ಭಾರತದ ಆರ್ಥಿಕ ಬೆಳವಣಿಗೆ ಶೇ 4.5 ರಷ್ಟು ಕುಗ್ಗಲಿದೆ ಎಂದ ಐಎಂಎಫ್

ನವದೆಹಲಿ: 2020 ರಲ್ಲಿ ಭಾರತದ ಆರ್ಥಿಕತೆ ಶೇ 4.5 ರಷ್ಟು ಕುಗ್ಗುವ ನಿರೀಕ್ಷಿಸಿದೆ ಎಂದು ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ಬುಧವಾರ ಹೇಳಿದೆ.

ಕೊರೊನಾವೈರಸ್ ಸಾಂಕ್ರಾಮಿಕ ರೋಗವು ಭಾರತದ ಬಹುತೇಕ ಎಲ್ಲಾ ಆರ್ಥಿಕ ಚಟುವಟಿಕೆಗಳನ್ನು ನಿಧಾನಗೊಳಿಸಿದೆ. ಅದಾಗ್ಯೂ, 2021 ರಲ್ಲಿ ಶೇ 6 ರಷ್ಟು ಆರ್ಥಿಕ ಬೆಳವಣಿಗೆಯ ದರದೊಂದಿಗೆ ದೇಶವು ಮತ್ತೆ ಪುಟಿದೇಳುವ ನಿರೀಕ್ಷೆಯಿದೆ ಎಂದು ಐಎಂಎಫ್ ಹೇಳಿದೆ.

ಏಪ್ರಿಲ್‌ನಲ್ಲಿ ನಿರೀಕ್ಷಿಸಿದ್ದಕ್ಕಿಂತ ದೀರ್ಘಾವಧಿಯ ಲಾಕ್‌ಡೌನ್ ಮತ್ತು ನಿಧಾನಗತಿಯ ಚೇತರಿಕೆಯ ನಂತರ ಭಾರತದ ಆರ್ಥಿಕತೆಯು ಶೇಕಡಾ 4.5 ರಷ್ಟು ಸಂಕುಚಿತಗೊಳ್ಳುವ ನಿರೀಕ್ಷೆಯಿದೆ. ಇದೇ ಐಎಂಎಫ್ ಏಪ್ರಿಲ್‌ನಲ್ಲಿ ಶೇ 6 ರಷ್ಟು ಬೆಳವಣಿಗೆ ದರ ಇರಲಿದೆ ಎಂದು ಹೇಳಿತ್ತು. ಅಲ್ಲದೇ ಐಎಂಎಫ್ 2020 ರಲ್ಲಿ ಜಾಗತಿಕ ಬೆಳವಣಿಗೆಯನ್ನು ಶೇಕಡಾ 4.9 ಸಂಕುಚಿತಗೊಳ್ಳಲಿದೆ ಎಂದು ಅಂದಾಜಿಸಿದೆ.

2020 ರಲ್ಲಿ ಜಾಗತಿಕ ಆರ್ಥಿಕತೆ ಶೇ 4.5 ಕುಗ್ಗಲಿದೆ. ಅದರ ಪ್ರಮಾಣ 5.4 ನಷ್ಟು ಇರಲಿದೆ. ಈ ಬಿಕ್ಕಟ್ಟಿನ ಅಭೂತಪೂರ್ವ ಸ್ವರೂಪವನ್ನು ಗಮನಿಸಿದರೆ, ಬಹುತೇಕ ಎಲ್ಲ ದೇಶಗಳ ಆರ್ಥಿತೆಯೂ ತಳಮಟ್ಟಕ್ಕೆ ಕುಸಿಯಲಿದೆ. ಇದೊಂದು ಐತಿಹಾಸಿಕವಾದ್ದು ಎಂದು ಐಎಂಎಫ್‌ನ ಮುಖ್ಯ ಅರ್ಥಶಾಸ್ತ್ರಜ್ಞೆ ಗೀತಾ ಗೋಪಿನಾಥ್ ಹೇಳಿದ್ದಾರೆ.