ರಿಲಯನ್ಸ್ ಇಂಡಸ್ಟ್ರೀಸ್- ಫ್ಯೂಚರ್ ಸಮೂಹದ ವ್ಯವಹಾರಕ್ಕೆ ಸೆಬಿ ಸಮ್ಮತಿ

ಫ್ಯೂಚರ್ ಸಮೂಹದ ಹೊಂದಾಣಿಕೆ ಯೋಜನೆ ಮತ್ತು ರಿಲಯನ್ಸ್ ಇಂಡಸ್ಟ್ರೀಸ್ ಗೆ ಆಸ್ತಿ ಮಾರಾಟಕ್ಕೆ ಸೆಕ್ಯೂರಿಟೀಸ್ ಎಕ್ಸ್ ಚೇಂಜ್ ಬೋರ್ಡ್ ಆಫ್ ಇಂಡಿಯಾ (SEBI) ಬುಧವಾರ ಸಮ್ಮತಿ ನೀಡಿದೆ ಎಂದು ಪಿಟಿಐ ಸುದ್ದಿ ಸಂಸ್ಥೆ ವರದಿಯಲ್ಲಿ ತಿಳಿಸಿದೆ. ಮಾರುಕಟ್ಟೆ ನಿಯಂತ್ರಕ ಸಂಸ್ಥೆಯಿಂದ ಈ ವ್ಯವಹಾರಕ್ಕೆ ಒಪ್ಪಿಗೆ ದೊರಕಿದ ಮೇಲೆ ಈ 24,713 ಕೋಟಿ ರುಪಾಯಿಯ ವ್ಯವಹಾರಕ್ಕೆ ಬಿಎಸ್ ಇಯಿಂದ ಕೂಡ "ಯಾವುದೇ ವ್ಯತಿರಿಕ್ತ ಪರಿಣಾಮ ಆಗಲ್ಲ" ಎಂಬ ವರದಿ ನೀಡಲಾಗಿದೆ.

ಸದ್ಯಕ್ಕೆ ಫ್ಯೂಚರ್ಸ್ ಸಮೂಹ ಮತ್ತು ರಿಲಯನ್ಸ್ ಇಂಡಸ್ಟ್ರೀಸ್ ಮಧ್ಯದ ವ್ಯವಹಾರ ವ್ಯಾಜ್ಯ ದೆಹಲಿ ಹೈಕೋರ್ಟ್ ನಲ್ಲಿ ಬಾಕಿ ಇದೆ. ಜಾಗತಿಕ ಇ ಕಾಮರ್ಸ್ ಕಂಪೆನಿಯಾದ ಅಮೆಜಾನ್ ನಿಂದ ಫ್ಯೂಚರ್ ಹಾಗೂ ರಿಲಯನ್ಸ್ ಮಧ್ಯದ ವ್ಯವಹಾರಕ್ಕೆ ಆಕ್ಷೇಪ ವ್ಯಕ್ತವಾಗಿದೆ ಎಂಬುದನ್ನು ಷೇರುದಾರರು ಅಥವಾ ಎನ್ ಸಿಎಲ್ ಟಿ ಒಪ್ಪಿಗೆ ಪಡೆಯುವ ವೇಳೆ ನಿರ್ದಿಷ್ಟವಾಗಿ ಪ್ರಸ್ತಾವ ಮಾಡಬೇಕು ಎಂದು ಬಿಎಸ್ ಇ ಪತ್ರದಲ್ಲಿ ತಿಳಿಸಿದೆ.

ದೆಹಲಿ ಹೈಕೋರ್ಟ್ ಸೇರಿದಂತೆ ಇತರೆಡೆಯಿಂದ ಯಾವುದೇ ಆಕ್ಷೇಪ ಇಲ್ಲ ಎಂಬ ತೀರ್ಪು ಹೊರಬೀಳಬೇಕಾಗಿದೆ. ಕಳೆದ ಆಗಸ್ಟ್ ನಲ್ಲಿ ರಿಲಯನ್ಸ್ ಇಂಡಸ್ಟ್ರೀಸ್ ನ ಅಂಗಸಂಸ್ಥೆಯಾದ ರಿಲಯನ್ಸ್ ರೀಟೇಲ್ ವೆಂಚರ್ಸ್ ಲಿಮಿಟೆಡ್ ನಿಂದ ಫ್ಯೂಚರ್ ಗ್ರೂಪ್ ಗೆ ಸೇರಿದ ರೀಟೇಲ್, ಹೋಲ್ ಸೇಲ್ ಹಾಗೂ ಲಾಜಿಸ್ಟಿಕ್ಸ್ ವ್ಯವಹಾರವನ್ನು ರು. 24,713 ಕೋಟಿಗೆ ಖರೀದಿಸುವ ಮಾತಾಗಿತ್ತು.

ಈ ಯೋಜನೆಯಲ್ಲಿ ಫ್ಯೂಚರ್ ಸಮೂಹದ ಆಯ್ದ ಕಂಪೆನಿಯನ್ನು ಮೊದಲಿಗೆ ಫ್ಯೂಚರ್ ಎಂಟರ್ ಪ್ರೈಸಸ್ ಲಿಮಿಟೆಡ್ ನಲ್ಲಿ ವಿಲೀನ ಮಾಡಬೇಕಿತ್ತು. ಈ ಖರೀದಿ ವ್ಯವಹಾರವು ಸೆಬಿ, ಸಿಸಿಐ, ಎನ್ ಸಿಎಲ್ ಟಿ, ಷೇರುದಾರರು, ಸಾಲ ನೀಡಿದವರು ಹಾಗೂ ಇತರ ಒಪ್ಪಿಗೆಗಳ ಮೇಲೆ ಆಧಾರ ಪಟ್ಟಿತ್ತು.