ಹೊಸೂರು ಘಟಕದ ಮೇಲೆ 5000 ಕೋಟಿ ರು ಹೂಡಿದ ಟಾಟಾ ಎಲೆಕ್ಟ್ರಾನಿಕ್ಸ್

ಆಪಲ್ ಸಂಸ್ಥೆಗಾಗಿ ಉಪಕರಣಗಳನ್ನು ತಯಾರಿಸುವ ಟಾಟಾ ಎಲೆಕ್ಟ್ರಾನಿಕ್ಸ್ ನ ಹೊಸ ಘಟಕದ ಮೇಲೆ 5000 ಕೋಟಿ ರು ಹೂಡಿಕೆ ಮಾಡಲಾಗುತ್ತಿದೆ. ಹೊಸೂರಿನಲ್ಲಿ ತಮಿಳುನಾಡು ಕೈಗಾರಿಕಾ ಅಭಿವೃದ್ಧಿ ನಿಗಮದ ಅಡಿಯಲ್ಲಿರುವ ಈ ಘಟಕದಲ್ಲಿ ಆಪಲ್ ಐಫೋನ್ ಸೇರಿದಂತೆ ಇತರೆ ಜನಪ್ರಿಯ ಉತ್ಪನ್ನಗಳಿಗೆ ಬೇಕಾದ ಉಪಕರಣಗಳನ್ನು ತಯಾರಿಸಲಾಗುತ್ತದೆ.

ಒಟ್ಟಾರೆ, ಬೇಡಿಕೆಗೆ ತಕ್ಕಂತೆ ಈ ಘಟಕದ ಮೇಲೆ 8,000 ಕೋಟಿ ರು ತನಕ ಹೂಡಿಕೆ ಮಾಡಲು ಟಾಟಾ ಸಮೂಹ ಸಿದ್ಧವಾಗಿದೆ ಎಂದು ಮನಿಕಂಟ್ರೋಲ್ ವರದಿ ಮಾಡಿದೆ.

ಟೈಟಾನ್ ಘಟಕವಾದ ಟೈಟಾನ್ ಇಂಜಿನಿಯರಿಂಗ್ ಹಾಗೂ ಆಟೋಮೇಷನ್ (TEAL) ಈ ಘಟಕ ಸ್ಥಾಪನೆಯಲ್ಲಿ ತಾಂತ್ರಿಕ ಸಲಹೆ ನೀಡಲಿದ್ದು, ಉತ್ಪಾದನೆ ನಂತರ ಆರಂಭವಾಗಲಿದೆ. ಅಕ್ಟೋಬರ್ 17ರಂದು ಘಟಕದ ಭೂಮಿ ಪೂಜೆ ನಡೆಸಲಾಗಿದೆ.

ಲಭ್ಯ ಮಾಹಿತಿ ಪ್ರಕಾರ ಸುಮಾರು 18,000 ಉದ್ಯೋಗಿಗಳನ್ನು ಅಕ್ಟೋಬರ್ 2021ರ ವೇಳೆಗೆ ಈ ಘಟಕ ಹೊಂದಲಿದೆ. ಶೇ 90ರಷ್ಟು ಮಹಿಳಾ ಉದ್ಯೋಗಿಗಳನ್ನು ಈ ಘಟಕ ನೇಮಕ ಮಾಡಿಕೊಳ್ಳಲಿದೆ. ತಮಿಳುನಾಡಿನ ಶ್ರೀಪೆರಂಬದೂರಿನ ಘಟಕದಲ್ಲಿ ಐಫೋನ್ 11 ಅಸೆಂಬ್ಲಿ ಕಾರ್ಯ ನಡೆಯುತ್ತಿರುವುದನ್ನು ಇಲ್ಲಿ ಸ್ಮರಿಸಬಹುದು.