ಮಾರ್ಕೆಟ್ ಮೌಲ್ಯ 11 ಲಕ್ಷ ಕೋಟಿ ರುಪಾಯಿ ತಲುಪಿದ ರಿಲಯನ್ಸ್ ನಿಂದ ದಾಖಲೆ

ಕ್ರಿಕೆಟ್ ಜಗತ್ತಿನ ಸಚಿನ್ ತೆಂಡೂಲ್ಕರ್ ನಂತೆ ರಿಲಯನ್ಸ್ ಇಂಡಸ್ಟ್ರೀಸ್ ಕಂಪೆನಿ ಹೊಸ ಹೊಸ ದಾಖಲೆಗಳನ್ನು ಕಾರ್ಪೊರೇಟ್ ವಲಯದಲ್ಲಿ ಬರೆಯುತ್ತಿದೆ. ಮಾರ್ಚ್ ನಿಂದ ಈಚೆಗೆ ಷೇರು ಮೌಲ್ಯದಲ್ಲಿ ಡಬಲ್ ಆಗಿರುವ ರಿಲಯನ್ಸ್ ಇಂಡಸ್ಟ್ರೀಸ್ ಶುಕ್ರವಾರಂದು ಮಾರುಕಟ್ಟೆ ಬಂಡವಾಳ ಮೌಲ್ಯದಲ್ಲಿ 11 ಲಕ್ಷ ಕೋಟಿ ರುಪಾಯಿ ಮುಟ್ಟಿದ ಭಾರತದ ಮೊದಲ ಕಂಪೆನಿ ಎಂಬ ದಾಖಲೆ ಬರೆದಿದೆ.

ಗುರುವಾರದ ದಿನಾಂತ್ಯಕ್ಕೆ ಇದ್ದ ದರಕ್ಕಿಂತ 5% ಏರಿಕೆ ದಾಖಲಿಸಿದೆ ರಿಲಯನ್ಸ್ ಇಂಡಸ್ಟ್ರೀಸ್, ನಿಫ್ಟಿಯಲ್ಲಿ ದಿನಾಂತ್ಯಕ್ಕೆ 1759.40 ರುಪಾಯಿಗೆ ವಹಿವಾಟು ಮುಗಿಸಿದೆ. ಜಿಯೋ ಪ್ಲಾಟ್ ಫಾರ್ಮ್ ನ 24.71 ಪರ್ಸೆಂಟ್ ಷೇರನ್ನು ಮಾರಿ, 1.15 ಲಕ್ಷ ಕೋಟಿ ಸಂಗ್ರಹಿಸಲಾಗಿದೆ. ಆ ಮೂಲಕ ರಿಲಯನ್ಸ್ ಇಂಡಸ್ಟ್ರೀಸ್ ನಿವ್ವಳ ಸಾಲದಿಂದ ಮುಕ್ತವಾಗಿದೆ ಎಂದು ಮುಕೇಶ್ ಅಂಬಾನಿ ಈ ದಿನ (ಶುಕ್ರವಾರ, ಜೂನ್ 19) ಘೋಷಣೆ ಮಾಡಿದ್ದರು.

ಮಾರ್ಚ್ 31, 2020ಕ್ಕೆ ರಿಲಯನ್ಸ್ ಇಂಡಸ್ಟ್ರೀಸ್ ನಿವ್ವಳ ಸಾಲ 1.61 ಲಕ್ಷ ಕೋಟಿ ಇತ್ತು. ಅಂದ ಹಾಗೆ ಕಂಪೆನಿಯು ರೈಟ್ಸ್ ಇಶ್ಯೂ ಮೂಲಕ 53,124 ಕೋಟಿ ರುಪಾಯಿ ಕೂಡ ಸಂಗ್ರಹಿಸಿದೆ. ಜಿಯೋ ಪ್ಲಾಟ್ ಫಾರ್ಮ್ ನಿಂದ ಇನ್ನೆಷ್ಟು ಹೂಡಿಕೆಯನ್ನು ವಾಪಸ್ ಪಡೆಯುತ್ತದೆ ಎಂಬ ಬಗ್ಗೆ ರಿಲಯನ್ಸ್ ತಿಳಿಸಿಲ್ಲ. ಆದರೆ ತಜ್ಞರ ವರದಿಗಳ ಪ್ರಕಾರ, ಇನ್ನು ಷೇರಿನ ಪಾಲು ಮಾರುವುದಿಲ್ಲ.