ನಿರೀಕ್ಷೆಗೆ ತಕ್ಕಂತೆ ಪ್ರಗತಿ ಸಾಧಿಸಲು ಸಾಧ್ಯವಾಗುತ್ತಿಲ್ಲ. ಆದ್ದರಿಂದ ಸರಕಾರಗಳು ಜಾಗತಿಕ ಆರ್ಥಿಕ ತಲ್ಲಣಗಳನ್ನು ಎದುರಿಸಲು ಸಿದ್ಧವಾಗಿರಬೇಕು ಎಂದು ಅಂತರರಾಷ್ಟ್ರೀಯ ಹಣಕಾಸು ಸಂಸ್ಥೆಯು ಭಾನುವಾರ ಎಚ್ಚರಿಕೆ ನೀಡಿದೆ. ನಾವು ನಿರೀಕ್ಷೆ ಮಾಡಿದ್ದಕ್ಕಿಂತ ನಿಧಾನವಾಗಿ ಆರ್ಥಿಕ ಪ್ರಗತಿ ಆಗುತ್ತಿದೆ ಎಂದು ಐಎಂಎಫ್ ನ ಕಾರ್ಯನಿರ್ವಾಹಕ ನಿರ್ದೇಶಕಿ ಕ್ರಿಸ್ಟಿನ್ ಲಗಾರ್ಡೆ ದುಬೈನಲ್ಲಿ ನಡೆದ ವಿಶ್ವದ ಸರಕಾರಗಳ ಸಮಾವೇಶದಲ್ಲಿ ಹೇಳಿದ್ದಾರೆ.

ಕಳೆದ ತಿಂಗಳಷ್ಟೇ ಐಎಂಎಫ್ ಜಾಗತಿಕ ಆರ್ಥಿಕ ಪ್ರಗತಿಯ ಅಂದಾಜನ್ನು 3.7 ಪರ್ಸೆಂಟ್ ನಿಂದ 3.5 ಪರ್ಸೆಂಟ್ ಗೆ ಇಳಿಸಿತ್ತು. ಲಗಾರ್ಡೆ ಮಾತನಾಡಿ, ಜಾಗತಿಕ ಆರ್ಥಿಕತೆಯಲ್ಲಿ ತಲ್ಲಣ ಕಾಣಿಸಿಕೊಳ್ಳಬಹುದು ಎಂದು ನಾಲ್ಕು ಕಾರಣಗಳನ್ನು ಸಹ ಹೇಳಿದ್ದಾರೆ.

ಜಾಗತಿಕ ಮಟ್ಟದ ವ್ಯಾಪಾರ ಒತ್ತಡ, ಆರ್ಥಿಕ ಬಿಕ್ಕಟ್ಟು, ಬ್ರೆಕ್ಸಿಟ್ ಫಲಿತಾಂಶ ಮತ್ತು ಚೀನಾದ ಆರ್ಥಿಕ ಹಿಂಜರಿತದ ಪರಿಣಾಮವು ಜಾಗತಿಕ ಮಟ್ಟದಲ್ಲಿ ಆಗಬಹುದು ಎಂದು ಹೇಳಿದ್ದಾರೆ. ವಿಶ್ವದ ಎರಡು ಅತಿ ದೊಡ್ಡ ಆರ್ಥಿಕ ಶಕ್ತಿ ಅಮೆರಿಕ ಹಾಗೂ ಚೀನಾ ಮಧ್ಯ ನಡೆಯುತ್ತಿರುವ ವ್ಯಾಪಾರ ಪೈಪೋಟಿ ಈಗಾಗಲೇ ಜಾಗತಿಕವಾಗಿ ಪರಿಣಾಮ ಬೀರಿದೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.

ಆರ್ಥಿಕ ಹಿಂಜರಿತದ ಪರಿಣಾಮ ಹೇಗೆ ಆಗಬಹುದು ಎಂಬ ಬಗ್ಗೆ ನಮಗೆ ಯಾವುದೇ ಸೂಚನೆ ಇಲ್ಲ. ಆದರೆ ಈಗಾಗಲೇ ವ್ಯಾಪಾರ- ವ್ಯವಹಾರ, ಮಾರುಕಟ್ಟೆಯಲ್ಲಿನ ನಂಬಿಕೆ ಮೇಲೆ ಪರಿಣಾಮ ಅಗಿದೆ ಎಂದು ಆಕೆ ಹೇಳಿದ್ದಾರೆ. ನಾಲ್ಕಾರು ಆತಂಕದ ಕಾರ್ಮೋಡ ಇದ್ದಾಗ ಒಂದು ಮಿಂಚಿನ ಮೂಲಕ ಸಿಡಿಲು ಬಡಿಯಬಹುದು ಎಂದು ಅವರು ಹೇಳಿದ್ದಾರೆ.