ದಿವಾಳಿಯಾದ DHFLಗೆ ಮೂವರ ಸಲಹಾ ಸಮಿತಿ ರಚಿಸಿದ ಆರ್‌ಬಿಐ

ಬ್ಯಾಂಕುಗಳಿಂದ ಮತ್ತು ಮುಕ್ತ ಮಾರುಕಟ್ಟೆಯಿಂದ ಪಡೆದಿರುವ ಸಾಲವನ್ನು ಮರುಪಾವತಿಸಲು ವಿಫಲವಾಗಿರುವ ಗೃಹ ನಿರ್ಮಾಣ ಸಂಸ್ಥೆ ಡಿಹೆಚ್ಎಫ್ಎಲ್ ಗೆ ಮೂವರು ಸದಸ್ಯರ ಸಲಹಾ ಸಮಿತಿಯನ್ನು ಆರ್‌ಬಿಐ ಶುಕ್ರವಾರ ನೇಮಿಸಿದೆ. ನಿರ್ದೇಶಕ ಮಂಡಳಿಯನ್ನು ರದ್ದು ಪಡಿಸಿರುವ ಡಿಹೆಚ್ಎಫ್ಎಲ್‌ಗೆ ನೇಮಿಸಿರುವ ಆಡಳಿತಗಾರನಿಗೆ ನೆರವಾಗಲು ಈ ಮೂವರು ಸದಸ್ಯರ ಸಲಹಾ ಸಮಿತಿ ರಚಿಸಿದೆ.

ಬ್ಯಾಂಕ್, ಮ್ಯೂಚುವಲ್ ಫಂಡ್, ನ್ಯಾಷನಲ್ ಹೌಸಿಂಗ್ ಬೋರ್ಡ್‌ನಿಂದ ಮತ್ತು ಬಾಂಡ್ ಹೊಂದಿರುವವರಿಗೆ ಡಿಹೆಚ್ಎಫ್ಎಲ್ 83,873 ಕೋಟಿ ಸಾಲವನ್ನು ನೀಡಬೇಕಿದೆ. ಈ ಸಾಲವನ್ನು ವಸೂಲಿ ಮಾಡಲು ಸಲಹಾ ಸಮಿತಿಯು ಆಡಳಿತಗಾರನಿಗೆ ನೆರವಾಗಲಿದೆ.

ದಿವಾಳಿ ನೀತಿ ಸಂಹಿತೆಯಡಿ ಡಿಹೆಚ್ಎಫ್ಎಲ್ ನಿರ್ದೇಶಕ ಮಂಡಳಿಯನ್ನು ರದ್ದು ಮಾಡಿರುವ ಆರ್‌ಬಿಐ ಬಿಕ್ಕಟ್ಟು ಬಗೆಹರಿಸುವುದಾಗಿ ಹೇಳಿದೆ. ದಿವಾಳಿ ನೀತಿ ಸಂಹಿತೆಯಡಿ ಸಾಲ ವಸೂಲಾತಿ ಪ್ರಕ್ರಿಯೆಗೆ ಒಳಪಟ್ಟಿರುವ ಮೊದಲ ಗೃಹ ನಿರ್ಮಾಣ ಹಣಕಾಸು ಸಂಸ್ಥೆ ಇದಾಗಿದೆ. ಈ ವರ್ಷ ಡಿಹೆಚ್ಎಫ್‌ನ ಷೇರುಗಳು ಶೇಕಡಾ 90ರಷ್ಟು ಕುಸಿತ ಕಂಡಿವೆ.

ಈ ಹಿಂದೆ ಸಾಲ ನೀಡಿರುವ ಬ್ಯಾಂಕ್ ಮತ್ತು ಮ್ಯೂಚುವಲ್ ಫಂಡ್‌ಗಳು ತಮ್ಮ ಪಾಲಿನ ಸಾಲವನ್ನು ಷೇರುಗಳಾಗಿ ಪರಿವರ್ತಿಸಿ ಶೇಕಡಾ 51ರಷ್ಟು ಪಾಲು ಬಂಡವಾಳ ಹೊಂದಲು ಉದ್ದೇಶಿಸಿವೆ. ಆದರೆ ಇದಕ್ಕೆ ಇನ್ನೂ ಒಪ್ಪಿಗೆ ಸಿಕ್ಕಿಲ್ಲ.