ಮುತ್ತೂಟ್ ಫೈನಾನ್ಸ್‌ ಲಾಭ ಶೇ. 23ರಷ್ಟು ಏರಿಕೆ: 3,722 ಕೋಟಿ ರೂಪಾಯಿ

ಭಾರತದ ಅತಿದೊಡ್ಡ ಚಿನ್ನದ ಹಣಕಾಸು ಕಂಪನಿಯಾದ ಮುತ್ತೂಟ್ ಫೈನಾನ್ಸ್‌ ಹಿಂದಿನ ವರ್ಷಕ್ಕೆ ಹೋಲಿಸಿದರೆ 2020-21ರ ಹಣಕಾಸು ವರ್ಷದಲ್ಲಿ ಲಾಭವು ಶೇಕಡಾ 23ರಷ್ಟು ಏರಿಕೆಯಾಗಿ 3,722 ಕೋಟಿ ರೂಪಾಯಿಗೆ ತಲುಪಿದೆ.

2019-20ರ ಹಣಕಾಸು ವರ್ಷದಲ್ಲಿ ಮುತ್ತೂಟ್ ಫೈನಾನ್ಸ್ ನಿವ್ವಳ ಲಾಭವು 3,018 ಕೋಟಿ ರೂಪಾಯಿಗಳಷ್ಟಿದ್ದು, 2020-21ರಲ್ಲಿ ಶೇಕಡಾ 23ರಷ್ಟು ವೃದ್ಧಿಯಾಗಿದೆ. ಇದರ ಜೊತೆಗೆ ಕಂಪನಿಯ ಸಾಲದ ಆಸ್ತಿಗಳು ಹಿಂದಿನ ವರ್ಷದ ಮಾರ್ಚ್ 31 ರ ವೇಳೆಗೆ 41,611 ಕೋಟಿ ರೂ.ಗಳಾಗಿದ್ದು, ಇದು ಮಾರ್ಚ್ 31, 2021 ರ ವೇಳೆಗೆ 52,622 ಕೋಟಿ ರೂ.ಗಳಾಗಿದ್ದು, ವರ್ಷದ ಆಧಾರದ ಮೇಲೆ ಶೇಕಡಾ 26 ರಷ್ಟು ಬೆಳವಣಿಗೆಯನ್ನು ದಾಖಲಿಸಿದೆ.

ಇನ್ನು ಮುತ್ತೂಟ್ ಫೈನಾನ್ಸ್‌ ಜನವರಿ-ಮಾರ್ಚ್ ತ್ರೈಮಾಸಿಕದಲ್ಲಿ 995.6 ಕೋಟಿ ರೂ. ನಿವ್ವಳ ಲಾಭವನ್ನು ಗಳಿಸಿದೆ, ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿ 815.1 ಕೋಟಿ ರೂ.ಗಳಿಗೆ ಹೋಲಿಸಿದರೆ ಶೇಕಡಾ 22.1 ಬೆಳವಣಿಗೆ ಸಾಧಿಸಿದೆ.

2020-21 ನಾಲ್ಕನೇ ತ್ರೈಮಾಸಿಕದಲ್ಲಿ ನಿವ್ವಳ ಬಡ್ಡಿ ಆದಾಯವು 1,829.5 ಕೋಟಿ ರೂ.ಗಳಷ್ಟಿದ್ದು, ಇದು ವರ್ಷದಿಂದ ವರ್ಷದ ಆಧಾರದ ಮೇಲೆ ಶೇಕಡಾ 15.7 ರಷ್ಟು ಹೆಚ್ಚಾಗಿದೆ. ಕಂಪನಿಯ 2019-20ರ Q4 ನಿವ್ವಳ ಬಡ್ಡಿ ಆದಾಯ 1,580.6 ಕೋಟಿ ರೂ. ನಷ್ಟಿತ್ತು.

ಕಂಪನಿಯು 2020-21ರ ಆರ್ಥಿಕ ವರ್ಷದಲ್ಲಿ ಪ್ರತಿ ಷೇರಿಗೆ 20 ರೂ.ಗಳ ಲಾಭಾಂಶವನ್ನು(ಡಿವೆಡೆಂಡ್) ಘೋಷಿಸಿದ್ದು, ಒಟ್ಟು 2021 ಏಪ್ರಿಲ್‌ನಲ್ಲಿ 802 ಕೋಟಿ ರೂ. ಷೇರುದಾರರಿಗೆ ನೀಡಿದೆ.