2019 ರಲ್ಲಿ ಈ ಅಂಶಗಳನ್ನು ನಿಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಿ

Subscribe to GoodReturns Kannada
For Quick Alerts
ALLOW NOTIFICATIONS  
For Daily Alerts

    ಈಗಷ್ಟೇ ನಾವೇಲ್ಲ ಹೊಸ ವರ್ಷದ ಸಂಭ್ರಮಾಚರಣೆ ಮಾಡಿದ್ದು, 2019 ರ ಮೊದಲ ವಾರದ ಹೊಸ್ತಿಲಲ್ಲಿ ನಿಂತಿದ್ದೇವೆ. ಈ ವರ್ಷದಲ್ಲಿ ಭರಪೂರ 12 ತಿಂಗಳು ನಮ್ಮ ಮುಂದೆ ಬಾಕಿ ಇವೆ. ಒಂದು ರೀತಿಯಿಂದ 12 ತಿಂಗಳು ಸುದೀರ್ಘ ಅವಧಿಯೇ ಆಗಿದೆ. ಜಾಣತನದಿಂದ ಈ ಸಮಯವನ್ನು ಸದುಪಯೋಗಪಡಿಸಿಕೊಂಡಲ್ಲಿ ಜೀವನದಲ್ಲಿ ಮಹತ್ತರ ಬದಲಾವಣೆಯನ್ನು ಕಾಣಲು ಸಾಧ್ಯ. ಹಾಗೆಯೇ ಬೇಜವಾಬ್ದಾರಿಯುತವಾಗಿ ಬದುಕಿದಲ್ಲಿ ಈ 12 ತಿಂಗಳು ನೋಡ ನೋಡುತ್ತಲೇ ಕಳೆದು ಹೋಗಿ ಬಿಡುತ್ತವೆ.

    2019 ಇರಲಿ ಅಥವಾ 2020 ಬರಲಿ ಅಥವಾ ಬರಲಿರುವ ಮುಂದಿನ ಯಾವುದೇ ವರ್ಷದಲ್ಲೂ ಜೀವನದಲ್ಲಿ ಹಣಕ್ಕಿರುವ ಮಹತ್ವ ಮಾತ್ರ ಕಡಿಮೆಯಾಗಲಾರದು. ಹೀಗಾಗಿ ಮುಂದಿನ 12 ತಿಂಗಳುಗಳನ್ನು ನಮ್ಮ ಆರ್ಥಿಕ ಸುಸ್ಥಿತಿಗಾಗಿ ಬಳಸಿಕೊಳ್ಳಲು ಸರಿಯಾದ ಯೋಜನೆ ರೂಪಿಸಬೇಕು ಹಾಗೂ ಅದರಂತೆ ನಡೆಯಬೇಕು.
    ಹಣ ಎಂಬುದು ಒಂದು ವಿಚಿತ್ರ ವಸ್ತು. ಇದು ನಿಮ್ಮ ಬಳಿ ಇದ್ದರೆ ನಿಮಗೆ ಇನ್ನಷ್ಟು ಬೇಕು. ಒಂದೊಮ್ಮೆ ನಿಮ್ಮ ಬಳಿ ಹಣ ಇರದಿದ್ದರೆ ಆಗಲೂ ನಿಮಗೆ ಹಣ ಬೇಕು. ಜೀವನಕ್ಕೆ ಸಾಕಾಗುವಷ್ಟಾದರೂ ಹಣ ಗಳಿಸಲೇ ಬೇಕು. 60 ವರ್ಷಕ್ಕೂ ಮುನ್ನವೇ ಸಾಕಷ್ಟು ಹಣವನ್ನು ದುಡಿದು ಇಟ್ಟಲ್ಲಿ ನೆಮ್ಮದಿಯಿಂದ ನಿವೃತ್ತ ಜೀವನಕ್ಕೆ ಕಾಲಿಡಬಹುದು. ಇನ್ನು ಹೊಸ ದಂಪತಿಗಳಾಗಿದ್ದರೆ ತಮ್ಮ ಮಕ್ಕಳ ಉನ್ನತ ವಿದ್ಯಾಭ್ಯಾಸಕ್ಕಾಗಿ ಹಣ ಕೂಡಿಸುವ ಚಿಂತೆ ಇರುತ್ತದೆ. ಹೀಗಾಗಿ ಹಣ ಎಂಬುದು ನಮ್ಮೆಲ್ಲರ ಜೀವನದ ಅವಿಭಜ್ಯ ಅಂಗವಾಗಿದೆ.
    ಹೊಸ ವರ್ಷದಲ್ಲಿ ಹಣದ ಸದ್ವಿನಿಯೋಗಕ್ಕಾಗಿ ಕೆಲ ಸಂಕಲ್ಪಗಳನ್ನು ಮಾಡಿದಲ್ಲಿ ನಿಮ್ಮ ಹಣಕಾಸು ಸ್ಥಿತಿಯನ್ನು ಖಂಡಿತವಾಗಿಯೂ ಉತ್ತಮ ಪಡಿಸಿಕೊಳ್ಳಬಹುದು. ಯಾವೆಲ್ಲ ಅಂಶಗಳನ್ನು ಪಾಲಿಸುವ ಮೂಲಕ ಜೀವನದಲ್ಲಿ ಆರ್ಥಿಕ ಶಿಸ್ತು ಮೂಡಿಸಬಹುದು ಎಂಬುದನ್ನು ಈ ಅಂಕಣದಲ್ಲಿ ವಿವರಿಸಲಾಗಿದೆ.

     

    2019 ರಲ್ಲಿ ಹಣಕಾಸು ಶಿಸ್ತಿಗೆ 6 ಪ್ರಮುಖ ಟಿಪ್ಸ್:

    ಖರ್ಚು ಕಡಿಮೆ ಮಾಡಿ

    ನೀವು ದುಡಿದ ಹಣದಲ್ಲಿ ಶೇ.90 ರಷ್ಟನ್ನು ಖರ್ಚು ಮಾಡುತ್ತಿದ್ದಲ್ಲಿ ನೀವು ಹಣ ಉಳಿತಾಯ ಮಾಡಲು ಸಾಧ್ಯವೇ ಇಲ್ಲ. ಹೀಗಾಗಿ ಹೊಸ ವರ್ಷಾರಂಭದಿಂದಲೇ ಆದಷ್ಟೂ ಖರ್ಚು ಕಡಿಮೆ ಮಾಡುವತ್ತ ಗಮನ ಹರಿಸಿ. ಸೂಕ್ತ ಹಣಕಾಸು ಯೋಜನೆ ರೂಪಿಸಿ ಭವಿಷ್ಯದಲ್ಲಿ ಬರಬಹುದಾದ ದೊಡ್ಡ ಖರ್ಚುಗಳ ಬಗ್ಗೆ ಅಂದಾಜು ಹಾಕಿಟ್ಟುಕೊಳ್ಳಿ. 2018 ರಲ್ಲಿ ನೀವೆಷ್ಟು ಖರ್ಚು ಮಾಡಿದಿರಿ ಎಂಬುದನ್ನು ಲೆಕ್ಕ ಹಾಕಿ ಈ ವರ್ಷ ಅದಕ್ಕೂ ಕಡಿಮೆ ಖರ್ಚಿನಲ್ಲಿ ಬದುಕು ಸಾಗಿಸಲು ಯತ್ನಿಸಿ. ಜಗತ್ತಿನಲ್ಲಿನ ಹಲವಾರು ಆಕರ್ಷಣೆಗಳು ನಮ್ಮನ್ನು ಖರ್ಚು ಮಾಡುವತ್ತ ಸೆಳೆಯುತ್ತವೆ. ಹೀಗಾಗಿ ಯಾವುದೇ ವಸ್ತು ಕೊಳ್ಳುವ ಮುನ್ನ 'ಅದು ನನಗೆ ಅವಶ್ಯಕತೆ ಇದೆಯಾ?' ಎಂದು ಕೇಳಿಕೊಂಡು ಮುಂದುವರೆಯಿರಿ.

    ಉಳಿತಾಯ ಪ್ರವೃತ್ತಿ ಹೆಚ್ಚಾಗಲಿ

    ನಿಮ್ಮ ಖರ್ಚುಗಳನ್ನು ಕಡಿಮೆ ಮಾಡಿದಲ್ಲಿ ಉಳಿತಾಯ ತಾನಾಗಿಯೇ ಆಗುತ್ತದೆ. ಆದರೆ ಹಾಗಂತ ಕಡಿಮೆ ಖರ್ಚು ಮಾಡುವವರೆಲ್ಲ ಹಣ ಉಳಿತಾಯ ಮಾಡಲಾರರು. ಯಾವುದೋ ಒಂದು ಹಂತದಲ್ಲಿ ಸಣ್ಣ ಖರ್ಚಿನಿಂದ ಪಾರಾದರೂ ಮುಂದೆ ದೊಡ್ಡ ಖರ್ಚು ಮಾಡುವ ಎಲ್ಲ ಸಾಧ್ಯತೆಗಳಿರುತ್ತವೆ. ಇದು ತೀರಾ ಅಪಾಯಕಾರಿಯಾಗಿದ್ದು ನಿಮ್ಮ ಸಂಪೂರ್ಣ ಹಣಕಾಸು ಯೋಜನೆಯನ್ನು ಹಾಳು ಮಾಡಬಲ್ಲದು.
    ವಾರ್ಷಿಕ ಒಟ್ಟು ಆದಾಯದ ಶೇ.40 ರಷ್ಟನ್ನಾದರೂ ಉಳಿತಾಯ ಮಾಡಲು ಪ್ರಯತ್ನಿಸಿ. ಉಳಿತಾಯದ ಪ್ರವೃತ್ತಿಯನ್ನು ಹೆಚ್ಚಾಗಿ ಬೆಳೆಸಿಕೊಳ್ಳಿ. ಉಳಿತಾಯ ಮಾಡಿದವರಾರೂ ಬಡವರಾಗಿಲ್ಲ. ಆದರೆ ಉಳಿತಾಯ ನಿರ್ಲಕ್ಷಿಸಿದಲ್ಲಿ ಬಡತನ ಬರಬಹುದು.

    ಹೂಡಿಕೆ ಮಾಡಿ, ಹೂಡಿಕೆ ಮಾಡಿ, ಹೂಡಿಕೆ ಮಾಡಿ

    ಬ್ಯಾಂಕಿನ ಉಳಿತಾಯ ಖಾತೆಯಲ್ಲಿ ಹಣ ಇಡುವುದು ಹೂಡಿಕೆ ಮಾಡಿದಂತಲ್ಲ ಎಂಬುದು ಗೊತ್ತಿರಲಿ. ನಿರ್ದಿಷ್ಟ ಗುರಿಯೊಂದಿಗೆ ಹೂಡಿಕೆ ಮಾಡಬೇಕು ಹಾಗೂ ಅದರಿಂದ ಹಣದುಬ್ಬರ ಮೀರಿದ ಆದಾಯ ಸಿಗುವಂತಿರಬೇಕು. ಹಣದುಬ್ಬರಕ್ಕೂ ಕಡಿಮೆ ಮಟ್ಟದಲ್ಲಿ ಆದಾಯ ಬರುವಂತೆ ಹೂಡಿಕೆ ಮಾಡಿದಲ್ಲಿ ನಿಧಾನವಾಗಿ ನೀವು ಹಣ ಕಳೆದುಕೊಳ್ಳುತ್ತಿರುವಿರಿ ಎಂತಲೇ ಅರ್ಥ. ಮಾರುಕಟ್ಟೆಯಲ್ಲಿ ನೂರಾರು ಉತ್ತಮ ಹೂಡಿಕೆ ಆಯ್ಕೆಗಳಿವೆ. ಅದರಲ್ಲಿ ಅತ್ಯುತ್ತಮ ಆದಾಯ ನೀಡುವ ಹಾಗೂ ನಿಮಗೆ ತೆರಿಗೆ ಉಳಿಸಬಲ್ಲ ಯೋಜನೆಯನ್ನು ಆಯ್ದುಕೊಂಡು ಹೂಡಿಕೆ ಮಾಡಿ.

    ಜೂಜು ಬೇಡವೇ ಬೇಡ

    2017 ಹಾಗೂ 2018 ರಲ್ಲಿ ಬಿಟ್ ಕಾಯಿನಗಳ ಬಗ್ಗೆ ಸಾಕಷ್ಟು ಕೋಲಾಹಲ ಮೂಡಿತ್ತು. ಕ್ರಿಪ್ಟೊಕರೆನ್ಸಿ ಎಂದರೇನು ಎಂಬುದು ಸಹ ಗೊತ್ತಿರದ ಅನೇಕರು ಅದರಲ್ಲಿ ಹೂಡಿಕೆ ಮಾಡಿದರು. ಕೊನೆಗೆ ಬಿಟ್ ಕಾಯಿನ್ ಬೆಲೆ ಪಾತಾಳಕ್ಕೆ ಕುಸಿದಾಗ ಲಕ್ಷಾಂತರ ಜನ ಹಣ ಕಳೆದುಕೊಂಡರು. ಯಾರು ಎಷ್ಟೇ ಖಾತರಿದಾಯಕ 'ಟಿಪ್ಸ್' ನೀಡಿದರೂ ಜೂಜಿನ ಮೇಲೆ ಮಾತ್ರ ಹಣ ಹೂಡಲೇಬೇಡಿ. ಜೂಜಿಗೆ ಹಣ ಹೂಡಿ ಗೆಲುವಿನ ಚಾನ್ಸ್ ಪರಿಶೀಲಿಸುವುದಕ್ಕಿಂತ ನಿಮ್ಮ ಹಣವನ್ನು ನಿಮ್ಮ ಬಳಿಯೇ ಇಟ್ಟುಕೊಳ್ಳುವುದು ಸುರಕ್ಷಿತ.

    ಪರ್ಯಾಯ ಆದಾಯದ ಮಾರ್ಗಗಳನ್ನು ಶೋಧಿಸಿ

    ಹಣದುಬ್ಬರ ಎಂಬುದು ನಿರಂತರ ಪ್ರಕ್ರಿಯೆ. ಕಳೆದ ವರ್ಷಕ್ಕಿಂತ ಈ ವರ್ಷ ಎಲ್ಲ ವಸ್ತುಗಳೂ ದುಬಾರಿಯಾಗಿರುತ್ತವೆ. ಹಾಗೆಯೇ 2019, 2020, 2021.... ಹೀಗೆ ಬರುವ ವರ್ಷಗಳಿಗೂ ಇದೇ ನಿಯಮ ಅನ್ವಯಿಸುತ್ತದೆ. ಬೆಲೆಯೇರಿಕೆಯ ಪರಿಣಾಮ ತಡೆಗಟ್ಟಬೇಕಾದರೆ ಆದಾಯ ಹೆಚ್ಚು ಮಾಡಿಕೊಳ್ಳುವುದು ಅನಿವಾರ್ಯ. ಆದರೆ ಹಾಗಂತ ನಿಮ್ಮ ಸಂಬಳ ಹೆಚ್ಚಳದ ಮೇಲೆ ಮಾತ್ರ ಅವಲಂಬಿತರಾಗಿರುವುದು ಸಾಧ್ಯವಿಲ್ಲ. ಹೀಗಾಗಿ ಪರ್ಯಾಯ ಆದಾಯದ ಮಾರ್ಗಗಳನ್ನು ಶೋಧಿಸಬೇಕಾಗುತ್ತದೆ. ವಾರಾಂತ್ಯದಲ್ಲಿ ಇನ್ನೊಂದಿಷ್ಟು ಆದಾಯ ತಂದುಕೊಡಬಲ್ಲ ಕೆಲಸ ಮಾಡಿ. ಒಟ್ಟಾರೆಯಾಗಿ ಹೊಸ ವರ್ಷದಲ್ಲಿ ಇನ್ನೊಂದು ಆದಾಯದ ಮೂಲವನ್ನು ಹುಡುಕಿಕೊಳ್ಳಿ.

    ಚುನಾವಣೆಯಲ್ಲಿ ಮತ ನೀಡಿ, ಹಣವನ್ನಲ್ಲ

    ಹೊಸ ವರ್ಷ 2019 ದೇಶದಲ್ಲಿ ಸಾರ್ವತ್ರಿಕ ಚುನಾವಣೆಗಳು ನಡೆಯುವ ಪ್ರಮುಖ ವರ್ಷವಾಗಿದೆ. ಈ ಚುನಾವಣೆಯ ಫಲಿತಾಂಶದಿಂದ ಶೇರು ಮಾರುಕಟ್ಟೆಯ ಮೇಲೆ ಯಾವೆಲ್ಲ ಪರಿಣಾಮಗಳಾಗಬಹುದು ಎಂಬುದನ್ನು ಮಾರುಕಟ್ಟೆ ಪಂಡಿತರು ವಿಶ್ಲೇಷಿಸುತ್ತಿದ್ದಾರೆ. ಆದರೆ ಚುನಾವಣಾ ಫಲಿತಾಂಶಗಳನ್ನು ನಿರೀಕ್ಷೆಯಲ್ಲಿಟ್ಟುಕೊಂಡು ಹೂಡಿಕೆ ಮಾಡುವುದು ಬೇಡ. ಒಂದು ಅಥವಾ ಎರಡು ವರ್ಷದ ಅವಧಿಯನ್ನು ಪರಿಗಣಿಸಿದಲ್ಲಿ ಚುನಾವಣೆಗಳಿಂದ ಹೂಡಿಕೆಯ ಮೇಲೆ ಹೇಳಿಕೊಳ್ಳುವಂತಹ ಪರಿಣಾಮವಾಗುವುದಿಲ್ಲ ಎಂಬುದು ಕಂಡು ಬರುತ್ತದೆ.

    English summary

    Financial Planning: Six tips towards building wealth in 2019

    Money is a strange thing. If you have it, you want more. If you don’t have it, you still want it. At our individual level, money is a means to an end. Money could mean peaceful retirement for a couple in their 60s.
    Story first published: Friday, January 4, 2019, 13:00 [IST]
    Company Search
    Enter the first few characters of the company's name or the NSE symbol or BSE code and click 'Go'

    Find IFSC

    We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Goodreturns sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Goodreturns website. However, you can change your cookie settings at any time. Learn more