ಎನ್‌ಪಿಎಸ್ ಖಾತೆ: ಹಣ ವಿತ್‌ಡ್ರಾ, ಪ್ರಯೋಜನ, ಸಂಪೂರ್ಣ ಮಾಹಿತಿ

ನಾವು ಮಾಡುವ ಹೂಡಿಕೆಯಿಂದ ತೆರಿಗೆ ಉಳಿತಾಯ ಮಾಡಲು ಸಾಧ್ಯವಾಗುತ್ತದೆ ಎಂದಾದರೆ ಅಂತಹ ಹೂಡಿಕೆಯಿಂದ ಹಿಂದೆ ಸರಿಯಲು ಮನಸ್ಸು ಬರುತ್ತದೆಯೇ?. ಹೆಚ್ಚಾಗಿ ಜನರು ಎಲ್ಲಿ ಹೂಡಿಕೆ ಮಾಡಿದರೆ ತೆರಿಗೆ ಉಳಿತಾಯ ಮಾಡಲು ಸಾಧ್ಯವಾಗುತ್ತದೆ ಎಂದು ನೋಡುತ್ತಾರೆ. ಅಂತಹ ಜನರಿಗೆ ಈ ಹೂಡಿಕೆ ಉತ್ತಮ ಆಯ್ಕೆಯಾಗಿದೆ.

ನಮಗೆ ಬ್ಯಾಂಕ್ ಎಫ್‌ಡಿ, ಪಿಪಿಎಫ್, ಎನ್‌ಎಸ್‌ಸಿ, ಎನ್‌ಪಿಎಸ್ ಇತ್ಯಾದಿಗಳಲ್ಲಿ ಹೂಡಿಕೆ ಮಾಡುವ ಮೂಲಕ ತೆರಿಗೆ ಉಳಿತಾಯವನ್ನು ಮಾಡಲು ಸಾಧ್ಯವಿದೆ. ಈ ನಡುವೆ 18-60 ವಯಸ್ಸಿನ ಮಿತಿಯೊಳಗೆ ಭಾರತದ ನಾಗರಿಕರಿಗೆ ಎನ್‌ಪಿಎಸ್‌ ತೆರಿಗೆ ಉಳಿತಾಯ ಮಾಡಲು ಉತ್ತಮ ಆಯ್ಕೆಯಾಗಿದೆ. ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆ (ಎನ್‌ಪಿಎಸ್) ನಿವೃತ್ತಿ ಸಂದರ್ಭದಲ್ಲಿ ಸಹಾಯಕವಾಗುವ ಯೋಜನೆಯಾಗಿದೆ.

ಈ ಖಾತೆಯನ್ನು ತೆರೆದಿರುವವರು ತಮ್ಮ ಖಾತೆಗೆ ಹೂಡಿಕೆಯನ್ನು ಮಾಡಿಕೊಂಡು ಅದನ್ನು ಉಳಿತಾಯ ಮಾಡಿಕೊಳ್ಳಬಹುದು ಹಾಗೂ ಭವಿಷ್ಯದಲ್ಲಿ ಆ ಹಣವನ್ನು ಬಳಕೆ ಮಾಡಬಹುದು. ನಿವೃತ್ತಿಯ ನಂತರ ಸುಂದರ ಜೀವನಕ್ಕಾಗಿ ಈ ಹೂಡಿಕೆಯನ್ನು ಬಳಕೆ ಮಾಡಬಹುದು. ನಾವು ಎನ್‌ಪಿಎಸ್ ಖಾತೆಯನ್ನು ಆನ್‌ಲೈನ್ ಮತ್ತು ಆಫ್‌ಲೈನ್‌ನಲ್ಲಿಯೂ ತೆರೆಯಬಹುದು. ಈ ಯೋಜನೆಯ ಮುಖ್ಯ ಲಾಭವೇನು, ಆನ್‌ಲೈನ್ ಮೂಲಕ ಹೇಗೆ ಖಾತೆ ತೆರೆಯುವುದು ಎಂಬ ಮೊದಲಾದ ಮಾಹಿತಿಯನ್ನು ನಾವು ತಿಳಿಯೋಣ ಮುಂದೆ ಓದಿ...

ಎನ್‌ಪಿಎಸ್‌ ಪ್ರಮುಖ ವಿಚಾರಗಳು

* ನಾವು ಎನ್‌ಪಿಎಸ್ ಖಾತೆಯನ್ನು ಆನ್‌ಲೈನ್ ಮೂಲಕ 20 ನಿಮಿಷದಲ್ಲೇ ತೆರೆಯಲು ಸಾಧ್ಯವಿದೆ
* ನಾವು ಬರೀ ಸಾವಿರ ರೂಪಾಯಿ ಹೂಡಿಕೆ ಮಾಡುವ ಮೂಲಕ ಖಾತೆಯನ್ನು ತೆರೆಯಲು ಸಾಧ್ಯವಾಗುತ್ತದೆ.
* ಎನ್‌ಪಿಎಸ್‌ನಲ್ಲಿ ಹೂಡಿಕೆ ಅತೀ ಕಡಿಮೆಯಾಗಿದೆ
* ದೀರ್ಘಾವಧಿ (60 ವರ್ಷ) ಹೂಡಿಕೆ ಮಾಡಿದರೆ ನಮಗೆ ಹೆಚ್ಚಿನ ಲಾಭ ಲಭ್ಯವಾಗಲಿದೆ

 

 

ಎನ್‌ಪಿಎಸ್‌ನ ಪ್ರಯೋಜನಗಳು ಏನು?

* ಒಂದು ಹಣಕಾಸು ವರ್ಷದಲ್ಲಿ ಹೂಡಿಕೆದಾರರು ಯಾವ ಸಂದರ್ಭದಲ್ಲಿ ಬೇಕಾದರೂ ಹೂಡಿಕೆ ಮಾಡಬಹುದು. ಅದು ಖಾತೆಯನ್ನು ಹೊಂದಿರುವವರಿಗೆ ಬಿಟ್ಟ ವಿಚಾರ. ತಮಗೆ ಅನುಕೂಲವಾದಾಗ ಹೂಡಿಕೆಯನ್ನು ಮಾಡಬಹುದು.
* ಪ್ರತಿ ವರ್ಷ ನಿಗದಿತ ಎಷ್ಟು ಪ್ರಮಾಣದಲ್ಲಿ ಹೂಡಿಕೆ ಮಾಡಬೇಕು ಎಂಬುವುದನ್ನು ಕೂಡಾ ಹೂಡಿಕೆದಾರರೇ ನಿರ್ಧಾರ ಮಾಡಬಹುದು
* ಎನ್‌ಪಿಎಸ್ ಅನ್ನು ಎಲ್ಲಿಂದ ಬೇಕಾದರೂ ನಾವು ನಿರ್ವಹಣೆ ಮಾಡಲು ಸಾಧ್ಯವಾಗುತ್ತದೆ. ನಾವು ಉದ್ಯೋಗ ಬದಲಾವಣೆ ಮಾಡಿದರೂ ಯಾವುದೇ ತೊಂದರೆ ಉಂಟಾಗದು.
* ಎನ್‌ಪಿಎಸ್ ಖಾತೆಯನ್ನು ಯಾರದೇ ಪಿಪಿಒ ಅತವಾ ಇಎನ್‌ಪಿಎಸ್ ಮೂಲಕ ತೆರೆಯಬಹುದು

 

 

ಎನ್‌ಪಿಎಸ್ ಖಾತೆಯನ್ನು ಆನ್‌ಲೈನ್‌ನಲ್ಲಿ ತೆರೆಯುವುದು ಹೇಗೆ?

* https://enps.nsdl.com/eNPS/NationalPensionSystem.html ಎನ್‌ಪಿಎಸ್‌ ವೆಬ್‌ಸೈಟ್‌ಗೆ ಭೇಟಿ ನೀಡಿ
* NEW ರಿಜಿಸ್ಟ್ರೇಷನ್ ಆಯ್ಕೆ ಮಾಡಿ, ಆಧಾರ್-ಪ್ಯಾನ್ ಅನ್ನು ತೆರೆಯಿರಿ
* ನಿಮ್ಮ ರಿಜಿಸ್ಟರ್ ಆದ ಮೊಬೈಲ್ ಸಂಖ್ಯೆಗೆ ಒಟಿಪಿ ಬರಲಿದೆ
* ಆನ್‌ಲೈನ್ ಫಾರ್ಮ್ ಅನ್ನು ಭರ್ತಿ ಮಾಡಿ, ಫೋಟೋ, ಸಿಗ್ನಿಚರ್ ಅನ್ನು ಸ್ಕ್ಯಾನ್ ಮಾಡಿ
* ಫಾರ್ಮ್ ಅನ್ನು ಸಬ್‌ಮಿಟ್ ಮಾಡಿ
* ನೋಂದಣಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದ ನಂತರ, ನೀವು ಎನ್‌ಪಿಎಸ್ ಖಾತೆ ನಿರ್ವಹಣೆ ಮಾಡಬಹುದಾದ ಪ್ಯಾನ್ ಲಭ್ಯವಾಗಲಿದೆ.

 

 

ಎನ್‌ಪಿಎಸ್ ಖಾತೆ ಆಫ್‌ಲೈನ್‌ನಲ್ಲಿ ತೆರೆಯುವುದು ಹೇಗೆ?

* 18-65 ವಯಸ್ಸಿನ ನಡುವಿನ ಚಂದಾದಾರರು PRAN ಅರ್ಜಿ ನಮೂನೆಯನ್ನು ಯಾವುದೇ ಪಿಪಿಒ-ಸೇವಾ ಪೂರೈಕೆದಾರರಿಂದ (POP-SP) ಪಡೆಯಬಹುದು.
* PRAN ಅರ್ಜಿ ನಮೂನೆಯಲ್ಲಿ ಎಲ್ಲಾ ವಿವರಗಳನ್ನು ಸಹಿ, ಛಾಯಾಚಿತ್ರ ಯೋಜನೆಯ ಆದ್ಯತೆಯೊಂದಿಗೆ ಭರ್ತಿ ಮಾಡಬೇಕು. ಗುರುತಿನ ಪುರಾವೆ ಮತ್ತು ವಿಳಾಸ ಪುರಾವೆಯೊಂದಿಗೆ ಕೆವೈಸಿ ಸಲ್ಲಿಕೆ ಮಾಡಿ
* ಹತ್ತಿರದ ಪಾಯಿಂಟ್ ಆಫ್ ಪ್ರೆಸೆನ್ಸ್-ಸೇವಾ ಪೂರೈಕೆದಾರರಿಗೆ ಅರ್ಜಿ ನಮೂನೆಯನ್ನು ಸಲ್ಲಿಸಿ.
* https://cra-nsdl.com/CRA/pranCardStatusInput.do ಮೂಲಕ ರಸೀದಿ ಸಂಖ್ಯೆಯೊಂದಿಗೆ ನಿಮ್ಮ PRAN ಅಪ್ಲಿಕೇಶನ್ ಸ್ಟೇಟಸ್ ನೋಡಬಹುದು
* ಮೊದಲ ಕೊಡುಗೆಯಾಗಿ ಕನಿಷ್ಠ 500 ರೂಪಾಯಿಯನ್ನು ಪಾವತಿ ಮಾಡಬೇಕು.

ಎನ್‌ಪಿಎಸ್ ಖಾತೆಯಿಂದ ಹಣ ಹಿಂಪಡೆಯುವುದು ಹೇಗೆ?

ಮೆಚ್ಯೂರಿಟಿ: ಮುಕ್ತಾಯದ ಸಮಯದಲ್ಲಿ (60 ವರ್ಷಗಳು) ಶೇಕಡ 60ರಷ್ಟು ತೆರಿಗೆ ಮುಕ್ತವಾಗಿ ಪಡೆಯಬಹುದು. ಶೇಕಡ 40ರಷ್ಟು ವರ್ಷಾಶನದಲ್ಲಿ ಹೂಡಿಕೆ ಮಾಡಲಾಗುತ್ತದೆ. 5 ಲಕ್ಷ ರೂಪಾಯಿವರೆಗಿನ ಕಾರ್ಪಸ್ ಅನ್ನು ಸಂಪೂರ್ಣವಾಗಿ ಹಿಂಪಡೆಯಬಹುದು.
ಅಕಾಲಿಕ ಖಾತೆ ಮುಚ್ಚುವಿಕೆ: 5 ವರ್ಷಗಳ ನಂತರ ಖಾತೆಯನ್ನು ಮುಚ್ಚಲು ಅನುಮತಿ ಇದೆ. ಶೇಕಡ 20ರಷ್ಟು ತೆರಿಗೆ ಮುಕ್ತವಾಗಿದೆ. ಉಳಿದ ಶೇಕಡ 80ರಷ್ಟು ಪಿಂಚಣಿಗಾಗಿ ವರ್ಷಾಶನದಲ್ಲಿ ಹೂಡಿಕೆ ಮಾಡಬೇಕು. ಮೊತ್ತ 2.5 ಲಕ್ಷಕ್ಕಿಂತ ಕಡಿಮೆ ಅಥವಾ ಸಮನಾಗಿದ್ದರೆ ಪೂರ್ಣ ಮೊತ್ತವನ್ನು ಹಿಂಪಡೆಯಬಹುದು.
ಮರಣ: ಮರಣದ ಸಂದರ್ಭದಲ್ಲಿ ಶೇಕಡ 100ರಷ್ಟು ಮೊತ್ತವನ್ನು ನಾಮಿನಿಗೆ ಪಾವತಿಸಲಾಗುತ್ತದೆ
ಅಕಾಲಿಕ ವಾಪಸಾತಿ: ಅಕಾಲಿಕವಾಗಿ ಹಣ ಹಿಂಪಡೆಯುವಾಗ ಶೇಕಡ 25ರಷ್ಟು ಮೊತ್ತವನ್ನು ಹಿಂದಕ್ಕೆ ಪಡೆಯಬಹುದು. ಜೀವನದಲ್ಲಿ 3 ಬಾರಿ ಹಣವನ್ನು ಹಿಂದಕ್ಕೆ ಪಡೆಯಬಹುದು. ಮೊದಲನೆಯದಾಗಿ ಎನ್‌ಪಿಎಸ್ ಖಾತೆ ತೆರೆದು ತಿಂಗಳುಗಳ ಪೂರ್ಣಗೊಂಡ ಬಳಿಕ ಹಣ ಹಿಂಪಡೆಯಬಹುದು. ಎರಡನೇ ಹಾಗೂ ಮೂರನೇ ಬಾರಿ ಯಾವುದೇ ಸಂದರ್ಭದಲ್ಲಿಯೂ ಹಣವನ್ನು ಹಿಂಪಡೆಯಬಹುದು.