ಎಲೋನ್ ಮಸ್ಕ್‌ ಯೂ ಟರ್ನ್: ಬಿಟ್‌ಕಾಯಿನ್‌ ಬೆಲೆ ಕುಸಿತ

ಕ್ರಿಪ್ಟೋಕರೆನ್ಸಿ ಬಿಟ್‌ಕಾಯಿನ್‌ ಕಳೆದ ಕೆಲವು ತಿಂಗಳುಗಳಲ್ಲಿ ಭಾರೀ ಬೇಡಿಕೆಯನ್ನ ಸೃಷ್ಟಿಸಿತ್ತು. ಅದರಲ್ಲೂ ಸ್ಪೇಸ್‌ ಎಕ್ಸ್‌ ಮತ್ತು ಟೆಸ್ಲಾ ಸಿಇಒ ಎಲೋನ್‌ ಮಸ್ಕ್‌ರ ಒಂದು ಹೇಳಿಕೆಯು ಬಿಟ್‌ಕಾಯಿನ್‌ ಮೌಲ್ಯ ದಿಢೀರ್ ಏರಿಕೆಗೆ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ.

ವಿಶ್ವದ ಟಾಪ್ ಶ್ರೀಮಂತರಲ್ಲಿ ಒಬ್ಬರಾದ ಎಲೋನ್‌ ಮಸ್ಕ್‌ ಮಾಲೀಕತ್ವದ ಟೆಸ್ಲಾ ಜನವರಿ 2021 ರಲ್ಲಿ 1.5 ಬಿಲಿಯನ್ ಡಾಲರ್ ಮೌಲ್ಯದ ಬಿಟ್‌ಕಾಯಿನ್‌ಗಳನ್ನು ಖರೀದಿಸಿದೆ ಎಂದು ಪ್ರಕಟಿಸಿತು. ಜೊತೆಗೆ ಟೆಸ್ಲಾ ಕಾರುಗಳ ಖರೀದಿಗೆ ಬಿಟ್‌ಕಾಯಿನ್ ಸ್ವೀಕರಿಸುವುದಾಗಿ ತಿಳಿಸಿದ್ದರು. ಆದರೆ ಎಲೋನ್ ಮಸ್ಕ್‌ ಈಗ ಯು ಟರ್ನ್ ಹೊಡೆದಿದ್ದಾರೆ.

ಟೆಸ್ಲಾ ಕಾರು ಮಾರಾಟಕ್ಕೆ ಬಿಟ್‌ಕಾಯಿನ್‌ ಸ್ವೀಕರಿಸುವುದಿಲ್ಲ ಎಂದು ಎಲೋನ್ ಮಸ್ಕ್‌ ಹೇಳಿದ್ದಾರೆ. ಎಲೆಕ್ಟ್ರಿಕ್-ವಾಹನ ತಯಾರಕರು ಬಿಟ್‌ಕಾಯಿನ್‌ನೊಂದಿಗೆ ಖರೀದಿಯನ್ನು ಸ್ಥಗಿತಗೊಳಿಸುವುದಾಗಿ ಸುದ್ದಿ ಹೊರಬಿದ್ದ ಬಳಿಕ ಕ್ರಿಪ್ಟೋಕರೆನ್ಸಿ ಬಿಟಕಾಯಿನ್ ಮೌಲ್ಯ ಕುಸಿದಿದೆ.

ಕಳೆದ ಇಪ್ಪತ್ನಾಲ್ಕು ಗಂಟೆಗಳಲ್ಲಿ ಬಿಟ್‌ಕಾಯಿನ್ ಸಾಕಷ್ಟು ಏರಿಳಿತವನ್ನು ಕಂಡಿದೆ. ಇದರ ಗರಿಷ್ಠ ದರ 58,036.51 ಡಾಲರ್ ಆಗಿದ್ದರೆ, ಕಡಿಮೆ ದರ 46,294.72 ಡಾಲರ್ ಆಗಿದೆ. ಅಂದರೆ, ಕಳೆದ ಇಪ್ಪತ್ನಾಲ್ಕು ಗಂಟೆಗಳಲ್ಲಿ, ಬಿಟ್‌ಕಾಯಿನ್‌ನ ಬೆಲೆ ಸುಮಾರು 12000 ಡಾಲರ್ ( 4.2 ಲಕ್ಷ ರೂ.) ಏರಿಳಿತವಾಗಿದೆ.

ಏನಿದು ಬಿಟ್‌ಕಾಯಿನ್‌?
ಬಿಟ್‌ಕಾಯಿನ್‌ ಕ್ರಿಪ್ಟೋಕರೆನ್ಸಿಯಾಗಿದ್ದು, ಇದು ಆಧುನಿಕ ಡಿಜಿಟಲ್ ಯುಗದ ಡಿಜಿಟಲ್ ಕರೆನ್ಸಿ. ಇದಕ್ಕೆ ಮುದ್ರಣ ರೂಪ ಇಲ್ಲ. ಬಿಟ್ ಕಾಯಿನ್ ಎಂಬ ಕರೆನ್ಸಿಯು ಕೇವಲ ಎಲೆಕ್ಟ್ರಾನಿಕ್ ರೂಪದಲ್ಲಿದ್ದು, ರೂಪಾಯಿ, ಡಾಲರ್, ಯುರೋ ಗಳಂತೆ ಭೌತಿಕ ರೂಪದಲ್ಲಿ ಇರುವುದಿಲ್ಲ. ಅಲ್ಲದೇ ಇದಕ್ಕೆ ಯಾವುದೇ ದೇಶ, ಭಾಷೆ, ಬ್ಯಾಂಕು ಇದ್ಯಾವುದು ಇರುವುದಿಲ್ಲ.