ವಾಹನದ ಇನ್ಷೂರೆನ್ಸ್ ಕ್ಲೈಮ್ ಮಾಡಲು ಪಿಯುಸಿ ಸರ್ಟಿಫಿಕೇಟ್ ಬೇಕಾ?

ಮಾಲಿನ್ಯ ಹೇಗೆ?

ಒಂದು ವಾಹನ ಹೊರಸೂಸುವ ಹೊಗೆಯಲ್ಲಿ ನಿರ್ದಿಷ್ಟ ಮಟ್ಟಕ್ಕಿಂತ ಹೆಚ್ಚು ಕಾರ್ಬನ್ ಮಾನಾಕ್ಸೈಡ್ ಇದ್ದರೆ ಅದನ್ನು ಮಾಲಿನ್ಯ ಎಂದು ಪರಿಗಣಿಸಲಾಗುತ್ತದೆ. ಕಡಿಮೆ ಕಾರ್ಬಲ್ ಮಾನಾಕ್ಸೈಡ್ ಹೊರಸೂಸುವ ವಾಹನಗಳಿಗೆ ಪಿಯುಸಿ ಪ್ರಮಾಣಪತ್ರ ಕೊಡಲಾಗುತ್ತದೆ. ಮಾಲಿನ್ಯ ತಪಾಸಣಾ ಪರೀಕ್ಷೆಯನ್ನು ಬಹಳಷ್ಟು ಕಡೆ ಮಾಡಲಾಗುತ್ತದೆ. ಮಾನ್ಯತೆ ಪಡೆದ ಕೇಂದ್ರಗಳಲ್ಲಿ ತಪಾಸಣೆ ಮಾಡಿಸಿ ಪಿಯುಸಿ ಸರ್ಟಿಫಿಕೇಟ್ ಪಡೆಯಬೇಕು.

ವಾಹನಗಳಿಗೆ ಪಿಯುಸಿ ಪ್ರಮಾಣಪತ್ರ ಕಡ್ಡಾಯ ಮಾಡಿರುವುದರಿಂದ ಇನ್ಷೂರೆನ್ಸ್ ಕಂಪನಿಗಳೂ ಕೂಡ ಇದನ್ನೇ ಅನುಸರಿಸುತ್ತಿವೆ. ಮಾನ್ಯತೆ ಪಡೆದ ಕೇಂದ್ರಗಳಲ್ಲಿ ವಾಹನಕ್ಕೆ ಪಿಯುಸಿ ಪ್ರಮಾಣಪತ್ರ ಪಡೆದರೆ ಮಾತ್ರ ವಿಮೆ ಮಾಡಿಸಲು ಅಥವಾ ವಿಮೆ ನವೀಕರಣ ಮಾಡಲು ಅಥವಾ ವಿಮೆ ಕ್ಲೇಮ್ ಮಾಡಲು ಅವಕಾಶ ನೀಡುವಂತೆ ಇನ್ಷೂರೆನ್ಸ್ ಕಂಪನಿಗಳಿಗೆ ಐಆರ್‌ಡಿಎಐ ಸಂಸ್ಥೆ ಸೂಚನೆ ನೀಡಿದೆ.

"ವಾಹನಕ್ಕೆ ವಿಮೆ ಮಾಡಿಸುವಾಗ ಅಥವಾ ವಿಮೆ ನವೀಕರಣ ಮಾಡುವಾಗ ಮಾಲೀಕರು ಸಿಂದುವಾದ ಪಿಯುಸಿ ಪ್ರಮಾಣಪತ್ರ ತಂದಿರಬೇಕು. ಇದು ಐಆರ್‌ಡಿಎಐನ ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ. ಕಾನೂನು ಪ್ರಕಾರ ಥರ್ಡ್ ಪಾರ್ಟಿ ಇನ್ಷೂರೆನ್ಸ್ ಇಲ್ಲದೆಯೇ ಯಾವ ವಾಹನವೂ ರಸ್ತೆ ಇಳಿಯುವಂತಿಲ್ಲ. ಈ ನಿಯಮ ಸರಿಯಾಗಿ ಜಾರಿಯಾಗಿಲ್ಲ ಅಷ್ಟೇ. ಇನ್ಷೂರೆನ್ಸ್ ಪಾಲಿಸಿ ರಿನಿವಲ್ ಮಾಡುವಾಗ ಸರಿಯಾದ ಪಿಯುಸಿ ಸರ್ಟಿಫಿಕೇಟ್ ಇಲ್ಲದೇ ಕಾರಿನ ವಿಮೆ ಮಾಡುವಂತಿಲ್ಲ ಎಂದು ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನಲ್ಲಿ ವಿಮಾ ಕಂಪನಿಗಳಿಗೆ ಆದೇಶಿಸಿತ್ತು. ಈ ಆರ್ಡರ್ ಆದೇಶದ ಪ್ರಕಾರ ಇನ್ಷೂರೆನ್ಸ್ ರೆಗ್ಯೂಲೇಟರಿ ಅಂಡ್ ಡೆವಲಪ್ಮೆಂಟ್ ಅಥಾರಿಟಿ ಆಫ್ ಇಂಡಿಯಾ (ಐಆರ್‌ಡಿಎಐ) ಈ ನೋಟಿಫಿಕೇಶನ್ ಹೊರಡಿಸಿದೆ" ಎಂದು ಬಜಾಜ್ ಕ್ಯಾಪಿಟಲ್ ಸಂಸ್ಥೆಯ ಎಂಡಿ ಮತ್ತು ಜಂಟಿ ಛೇರ್ಮನ್ ಸಂಜೀವ್ ಬಜಾಜ್ ಹೇಳಿದ್ದಾರೆ.

 ಡಿಜಿಟಲ್ ರುಪಾಯಿ ಯಾಕೆ ಮುಖ್ಯ? ಪ್ರಮುಖ ಕಾರಣಗಳು ಇಲ್ಲಿವೆ

ಕ್ಲೇಮ್ ಮಾಡಲು ಪಿಯುಸಿ ಸರ್ಟಿಫಿಕೇಟ್ ಬೇಕಿಲ್ಲ

ಟ್ರಾಫಿಕ್ ಪೊಲೀಸರು ವಾಹನ ಸವಾರರ ಬಳಿ ಕೇಳುವ ದಾಖಲೆಗಳೆಂದರೆ ಡ್ರೈವಿಂಗ್ ಲೈಸೆನ್ಸ್, ವಾಹನ ಇನ್ಷೂರೆನ್ಸ್, ಪಿಯುಸಿ (ಪೊಲ್ಯೂಷನ್ ಸರ್ಟಿಫಿಕೇಟ್), ಫಿಟ್ನೆಸ್ ಸರ್ಟಿಫಿಕೇಟ್, ಮೆಡಿಕಲ್ ಸರ್ಟಿಫಿಕೇಟ್ ಮತ್ತು ವಾಹನ ನೊಂದಣಿ.

ವಾಹನಕ್ಕೆ ವಿಮೆ ಮಾಡಿಸಲು ಪಿಯುಸಿ ಸರ್ಟಿಫಿಕೇಟ್ ಅಗತ್ಯವಾದರೂ ವಿಮೆ ಕ್ಲೇಮ್ ಮಾಡುವಾಗ ಅದು ಬೇಕೆಂದೇನೂ ಇಲ್ಲ. ಹೊಸದಾಗಿ ಅಳವಡಿಸಲಾದ ನಿಯಮದ ಪ್ರಕಾರ ಇನ್ಷೂರೆನ್ಸ್ ಹಣದ ರಿಟರ್ನ್ ಪಡೆಯಲು ಪಿಯುಸಿ ಪ್ರಮಾಣಪತ್ರ ಅಗತ್ಯ ಬೀಳುವುದಿಲ್ಲ.

ಯಾವಾಗ ಮಾಡಿಸಬೇಕು ಮಾಲಿನ್ಯ ಪರೀಕ್ಷೆ?

ನೀವು ಹೊಸದಾಗಿ ಕಾರು ಖರೀದಿಸಿದಾಗ ಪಿಯುಸಿ ಸರ್ಟಿಫಿಕೇಟ್ ಕೊಡಲಾಗುತ್ತದೆ. ಅದು ಒಂದು ವರ್ಷದವರೆಗೆ ಮಾತ್ರ ಸಿಂಧುವಾಗಿರುತ್ತದೆ. ಅದಾದ ಬಳಿಕ ನಿರ್ದಿಷ್ಟ ಅವಧಿಗೊಮ್ಮೆ ಮಾಲಿನ್ಯ ತಪಾಸಣೆ ಮಾಡಿಸಬೇಕು. ಪೆಟ್ರೋಲ್ ವಾಹನವಾದರೆ ಪಿಯುಸಿ ಪರೀಕ್ಷೆಯಲ್ಲಿ ಪ್ರತೀ 3 ತಿಂಗಳಿಗೆ ಮಾಡಿಸಬೇಕು. ಡೀಸೆಲ್ ವಾಹನವಾದರೆ ಆರು ತಿಂಗಳಿಗೊಮ್ಮೆ ಮಾಡಿಸಬೇಕು. ನೀವು ಆಗಾಗ್ಗೆ ವಾಹನ ವಾಲಿನ್ಯ ತಪಾಸಣೆ ಪರೀಕ್ಷೆ ಮಾಡಿಸುತ್ತಿರಬೇಕು. ಒಂದು ವೇಳೆ ಪರೀಕ್ಷೆಯಲ್ಲಿ ವಿಫಲವಾದರೆ ವಾಹನದ ಸರ್ವಿಸಿಂಗ್ ಮಾಡಿಸುವುದು ಅಗತ್ಯವಾಗಿರುತ್ತದೆ.

ಇನ್ನು ಎಲೆಕ್ಟ್ರಿಕ್ ವಾಹನಳು ಪರಿಸರ ಸ್ನೇಹಿಗಳಾದ್ದರಿಂದ ಅವುಗಳಿಗೆ ಮಾಲಿನ್ಯ ತಪಾಸಣೆಯ ಅಗತ್ಯ ಬೀಳುವುದಿಲ್ಲ. ಉಳಿದಂತೆ ಪೆಟ್ರೋಲ್ ಮತ್ತು ಡೀಸೆಲ್ ಚಾಲಿತ ವಾಹನಗಳು ಮಾಲಿನ್ಯ ಪರೀಕ್ಷೆ ಮಾಡಿಸಿ ವಾಹನಕ್ಕೆ ಪಿಯುಸಿ ಸರ್ಟಿಫಿಕೇಟ್ ಪಡೆಯುವುದು ಕಡ್ಡಾಯ.