ಇನ್ಫಿ ನಾರಾಯಣಮೂರ್ತಿ ಅಳಿಯ ಯು.ಕೆ. ಹೊಸ ಹಣಕಾಸು ಸಚಿವ

ಇನ್ಫೋಸಿಸ್ ನ ಸಹ ಸಂಸ್ಥಾಪಕ ನಾರಾಯಣಮೂರ್ತಿ- ಸುಧಾಮೂರ್ತಿ ದಂಪತಿಯ ಅಳಿಯ- ಭಾರತೀಯ ಮೂಲದ ರಾಜಕಾರಣಿ ರಿಷಿ ಸುನಕ್ ಯುನೈಟೆಡ್ ಕಿಂಗ್ ಡಮ್ ನ ಹೊಸ ಹಣಕಾಸು ಸಚಿವರಾಗಿ ನೇಮಕವಾಗಿದ್ದಾರೆ. ಪ್ರಧಾನಮಂತ್ರಿ ಬೋರಿಸ್ ಜಾನ್ಸನ್ ಅವರು ಗುರುವಾರ ಸಂಪುಟ ಪುನಾರಚನೆ ಮಾಡಿದ ಸಂದರ್ಭದಲ್ಲಿ ಈ ನೇಮಕ ಮಾಡಿದ್ದಾರೆ.

ಈ ಹಿಂದೆ, ಕಳೆದ ಡಿಸೆಂಬರ್ ನಲ್ಲಿ ಬೋರಿಸ್ ಜಾನ್ಸನ್ ಬಹುಮತದೊಂದಿಗೆ ಚುನಾವಣೆಯಲ್ಲಿ ಜಯಿಸಿದ ನಂತರ ಪಾಕಿಸ್ತಾನಿ ಮೂಲದ ಸಾಜಿದ್ ಜಾವಿದ್ ಚಾನ್ಸೆಲರ್ ಸ್ಥಾನಕ್ಕೆ ದಿಢೀರ್ ರಾಜೀನಾಮೆ ಸಲ್ಲಿಸಿದ್ದರು. ಆ ಸ್ಥಾನಕ್ಕೆ ಸುನಕ್ ನೇಮಕ ಆಗಿದ್ದಾರೆ. ಈ ವರೆಗೆ ಜಾವಿದ್ ಜೂನಿಯರ್ ಆಗಿ, ಖಜಾನೆ ಮುಖ್ಯ ಕಾರ್ಯದರ್ಶಿಯಾಗಿ ಕಾರ್ಯ ನಿರ್ವಹಿಸಿದ್ದರು ಸುನಕ್.

39 ವರ್ಷದ ರಿಷಿ ಸುನಕ್ ಅವರು ನಂಬರ್ 11, ಡೌನಿಂಗ್ ಸ್ಟ್ರೀಟ್ ಗೆ ವಾಸ್ತವ್ಯ ಬದಲಿಸಲಿದ್ದಾರೆ. ಪ್ರಧಾನಿ ಕಚೇರಿ ಬಳಿಯೇ ಈ ವಾಸ್ತವ್ಯ ಇದೆ. ಯುನೈಟೆಡ್ ಕಿಂಗ್ ಡಮ್ ನಲ್ಲಿ ಪ್ರಧಾನಮಂತ್ರಿ ಹುದ್ದೆಯ ನಂತರ ಸರ್ಕಾರದಲ್ಲಿ ಬಹು ಮುಖ್ಯವಾದದ್ದೆಂದರೆ ವಿತ್ತ ಸಚಿವರ ಹುದ್ದೆ.

ಯಾರ್ಕ್ ಷೈರ್ ನ ರಿಚ್ಮಂಡ್ ಗೆ ರಿಷಿ ಸಂಸದರಾಗಿದ್ದಾರೆ. ನಾರಾಯಣಮೂರ್ತಿ ಅವರು ಮಗಳು ಅಕ್ಷತಾರನ್ನು ರಿಷಿ ಮದುವೆಯಾಗಿದ್ದಾರೆ. ಮೊದಲ ಬಾರಿಗೆ ಅವರು 2015ರಲ್ಲಿ ಯು.ಕೆ. ಸಂಸತ್ ಪ್ರವೇಶಿಸಿದ್ದರು. ರಿಷಿ ಅವರ ತಾಯಿ ಫಾರ್ಮಾಸಿಸ್ಟ್. ತಂದೆ ವೈದ್ಯರು.