700 ಕೋಟಿ ರುಪಾಯಿ ಮೌಲ್ಯದ ಬೋನಸ್ ಘೋಷಿಸಿದ HCL ಟೆಕ್

ಮಾಹಿತಿ ತಂತ್ರಜ್ಞಾನ ಸೇವೆ ಒದಗಿಸುವ ಪ್ರಮುಖ ಕಂಪೆನಿ ಎ‌ಚ್ ಸಿಎಲ್ ಟೆಕ್ನಾಲಜೀಸ್ (ಎಚ್ ಸಿಎಲ್) ಸೋಮವಾರ (ಫೆಬ್ರವರಿ 8, 2021) ಸಿಬ್ಬಂದಿಗೆ 700 ಕೋಟಿ ರುಪಾಯಿ ಮೌಲ್ಯದ ಒಂದು ಸಲದ ವಿಶೇಷ ಬೋನಸ್ ಘೋಷಣೆ ಮಾಡಿದೆ. 2020ನೇ ಸಾಲಿಗೆ ಆದಾಯ 10 ಬಿಲಿಯನ್ ಡಾಲರ್ ಮೈಲುಗಲ್ಲು ದಾಟಿದ ಸಾಧನೆಗಾಗಿ ವಿಶ್ವದಾದ್ಯಂತ ಇರುವ ಕಂಪೆನಿ ಸಿಬ್ಬಂದಿಗೆ ಬೋನಸ್ ನೀಡಲು ಕಂಪೆನಿ ನಿರ್ಧಾರ ಮಾಡಿದೆ.

ಒಂದು ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಸೇವೆ ಸಲ್ಲಿಸಿದ ಎಲ್ಲ ಸಿಬ್ಬಂದಿಗೆ ಹತ್ತು ದಿನದ ವೇತನವು ಬೋನಸ್ ಆಗಿ ದೊರೆಯಲಿದೆ. ಡಿಸೆಂಬರ್ 31, 2020ಕ್ಕೆ ಎಚ್ ಸಿಎಲ್ ಪೂರ್ಣಾವಧಿ ಸಿಬ್ಬಂದಿ ಸಂಖ್ಯೆ 1,59,682 ಇತ್ತು. 2020ರ ಕ್ಯಾಲೆಂಡರ್ ವರ್ಷದಲ್ಲಿ ಎಚ್ ಸಿಎಲ್ ಟೆಕ್ನಾಲಜೀಸ್ ಆದಾಯ 10 ಬಿಲಿಯನ್ ಅಮೆರಿಕನ್ ಡಾಲರ್ ದಾಟಿದೆ. ನಿಯಮಿತ ಕರೆನ್ಸಿ ಬೆಳವಣಿಗೆ ವರ್ಷದಿಂದ ವರ್ಷಕ್ಕೆ 3.6% ಆಗಿದೆ.

ಎಚ್ ಸಿಎಲ್ ಟೆಕ್ನಾಲಜೀಸ್ ಐಪಿಒ ಬಿಡುಗಡೆಯಾದ ಇಪ್ಪತ್ತು ವರ್ಷದೊಳಗೆ ಐತಿಹಾಸಿಕ ಸಾಧನೆ ಮಾಡಿರುವುದು ಸಿಬ್ಬಂದಿಯ ನಿಯಮಿತವಾದ ಸಾಧನೆ ಹಾಗೂ ಅಮೋಘ ಪರಿಶ್ರಮ ಎಂದು ಎಚ್ ಸಿಎಲ್ ಟೆಕ್ ಹೇಳಿಕೆಯಲ್ಲಿ ತಿಳಿಸಿದೆ. ಈ ವಿಶೇಷ ಬೋನಸ್ ಅನ್ನು ಫೆಬ್ರವರಿ 2021ಕ್ಕೆ ಸಿಬ್ಬಂದಿಗೆ ನೀಡಲಾಗುತ್ತದೆ. ಇದಕ್ಕಾಗಿ ಕೆಲವು ದೇಶಗಳಲ್ಲಿ $ 90 ಮಿಲಿಯನ್ ಪೇ ರೋಲ್ ತೆರಿಗೆ ಆಗುತ್ತದೆ ಎನ್ನಲಾಗಿದೆ.

ಎಚ್ ಸಿಎಲ್ ಟೆಕ್ನಾಲಜೀಸ್ ಷೇರಿನ ಬೆಲೆ ಕಳೆದ ಒಂದು ವರ್ಷದಲ್ಲಿ 60%ನಷ್ಟು ಏರಿಕೆ ಕಂಡಿದೆ. ಈಗಲೂ ಹಲವು ವಿಶ್ಲೇಷಕರು ಈ ಕಂಪೆನಿ ಷೇರಿನ ಖರೀದಿ ಶಿಫಾರಸು ಮಾಡುತ್ತಿದ್ದಾರೆ.