ಯೆಸ್ ಬ್ಯಾಂಕ್ 200 ಕೋಟಿ ಹಗರಣ: HDIL ರಾಕೇಶ್ ವಾಧ್ವಾನ್, ಸಾರಂಗ್ ವಾಧ್ವಾನ್ ವಿರುದ್ಧ ಸಿಬಿಐ ಪ್ರಕರಣ

ಯೆಸ್ ಬ್ಯಾಂಕ್ ನಲ್ಲಿ ನಡೆದಿದೆ ಎನ್ನಲಾದ 200 ಕೋಟಿ ರುಪಾಯಿ ವಂಚನೆ ಆರೋಪದಲ್ಲಿ ಎಚ್ ಡಿಐಎಲ್ ಪ್ರವರ್ತಕರಾದ ರಾಕೇಶ್ ವಾಧ್ವಾನ್, ಸಾರಂಗ್ ವಾಧ್ವಾನ್, ಇತರ ನಿರ್ದೇಶಕರು, ಸಂಸ್ಥೆಯ ಲೆಕ್ಕ ಪರಿಶೋಧಕರ ವಿರುದ್ಧ ಕೇಂದ್ರೀಯ ತನಿಖಾ ದಳ (ಸಿಬಿಐ) ಪ್ರಕರಣ ದಾಖಲಿಸಿದೆ.

ಪ್ರಕರಣ ದಾಖಲಾದ ನಂತರ ರಾಕೇಶ್ ವಾಧ್ವಾನ್ ಮತ್ತು ಅವರ ಮಗ ಸಾರಂಗ್ ವಾಧ್ವಾನ್ ರ ಮುಂಬೈನಲ್ಲಿರುವ ಮನೆಗಳಲ್ಲಿ ಸಿಬಿಐನಿಂದ ಶೋಧ ನಡೆಸಲಾಗಿದೆ. ಮುಂಬೈನಲ್ಲಿನ ಇತರ ಒಂಬತ್ತು ಕಡೆಗಳಲ್ಲಿ ಸಿಬಿಐ ಶೋಧ ಕಾರ್ಯಾಚರಣೆ ನಡೆಸಿದೆ. ಅದಲ್ಲಿ ಎಚ್ ಡಿಐಎಲ್ ಗೆ ಸೇರಿದ ಎರಡು ಕಚೇರಿ ಸಹ ಒಳಗೊಂಡಿದೆ ಎಂದು ಹೇಳಲಾಗಿದೆ.

ಆರೋಪ ಮಾಡಿರುವ ಪ್ರಕಾರ, ಯೆಸ್ ಬ್ಯಾಂಕ್ ನಿಂದ ಮ್ಯಾಕ್ ಸ್ಟಾರ್ ಎಂಬ ಕಂಪೆನಿಗೆ ಸಾಲ ನೀಡಲಾಗಿದೆ. ಆ ಕಂಪೆನಿಯಲ್ಲಿ ಎಚ್ ಡಿಐಎಲ್ ಗೆ ಸ್ವಲ್ಪ ಪ್ರಮಾಣದ ಷೇರಿದೆ. ಯೆಸ್ ಬ್ಯಾಂಕ್ ನಿಂದ ಮ್ಯಾಕ್ ಸ್ಟಾರ್ ಗೆ ವರ್ಗಾವಣೆಯಾದ ಸಾಲದ ಹಣವನ್ನು ಆ ನಂತರ ಕಂಪೆನಿಯು ಎಚ್ ಡಿಐಎಲ್ ಸಮೂಹದ ಕಂಪೆನಿಗಳ ಖಾತೆಗೆ ವರ್ಗಾವಣೆ ಮಾಡಿದೆ.

ಯೆಸ್ ಬ್ಯಾಂಕ್ ಗೆ ಸಾಲ ಮರುಪಾವತಿಸಲು ಹೀಗೆ ಹಣ ವರ್ಗಾಯಿಸಿದ್ದಾಗಿ ತಿಳಿಸಿದೆ ಎಂದು ಹೇಳಲಾಗಿದೆ. ಆದರೆ ಸಾರಂಗ್ ವಾಧ್ವಾನ್ ಅವರು ಇದನ್ನು ನಿರಾಕರಿಸಿದ್ದಾರೆ. ಯಾವುದೇ ತಪ್ಪಾದ ವ್ಯವಹಾರ ನಡೆಸಿಲ್ಲ ಎಂದಿದ್ದಾರೆ.