TDS On EPF: ಇಪಿಎಫ್​ ಮೇಲೆ ಟಿಡಿಎಸ್​ ಯಾವಾಗ ಅನ್ವಯ? ಅದನ್ನು ತಡೆಯುವುದು ಹೇಗೆ?

ಕಾರ್ಮಿಕರ ಭವಿಷ್ಯ ನಿಧಿ (ಇಪಿಎಫ್)​ ವಿಥ್‌ಡ್ರಾ ಮಾಡಿದಾಗ ತೆರಿಗೆ​ ಕಡಿತ ಆಗುತ್ತದೆಯಾ? ಇದು ಎಷ್ಟರ ಮಟ್ಟಿಗೆ ನಿಜ? ನಿಯಮಾವಳಿಗಳು ಏನು ಹೇಳುತ್ತವೆ? ಆ ಬಗ್ಗೆ ಇನ್ನೊಂದಷ್ಟು ಮಾಹಿತಿ ಗೊತ್ತಿದ್ದರೆ ಚೆನ್ನಾಗಿತ್ತು. - ಹೀಗೆ ನಿಮ್ಮನ್ನೂ ಸೇರಿದಂತೆ ಸಾಕಷ್ಟು ಮಂದಿ ಅಂದುಕೊಂಡಿರಬಹುದು. ಅದನ್ನು ತಿಳಿಸುವ ಸಲುವಾಗಿಯೇ ಈ ಲೇಖನವನ್ನು ಸಿದ್ಧಪಡಿಸಲಾಗಿದೆ. ಅಂದ ಹಾಗೆ, ಒಬ್ಬ ಉದ್ಯೋಗಿ 58 ವರ್ಷ ವಯಸ್ಸನ್ನು ತಲುಪಿದಾಗ ಇಪಿಎಫ್​ ಖಾತೆ ಪಕ್ವ (ಮೆಚ್ಯೂರ್) ಆಗುತ್ತದೆ. ಇನ್ನು ಒಬ್ಬ ಉದ್ಯೋಗಿ ಸತತವಾಗಿ 60 ದಿನಗಳ ಕಾಲ ನಿರುದ್ಯೋಗಿ ಆದಲ್ಲಿ ಆ ಸನ್ನಿವೇಶದಲ್ಲಿ ಪೂರ್ತಿಯಾಗಿ ಇಪಿಎಫ್​ ಖಾತೆಯ ಮೊತ್ತವನ್ನು ಪಾವತಿಸಲಾಗುತ್ತದೆ ಮತ್ತು ಅದು ತೆರಿಗೆಯಿಂದ ಮುಕ್ತವಾಗಿರುತ್ತದೆ.

ಆದರೆ ಉದ್ಯೋಗಿಯು ಉದ್ಯೋಗದಲ್ಲಿ ಇರುವಂತೆಯೇ ಹಾಗೂ ಇಪಿಎಫ್​ ಮೆಚ್ಯೂರ್ ಆಗುವ ಮುಂಚೆಯೇ ಮೊತ್ತವನ್ನು ಹಿಂಪಡೆದರೆ ಆಗ ಟ್ಯಾಕ್ಸ್ ಡಿಡಕ್ಟೆಡ್ ಅಟ್ ಸೋರ್ಸ್ (ಟಿಡಿಎಸ್) ಅನ್ವಯಿಸುತ್ತದೆ. ಉದ್ಯೋಗಿಯು ತಿಳಿದುಕೊಳ್ಳಬೇಕಾದ ಟಿಡಿಎಸ್ ಜವಾಬ್ದಾರಿ ಬಗ್ಗೆ ಕಾರ್ಮಿಕರ ಭವಿಷ್ಯ ನಿಧಿ ಸಂಸ್ಥೆಯು (EPFO) ಟ್ವೀಟ್​ ಮೂಲಕ ತಿಳಿಸಿದೆ.

ಇಪಿಎಫ್ ಮೇಲಿನ ಟಿಡಿಎಸ್​

ಮೊದಲಿಗೆ ಏನಿದು ಟ್ಯಾಕ್ಸ್ ಡಿಡಕ್ಟಡ್ ಅಟ್ ಸೋರ್ಸ್ ಅಂದರೆ ಎಂಬುದನ್ನು ತಿಳಿದುಕೊಳ್ಳಿ. ವೈಯಕ್ತಿಕ ಒಬ್ಬರ ಆದಾಯ ಸೃಷ್ಟಿ ಆಗುವಾಗಲೇ ಸಂಗ್ರಹಿಸುವಂಥ ತೆರಿಗೆಗೆ ಟಿಡಿಎಸ್​ ಅಥವಾ ಟ್ಯಾಕ್ಸ್ ಡಿಡಕ್ಟಡ್ ಅಟ್ ಸೋರ್ಸ್ ಎನ್ನಲಾಗುತ್ತದೆ. ತೆರಿಗೆ ಕಟ್ಟುವುದರಿಂದ ತಪ್ಪಿಸಿಕೊಳ್ಳದಿರಲಿ ಎಂಬ ಕಾರಣಕ್ಕೆ ಈ ರೀತಿಯ ತೆರಿಗೆ ಸಂಗ್ರಹ (ಭಾಗಶಃ ಅಥವಾ ಪೂರ್ಣವಾಗಿ) ಪದ್ಧತಿಯನ್ನು ಸರ್ಕಾರದಿಂದ ತರಲಾಗಿದೆ. ಆದಾಯ ಸೃಷ್ಟಿ ಆದಾಗಲೇ ವಸೂಲಿ ಮಾಡಲಾಗುತ್ತದೆ, ನಂತರದ ದಿನಾಂಕದ ತನಕ ಕಾಯುವುದಿಲ್ಲ. ವೇತನ, ಬಡ್ಡಿ, ಕಮಿಷನ್, ಲಾಭಾಂಶ (ಡಿವಿಡೆಂಡ್​) ಹೀಗೆ ವಿವಿಧ ಆದಾಯಗಳ ಮೇಲೆ ಟಿಡಿಎಸ್ ವಿಧಿಸಲಾಗುತ್ತದೆ.

ಇಪಿಎಫ್​ ಮೇಲೆ ಯಾವಾಗ ಟಿಡಿಎಸ್​ ಕಡಿತ ಮಾಡುವುದಿಲ್ಲ?

ಇಪಿಎಫ್‌ಒ ವೆಬ್‌ಸೈಟ್‌ನಲ್ಲಿ ಇರುವ ಪ್ರಕಾರವಾಗಿ ಇಪಿಎಫ್‌ನಲ್ಲಿ ಟಿಡಿಎಸ್ ಕಡಿತಗೊಳಿಸದೇ ಇರುವ ಸನ್ನಿವೇಶಗಳು ಈ ಕೆಳಕಂಡಂತೆ ಇವೆ:
- ಪಿಎಫ್​ ಹಣವನ್ನು ಒಂದು ಖಾತೆಯಿಂದ ಇನ್ನೊಂದು ಖಾತೆಗೆ ವರ್ಗಾವಣೆ ಮಾಡಿರಬೇಕು.
- ಸದಸ್ಯರ ಅನಾರೋಗ್ಯದ ಕಾರಣದಿಂದಾಗಿ ಸೇವೆಯನ್ನು ಕೊನೆಗೊಳಿಸಿರಬೇಕು, ವ್ಯಾಪಾರ ಮಾಡುವುದನ್ನು ನಿಲ್ಲಿಸಲು ಉದ್ಯೋಗದಾತರು ನಿರ್ಧಾರ ಮಾಡಿರಬೇಕು, ಯೋಜನೆಯ ಕೊನೆ ಆಗಿರಬೇಕು ಅಥವಾ ಸದಸ್ಯರ ನಿಯಂತ್ರಣಕ್ಕೆ ಮೀರಿದ ಯಾವುದೇ ಕಾರಣ ಇರಬೇಕು.
- ಐದು ವರ್ಷಗಳ ಅವಧಿಯ ನಂತರ ಉದ್ಯೋಗಿ ಪಿಎಫ್ ಅನ್ನು ಹಿಂತೆಗೆದುಕೊಂಡಿರಬೇಕು.
- ಪಿಎಫ್ ಪಾವತಿಯು 50,000 ರೂಪಾಯಿಗಿಂತ ಕಡಿಮೆ ಇರಬೇಕು, ಆದರೆ ಸದಸ್ಯರು 5 ವರ್ಷಗಳಿಗಿಂತ ಕಡಿಮೆ ಸೇವಾವಧಿ ಹೊಂದಿರಬೇಕು.
- 5 ವರ್ಷಕ್ಕಿಂತ ಕಡಿಮೆ ಸೇವೆಯನ್ನು ಹೊಂದಿರುವ ಉದ್ಯೋಗಿ ರೂ.50,000 ಕ್ಕಿಂತ ಹೆಚ್ಚಿನ ಅಥವಾ ಸಮಾನವಾದ ಮೊತ್ತವನ್ನು ಹಿಂಪಡೆದಿರಬೇಕು. ಆದರೆ ಅವರ PAN ಜೊತೆಗೆ ಫಾರ್ಮ್ 15G/15H ಅನ್ನು ಸಲ್ಲಿಸಿರಬೇಕು.

ಟಿಡಿಎಸ್ ಅನ್ನು ಯಾವಾಗ ಕಡಿತಗೊಳಿಸಲಾಗುತ್ತದೆ?

ಇಪಿಎಫ್‌ಒ ವೆಬ್‌ಸೈಟ್‌ನ ಪ್ರಕಾರ, ಇಪಿಎಫ್‌ನಲ್ಲಿ ಟಿಡಿಎಸ್ ಕಡಿತಗೊಳಿಸಲು ಈ ಕೆಳಕಂಡ ಕಾರಣಗಳು ಇವೆ:
ಉದ್ಯೋಗಿಯು 5 ವರ್ಷಗಳಿಗಿಂತ ಕಡಿಮೆ ಸೇವೆಯೊಂದಿಗೆ ರೂ. 50,000 ಕ್ಕಿಂತ ಹೆಚ್ಚು ಅಥವಾ ಸಮಾನವಾದ ಹಣವನ್ನು ಹಿಂಪಡೆದಿರಬೇಕು.
ಅ) ಫಾರ್ಮ್-15G/15H ಅನ್ನು ಸಲ್ಲಿಸದಿದ್ದರೂ PAN ಸಲ್ಲಿಸಿದರೆ ಟಿಡಿಎಸ್ ಅನ್ನು ಶೇ 10ರ ದರದಲ್ಲಿ ಕಡಿತಗೊಳಿಸಲಾಗುತ್ತದೆ.
ಆ) ಉದ್ಯೋಗಿಯು PAN ಸಲ್ಲಿಸಲು ವಿಫಲವಾದರೆ, ಟಿಡಿಎಸ್​ ಅನ್ನು ಗರಿಷ್ಠ ಕನಿಷ್ಠ ದರದಲ್ಲಿ (ಶೇ 34.608) ಕಡಿತಗೊಳಿಸಲಾಗುತ್ತದೆ.

ಇಪಿಎಫ್​ ಪ್ರಕಾರ ಗಮನಿಸಬೇಕಾದ ಸಂಗತಿಗಳು:

1. ಪಾವತಿ ಸಮಯದಲ್ಲಿ ಟಿಡಿಎಸ್​ ಅನ್ನು ಕಡಿತಗೊಳಿಸಲಾಗುತ್ತದೆ.

2. 1961ರ ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 192Aಗೆ ಅನುಗುಣವಾಗಿ ಟಿಡಿಎಸ್​ ಕಡಿತಗೊಳಿಸಲಾಗುತ್ತದೆ.3. ಫಾರ್ಮ್ 15H ಹಿರಿಯ ವ್ಯಕ್ತಿಗಳಿಗೆ (60 ವರ್ಷ ಮತ್ತು ಮೇಲ್ಪಟ್ಟವರಿಗೆ), ಫಾರ್ಮ್ 15G ಯಾವುದೇ ತೆರಿಗೆ ವ್ಯಾಪ್ತಿಯ ಆದಾಯ ಇಲ್ಲದವರಿಗೆ. ಸ್ವಯಂ ಘೋಷಣೆಗಳು, ಫಾರ್ಮ್‌ಗಳು 15G ಮತ್ತು 15H, ನಕಲಿನಲ್ಲಿ ಸ್ವೀಕರಿಸಬಹುದು.4. ಫಾರ್ಮ್ ಸಂಖ್ಯೆ 15G/15H ಮತ್ತು ಫಾರ್ಮ್ ಸಂಖ್ಯೆ 19 ಅನ್ನು ಸಲ್ಲಿಸುವಾಗ ಸದಸ್ಯರು ತಮ್ಮ PAN ಅನ್ನು ಕಡ್ಡಾಯವಾಗಿ ಸೇರಿಸಬೇಕು.