ಸೆನ್ಸೆಕ್ಸ್ 211 ಪಾಯಿಂಟ್ಸ್ ಏರಿಕೆ: ಸಾರ್ವಕಾಲಿಕ ದಾಖಲೆ ಮಟ್ಟ ತಲುಪಿದ ನಿಫ್ಟಿ

ಭಾರತದ ಷೇರುಪೇಟೆ ಸೋಮವಾರ (ಅ.11) ನಕಾರಾತ್ಮಕ ಆರಂಭ ಪಡೆದರೂ ಆರ್‌ಐಎಲ್‌, ಆಟೊಮೊಬೈಲ್, ಮೆಟಲ್ ಷೇರುಗಳ ಏರಿಕೆಯಿಂದಾಗಿ ಏರುಮುಖದತ್ತ ಸಾಗಿದೆ. ಮುಂಬೈ ಷೇರುಪೇಟೆ ಸೆನ್ಸೆಕ್ಸ್ 211 ಪಾಯಿಂಟ್ಸ್ ಏರಿಕೆಗೊಂಡರೆ, ರಾಷ್ಟ್ರೀಯ ಷೇರುಪೇಟೆ ನಿಫ್ಟಿ ಸಾರ್ವಕಾಲಿಕ ದಾಖಲೆ ಮಾಡಿದೆ.

ಬೆಳಿಗ್ಗೆ 10.06ಗಂಟೆಗೆ ಬಿಎಸ್‌ಇ ಸೂಚ್ಯಂಕ ಸೆನ್ಸೆಕ್ಸ್ 211.18 ಪಾಯಿಂಟ್ಸ್ ಅಥವಾ ಶೇಕಡಾ 0.35ರಷ್ಟು ಏರಿಕೆಗೊಂಡು 60,270.24 ಪಾಯಿಂಟ್ಸ್ ತಲುಪಿದ್ರೆ, ಎನ್‌ಎಸ್‌ಇ ಸೂಚ್ಯಂಕ ನಿಫ್ಟಿ 78.50 ಪಾಯಿಂಟ್ಸ್ ಅಥವಾ ಶೇಕಡಾ 0.44ರಷ್ಟು ಹೆಚ್ಚಾಗಿ 17973.70 ಪಾಯಿಂಟ್ಸ್‌ ತಲುಪಿದೆ.

ದಿನದ ವಹಿವಾಟು ಆರಂಭದಲ್ಲಿ 1936 ಷೇರುಗಳು ಏರಿಕೆಗೊಂಡರೆ, 949 ಷೇರುಗಳು ಕುಸಿದವು ಮತ್ತು 132 ಷೇರುಗಳ ಮೌಲ್ಯದಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ.

ಏರಿಕೆಗೊಂಡ ಪ್ರಮುಖ ಷೇರುಗಳು

ಪವರ್ ಗ್ರಿಡ್ ಕಾರ್ಪೊರೇಷನ್ ಷೇರುಗಳು 4.50 ರೂ. ಏರಿಕೆಯಾಗಿ ರೂ. 194.90 ಕ್ಕೆ ಆರಂಭವಾಯಿತು. ಟಾಟಾ ಮೋಟಾರ್ಸ್ ನ ಷೇರುಗಳು ರೂ. 396.45 ಕ್ಕೆ ಆರಂಭವಾಗಿದ್ದು, ರೂ. 14 ರಷ್ಟು ಹೆಚ್ಚಾಗಿದೆ. ಕೋಲ್ ಇಂಡಿಯಾದ ಷೇರು ರೂ. 195.35 ರಲ್ಲಿ ಆರಂಭವಾಗಿದ್ದು ಸುಮಾರು 7 ರೂ. ಏರಿಕೆಗೊಂಡಿದ್ದು, ಮಾರುತಿ ಸುಜುಕಿಯ ಷೇರು ರೂ. 212 ರಷ್ಟು ಏರಿಕೆಯಾಗಿ ರೂ .7,642.25 ಕ್ಕೆ ಆರಂಭವಾಯಿತು. ಎನ್‌ಟಿಪಿಸಿಯ ಷೇರು ರೂ 144.35 ರಲ್ಲಿ ಪ್ರಾರಂಭವಾಯಿತು ಮತ್ತು ಸುಮಾರು 3 ರೂಪಾಯಿಗಳ ಲಾಭಗಳಿಸಿದೆ.

52 ವಾರಗಳ ಗರಿಷ್ಠ ಮಟ್ಟದಲ್ಲಿ RIL ಮತ್ತು ಟಾಟಾ ಮೋಟಾರ್ಸ್‌

ಏರುಮುಖದತ್ತ ಸಾಗಿರುವ ಟಾಟಾ ಮೋಟಾರ್ಸ್ ಷೇರುಗಳ ರ್ಯಾಲಿ ಮುಂದುವರಿದಿದೆ. ಟಾಟಾ ಮೋಟಾರ್ಸ್‌ 52 ವಾರಗಳ ಗರಿಷ್ಠ ಮಟ್ಟವನ್ನ ತಲುಪಿದ್ದು, ಇಂದು ಎನ್‌ಎಸ್‌ಇನಲ್ಲಿ 415.60 ರೂಪಾಯಿಗೆ ತಲುಪಿದೆ. ಇದರ ಜೊತೆಗೆ ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ (RIL) ಷೇರುಗಳು ಕೂಡ 52 ವಾರಗಳ ಗರಿಷ್ಠ ಮಟ್ಟವನ್ನು ದಾಟಿ ಹೋಗಿದೆ.

ರಿಲಯನ್ಸ್ ಇಂಡಸ್ಟ್ರೀಸ್ ಮತ್ತು ಸ್ಟರ್ಲಿಂಗ್ ಮತ್ತು ವಿಲ್ಸನ್ ಸೋಲಾರ್ ಲಿಮಿಟೆಡ್ (SWSL) ಷೇರುಗಳು ಹಿಂದಿನ 52 ಗಂಟೆಗಳ ಗರಿಷ್ಠ ಮಟ್ಟವನ್ನು ತಲುಪಿದವು. ಬೆಳಿಗ್ಗೆ 10.22 ರ ಸುಮಾರಿಗೆ, ಆರ್‌ಐಎಲ್ ಸೆನ್ಸೆಕ್ಸ್‌ನಲ್ಲಿ 0.8% ಏರಿಕೆಯಾಗಿ ಪ್ರತಿ ಷೇರಿಗೆ 2,692 ರೂಪಾಯಿಗಳಂತೆ ವಹಿವಾಟು ನಡೆಸುತ್ತಿದೆ.

 

ಇಳಿಕೆಗೊಂಡ ಪ್ರಮುಖ ಷೇರುಗಳು

ಟಿಸಿಎಸ್ ಷೇರುಗಳು ರೂ. 3,696.10 ರಲ್ಲಿ ಆರಂಭವಾಗಿದ್ದು, ಸುಮಾರು ರೂ . 240ರಷ್ಟು ಇಳಿಕೆಯಾಗಿದೆ. ಟೆಕ್ ಮಹೀಂದ್ರಾ ಷೇರುಗಳು ರೂ. 1396.05 ಕ್ಕೆ ಪ್ರಾರಂಭವಾದವು, ಸುಮಾರು 44 ರೂ. ಕುಸಿದಿದೆ. ವಿಪ್ರೋ ಸ್ಟಾಕ್ ರೂ. 640.85 ಕ್ಕೆ ಆರಂಭವಾಯಿತು, ಸುಮಾರು 20 ರೂ. ಇಳಿಕೆಗೊಂಡಿದೆ. ಎಚ್‌ಸಿಎಲ್ ಟೆಕ್‌ನ ಷೇರುಗಳು ರೂ. 1,280.85 ಕ್ಕೆ ಆರಂಭವಾಗಿದ್ದು, ರೂ. 41 ರಷ್ಟು ಇಳಿಕೆಯಾಗಿದೆ. ಇನ್ಫೋಸಿಸ್ ಷೇರುಗಳು ರೂ. 1,676.30 ಕ್ಕೆ ಆರಂಭವಾಗಿದ್ದು, ಸುಮಾರು ರೂ. 48 ರಷ್ಟು ಕುಸಿದಿದೆ.

ಷೇರಿನಲ್ಲಿ ಹೂಡಿಕೆ ಮಾಡುವುದು ಹೇಗೆ?

ಒಂದು ವೇಳೆ ಷೇರು ಮಾರುಕಟ್ಟೆಯಲ್ಲಿ ನೀವು ಹೂಡಿಕೆ ಮಾಡುವ ಬಯಕೆ ಇದ್ದರೆ, ಮೊದಲು ಸ್ಟಾಕ್ ಬ್ರೋಕರ್‌ನೊಂದಿಗೆ ಡಿಮ್ಯಾಟ್ ಮತ್ತು ಟ್ರೇಡಿಂಗ್ ಖಾತೆಯನ್ನು ತೆರೆಯಬೇಕು. ಷೇರುಗಳನ್ನು ನೇರವಾಗಿ ಷೇರು ವಿನಿಮಯ ಕೇಂದ್ರದಿಂದ ಖರೀದಿಸಲು ಸಾಧ್ಯವಿಲ್ಲ. ಡಿಮ್ಯಾಟ್ ಮತ್ತು ಟ್ರೇಡಿಂಗ್ ಖಾತೆಯನ್ನು ತೆರೆಯಲು ಪ್ಯಾನ್, ಆಧಾರ್ ಮತ್ತು ಬ್ಯಾಂಕ್ ಖಾತೆ ಅಗತ್ಯವಿದೆ. ನೀವು ಈ ದಾಖಲೆಗಳನ್ನು ಹೊಂದಿದ್ದರೆ, ನೀವು ಸುಲಭವಾಗಿ ಬ್ರೋಕರ್‌ನೊಂದಿಗೆ ಖಾತೆಯನ್ನು ತೆರೆಯಬಹುದು ಮತ್ತು ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಲು ಪ್ರಾರಂಭಿಸಬಹುದು.

ಡಾಲರ್ ಎದುರು ರೂಪಾಯಿ

ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ಡಾಲರ್ ಎದುರು ರೂಪಾಯಿ ಇಂದು ದುರ್ಬಲತೆಯಿಂದ ಆರಂಭವಾಯಿತು. ಇಂದು ರೂಪಾಯಿ 14 ಪೈಸೆ ದೌರ್ಬಲ್ಯದೊಂದಿಗೆ ಡಾಲರ್ ಎದುರು 75.12 ರೂ. ತಲುಪಿದೆ. ಅದೇ ಸಮಯದಲ್ಲಿ, ಶುಕ್ರವಾರ, ಡಾಲರ್ ಎದುರು ರೂಪಾಯಿ 21 ಪೈಸೆ ಕುಸಿತದೊಂದಿಗೆ 74.98 ಮಟ್ಟದಲ್ಲಿ ಕೊನೆಗೊಂಡಿತು. ಡಾಲರ್‌ಗಳ ವಹಿವಾಟನ್ನು ಬಹಳ ಬುದ್ಧಿವಂತಿಕೆಯಿಂದ ಮಾಡಬೇಕಾಗಿದೆ, ಇಲ್ಲದಿದ್ದರೆ ಹೂಡಿಕೆಯು ತೊಂದರೆಗೊಳಗಾಗಬಹುದು.