ಯವಹಾರಗಳು, ಸಾಲ ಪ್ರಕ್ರಿಯೆ, ಗ್ರಾಹಕರ ಖಾತೆ ನಿರ್ವಹಣೆ ಹೀಗೆ ಹೊಣೆಗಾರಿಕೆಯ ಕೆಲಸಗಳನ್ನು ಮಾಡುತ್ತಾರೆ. ಇಂತಹ ಕೆಲಸಗಳಲ್ಲಿ ಇರುವವರು ಹಣಕಾಸಿನ ವಿಷಯದಲ್ಲಿ ಜವಾಬ್ದಾರಿಯುತ ವರ್ತನೆ ಹೊಂದಿರಬೇಕು ಎಂಬ ಕಾರಣದಿಂದ ಕ್ರೆಡಿಟ್ ಇತಿಹಾಸವನ್ನು ಗಮನಿಸಲಾಗುತ್ತದೆ. ಸಾರ್ವಜನಿಕರ ಹಣವನ್ನು ನಿಭಾಯಿಸುವ ಉದ್ಯೋಗಿಗಳಲ್ಲಿ ಆರ್ಥಿಕ ಶಿಸ್ತು ಇರಬೇಕು ಎನ್ನುವುದು ಇದರ ಹಿಂದಿನ ಉದ್ದೇಶ.

ಸರಳವಾಗಿ ಹೇಳುವುದಾದರೆ, ಬ್ಯಾಂಕ್‌ಗಳು ಅಭ್ಯರ್ಥಿಯ ಬಳಿ ಸಾಲ ಇದೆಯೇ ಇಲ್ಲವೇ ಎಂಬುದನ್ನು ಮಾತ್ರ ನೋಡುವುದಿಲ್ಲ. ಆ ಸಾಲವನ್ನು ಹೇಗೆ ನಿರ್ವಹಿಸಿದ್ದಾರೆ, ಸಮಯಕ್ಕೆ ಕಂತುಗಳನ್ನು ಕಟ್ಟಿದ್ದಾರೆಯೇ, ಮರುಪಾವತಿ ಇತಿಹಾಸ ಹೇಗಿದೆ ಎಂಬುದನ್ನು ಹೆಚ್ಚು ಮುಖ್ಯವಾಗಿ ಪರಿಗಣಿಸುತ್ತವೆ. ಆದ್ದರಿಂದ ಸಾಲ ಹೊಂದಿರುವುದೇ ಸಮಸ್ಯೆ ಅಲ್ಲ. ಆದರೆ ಡೀಫಾಲ್ಟ್, ವಿಳಂಬ ಪಾವತಿ ಅಥವಾ ಕಳಪೆ ಮರುಪಾವತಿ ದಾಖಲೆ ಇದ್ದರೆ ಅದು ಸಮಸ್ಯೆಯಾಗಬಹುದು.

ಈ ನಿಯಮದಿಂದ ತುಂಬಾ ದೊಡ್ಡ ಮಟ್ಟದಲ್ಲಿ ಅಭ್ಯರ್ಥಿಗಳು ಹಾನಿಗೊಳಗಾಗುತ್ತಿದ್ದಾರೆ ಎಂಬುದಿಲ್ಲ. ಸರ್ಕಾರದ ಮಾಹಿತಿ ಪ್ರಕಾರ, ಕಳೆದ ಮೂರು ವರ್ಷಗಳಲ್ಲಿ CIBIL ಅಥವಾ ಕ್ರೆಡಿಟ್ ಇತಿಹಾಸ ಸಂಬಂಧಿತ ಕಾರಣಗಳಿಂದ ಕೇವಲ 20 ಅಭ್ಯರ್ಥಿಗಳ ನೇಮಕಾತಿ ರದ್ದುಪಡಿಸಲಾಗಿದೆ ಅಥವಾ ಅವರಿಗೆ ನೀಡಿದ್ದ ಅವಕಾಶ ಹಿಂತೆಗೆದುಕೊಳ್ಳಲಾಗಿದೆ. ಇದು ಐಬಿಪಿಎಸ್ ಮೂಲಕ ಆಯ್ಕೆಯಾದ ಒಟ್ಟು ಅಭ್ಯರ್ಥಿಗಳಲ್ಲಿ ಕೇವಲ 0.02 ಶೇಕಡಾ ಮಾತ್ರ. ಇದರಿಂದ ಈ ನಿಯಮ ಇದ್ದರೂ, ಅದನ್ನು ಬಹಳ ವ್ಯಾಪಕವಾಗಿ ತಿರಸ್ಕಾರಕ್ಕೆ ಬಳಸಲಾಗುತ್ತಿಲ್ಲ ಎಂಬುದು ತಿಳಿಯುತ್ತದೆ.

ಶಿಕ್ಷಣ ಸಾಲ ಪಡೆದಿರುವ ವಿದ್ಯಾರ್ಥಿಗಳು ಅಥವಾ ನಿಜವಾದ ಆರ್ಥಿಕ ಕಷ್ಟಗಳನ್ನು ಅನುಭವಿಸಿದವರು ಇದರಿಂದ ಅನ್ಯಾಯಕ್ಕೆ ಒಳಗಾಗಬಹುದೇ ಎಂಬ ಪ್ರಶ್ನೆಯೂ ಸಹಜ. ಈ ಬಗ್ಗೆ ಸರ್ಕಾರ ಸ್ಪಷ್ಟವಾದ ಪ್ರತ್ಯೇಕ ವಿನಾಯಿತಿಗಳನ್ನು ಹೇಳದಿದ್ದರೂ, ಒಟ್ಟಾರೆ ವ್ಯವಸ್ಥೆಯನ್ನು ನೋಡಿದರೆ ಬ್ಯಾಂಕುಗಳು ಪ್ರತಿ ಪ್ರಕರಣವನ್ನೂ ಪ್ರತ್ಯೇಕವಾಗಿ ಪರಿಶೀಲಿಸುವ ಸಾಧ್ಯತೆ ಇದೆ. ಅಂದರೆ, ಕೇವಲ ಸಾಲ ಇದೆ ಎಂಬ ಕಾರಣಕ್ಕೆ ಯಾರನ್ನೂ ತಿರಸ್ಕರಿಸುವುದು ಅನಿವಾರ್ಯವಲ್ಲ. ಆದರೆ ಸಾಲದ ಮರುಪಾವತಿಯಲ್ಲಿ ನಿರ್ಲಕ್ಷ್ಯ ಕಂಡುಬಂದರೆ ಅದು ನೇಮಕಾತಿ ಮೇಲೆ ಪರಿಣಾಮ ಬೀರುತ್ತದೆ.

ಒಟ್ಟಿನಲ್ಲಿ ನೋಡಿದರೆ, ಬ್ಯಾಂಕ್ ಉದ್ಯೋಗಕ್ಕೆ ಅರ್ಜಿ ಹಾಕುವವರು ಕ್ರೆಡಿಟ್ ಸ್ಕೋರ್ ಇಲ್ಲದಿದ್ದರೂ ಮೊದಲ ಹಂತದಲ್ಲಿ ಯಾವುದೇ ತೊಂದರೆ ಎದುರಿಸುವುದಿಲ್ಲ. ಆದರೆ ಅಂತಿಮವಾಗಿ ಉದ್ಯೋಗಕ್ಕೆ ಸೇರುವ ಹಂತದಲ್ಲಿ ಅವರ ಕ್ರೆಡಿಟ್ ಇತಿಹಾಸವನ್ನು ಬ್ಯಾಂಕುಗಳು ಪರಿಶೀಲಿಸಬಹುದು. ಹೀಗಾಗಿ ಬ್ಯಾಂಕ್ ಉದ್ಯೋಗಕ್ಕೆ ತಯಾರಿ ನಡೆಸುತ್ತಿರುವವರು ತಮ್ಮ ಆರ್ಥಿಕ ದಾಖಲೆ, ಸಾಲ ಮರುಪಾವತಿ ಶಿಸ್ತು ಮತ್ತು ಕ್ರೆಡಿಟ್ ವರ್ತನೆ ಬಗ್ಗೆ ಹೆಚ್ಚು ಎಚ್ಚರಿಕೆಯಿಂದಿರುವುದು ಉತ್ತಮ.