ಐಟಿ ರಿಟರ್ನ್ಸ್‌ನಲ್ಲಿ ಕ್ರಿಪ್ಟೋಕರೆನ್ಸಿ ಲಾಭ ನಮೂದಿಸುವುದು ಹೇಗೆ?

ಪ್ರಪಂಚದಾದ್ಯಂತ ಬಹಳಷ್ಟು ಜನರು ಕ್ರಿಪ್ಟೋಕರೆನ್ಸಿಗಳಲ್ಲಿ ಭಾರೀ ಮೊತ್ತವನ್ನು ಹೂಡಿಕೆ ಮಾಡುತ್ತಿದ್ದಾರೆ. ಇದನ್ನು "ಕ್ರಿಪ್ಟೋ" ಅಥವಾ "ಟೋಕನ್" ಎಂದೂ ಕರೆಯುತ್ತಾರೆ. ಕಳೆದೆರಡು ವರ್ಷಗಳಲ್ಲಿ ಭಾರತದಲ್ಲಿ ಕ್ರಿಪ್ಟೋಕರೆನ್ಸಿಗಳಲ್ಲಿ ಹೂಡಿಕೆ ಮಾಡುವವರ ಸಂಖ್ಯೆ ಗಣನೀಯವಾಗಿ ಬೆಳೆದಿದೆ.

ಕೇಂದ್ರ ಬಜೆಟ್ 2022-23 ಅನ್ನು ಪ್ರಸ್ತುತಪಡಿಸುವಾಗ, ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಕ್ರಿಪ್ಟೋಕರೆನ್ಸಿಗಳಲ್ಲಿ ಹೂಡಿಕೆ ಮಾಡುವ ಎಲ್ಲರಿಗೂ ಪ್ರಮುಖವಾದ ಘೋಷಣೆಯನ್ನು ಮಾಡಿದ್ದಾರೆ. ಈ ವರ್ಷದಿಂದ ಕ್ರಿಪ್ಟೋಕರೆನ್ಸಿ ಲಾಭಗಳು ಮತ್ತು ಆದಾಯದ ಮೇಲೆ 30 ಪ್ರತಿಶತ ತೆರಿಗೆಯನ್ನು ವಿಧಿಸಲಾಗುವುದು ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿದ್ದಾರೆ.

ಐಟಿಆರ್‌ ಫಾರ್ಮ್‌ನಲ್ಲಿ ಕ್ರಿಪ್ಟೋಕರೆನ್ಸಿ ಆದಾಯದ ವಿವರಕ್ಕೆ ಪ್ರತ್ಯೇಕ ಕಾಲಮ್‌

ಈಗಿನಂತೆ, ಆದಾಯ ತೆರಿಗೆ ಕಾಯಿದೆ 1961 ರಲ್ಲಿ ಕ್ರಿಪ್ಟೋಕರೆನ್ಸಿಗಳ ತೆರಿಗೆಯ ಮೇಲೆ ಯಾವುದೇ ನಿರ್ದಿಷ್ಟ ತೆರಿಗೆ ನಿಬಂಧನೆಗಳಿಲ್ಲ ಎಂಬುದನ್ನು ನಾವು ಈ ಸಂದರ್ಭದಲ್ಲಿ ಗಮನಿಸಬೇಕು. ಕ್ರಿಪ್ಟೋಗಳಲ್ಲಿ ಹೂಡಿಕೆ ಮಾಡುವವರು ತಮ್ಮ ತೆರಿಗೆಗಳಲ್ಲಿ ತಮ್ಮ ಲಾಭವನ್ನು ನಮೂದಿಸುತ್ತಿದ್ದಾರೆಯೇ ಎಂದು ಖಚಿತಪಡಿಸಿಕೊಳ್ಳಬೇಕು. ಹಾಗೆ ಮಾಡಲು ವಿಫಲವಾದರೆ ಮುಂದೆ ಐಟಿ ಇಲಾಖೆಯ ಕ್ರಮಕ್ಕೆ ನೀವು ಒಳಗಾಗಬೇಕಾಗುತ್ತದೆ.

ವ್ಯಾಪಾರ ಆದಾಯ ಅಥವಾ ಬಂಡವಾಳ ಲಾಭಗಳ ವರ್ಗಗಳ ಅಡಿಯಲ್ಲಿ ತಮ್ಮ ಆದಾಯ ತೆರಿಗೆ ರಿಟರ್ನ್ಸ್‌ನಲ್ಲಿ ತಮ್ಮ ಲಾಭಗಳನ್ನು ನಮೂದಿಸುವ ಆಯ್ಕೆ ಯಾವಾಗಲೂ ಇದೆ. ಅದೇ ವರ್ಗೀಕರಣವು ಹೂಡಿಕೆದಾರರ ಉದ್ದೇಶ ಮತ್ತು ಈ ವಹಿವಾಟಿನ ಸ್ವರೂಪವನ್ನು ಅವಲಂಬಿಸಿರುತ್ತದೆ. ಕೇಂದ್ರ ಬಜೆಟ್‌ 2022ರ ಪ್ರಕಾರ ಕ್ರಿಪ್ಟೋಕರೆನ್ಸಿ ಲಾಭಗಳ ಮೇಲಿನ ತೆರಿಗೆಯ ಬಗ್ಗೆ ನೀವು ತಿಳಿದುಕೊಳ್ಳಬೇಕಾದ ಮಾಹಿತಿ ಇಲ್ಲಿದೆ ಮುಂದೆ ಓದಿ.

ಬಿಟ್‌ಕಾಯಿನ್, ಎಥೆರಿಯಮ್ ಬಗ್ಗೆ ಹಣಕಾಸು ಕಾರ್ಯದರ್ಶಿ ಮಹತ್ವದ ಹೇಳಿಕೆ

* ಕ್ರಿಪ್ಟೋಸ್ ಮತ್ತು ಎನ್‌ಎಫ್‌ಟಿಗಳಂತಹ ವರ್ಚುವಲ್ ಡಿಜಿಟಲ್ ಆಸ್ತಿಗಳ ವರ್ಗಾವಣೆಯಿಂದ ಬರುವ ಆದಾಯದ ಮೇಲೆ 30 ಪ್ರತಿಶತ ತೆರಿಗೆಯನ್ನು ವಿಧಿಸಲಾಗುತ್ತದೆ.
* ಕ್ರಿಪ್ಟೋ ಲಾಭಗಳ ಮೇಲಿನ ಆದಾಯ ತೆರಿಗೆಯನ್ನು ವರದಿ ಮಾಡುವಾಗ, ಸ್ವಾಧೀನದ ವೆಚ್ಚವನ್ನು ಹೊರತುಪಡಿಸಿ ಯಾವುದೇ ಕಡಿತವನ್ನು ಅನುಮತಿಸಲಾಗುವುದಿಲ್ಲ.
* ಕ್ರಿಪ್ಟೋಸ್ ಅಥವಾ ಯಾವುದೇ ಡಿಜಿಟಲ್ ಸ್ವತ್ತುಗಳಿಂದ ನಷ್ಟವನ್ನು ಯಾವುದೇ ಇತರ ಆದಾಯದ ವಿರುದ್ಧ ಹೊಂದಿಸಲಾಗುವುದಿಲ್ಲ.
* ಡಿಜಿಟಲ್ ಆಸ್ತಿಗಳನ್ನು ಉಡುಗೊರೆಯಾಗಿ ಸ್ವೀಕರಿಸುವವರಿಗೂ ತೆರಿಗೆ ವಿಧಿಸಲಾಗುತ್ತದೆ.

ವ್ಯಾಪಾರ ಆದಾಯದ ಅಡಿಯಲ್ಲಿ ಕ್ರಿಪ್ಟೋಕರೆನ್ಸಿ ತೆರಿಗೆ

ಒಬ್ಬ ವ್ಯಕ್ತಿಯು ಆಗಾಗ್ಗೆ ಕ್ರಿಪ್ಟೋಸ್‌ನಲ್ಲಿ ಹೂಡಿಕೆ ಮಾಡುತ್ತಿದ್ದರೆ ಮತ್ತು ಗಮನಾರ್ಹ ಲಾಭದೊಂದಿಗೆ ಹೆಚ್ಚಿನ ಪ್ರಮಾಣದಲ್ಲಿ ವ್ಯಾಪಾರ ನಡೆಸುತ್ತಿದ್ದರೆ, ಕ್ರಿಪ್ಟೋಕರೆನ್ಸಿಯಿಂದ ಬರುವ ಲಾಭವನ್ನು ಆದಾಯ ಎಂದು ಪರಿಗಣಿಸಿ ತೆರಿಗೆ ವಿಧಿಸಲಾಗುತ್ತದೆ. ಕ್ರಿಪ್ಟೋಗಳ ತೆರಿಗೆಯು ಪ್ರತಿ ಹೂಡಿಕೆದಾರರಿಗೆ ವಿಭಿನ್ನವಾಗಿರುತ್ತದೆ. ಈ ನಿಟ್ಟಿನಲ್ಲಿ ಕ್ರಿಪ್ಟೋಕರೆನ್ಸಿ ಹೂಡಿಕೆದಾರರು ತಮ್ಮ ಐಟಿಆರ್‌ ಅನ್ನು ಸಲ್ಲಿಸುವ ಮೊದಲು ತಜ್ಞರ ಸಲಹೆಯನ್ನು ಪಡೆಯುವುದು ಉತ್ತಮವಾಗಿದೆ.

ಬಂಡವಾಳ ಲಾಭದ ಅಡಿಯಲ್ಲಿ ಕ್ರಿಪ್ಟೋಕರೆನ್ಸಿ ತೆರಿಗೆ

ಒಬ್ಬ ವ್ಯಕ್ತಿಯು ಕ್ರಿಪ್ಟೋಕರೆನ್ಸಿಯಲ್ಲಿ ಕಡಿಮೆ ಸಂಖ್ಯೆಯ ವಹಿವಾಟುಗಳನ್ನು ನಡೆಸುತ್ತಿದ್ದರೆ, ನಂತರ ಕ್ರಿಪ್ಟೋ ಲಾಭಗಳಿಂದ ತೆರಿಗೆಯನ್ನು ಬಂಡವಾಳ ಲಾಭಗಳ ವಿಭಾಗದ ಅಡಿಯಲ್ಲಿ ಸಲ್ಲಿಸಬಹುದು. ವಹಿವಾಟಿನ ಮಾರಾಟದ ಮೌಲ್ಯವು ವೆಚ್ಚಕ್ಕಿಂತ ಹೆಚ್ಚಿದ್ದರೆ, ಅದನ್ನು ಬಂಡವಾಳದ ಲಾಭವೆಂದು ಪರಿಗಣಿಸಲಾಗುತ್ತದೆ.

ಇನ್ನು ಆದಾಯ ತೆರಿಗೆ ರಿಟರ್ನ್ಸ್ ಕುರಿತು ಬಜೆಟ್ ಘೋಷಣೆಯ ಒಂದು ದಿನದ ನಂತರ, ಕಂದಾಯ ಕಾರ್ಯದರ್ಶಿ ತರುಣ್ ಬಜಾಜ್ ಮುಂದಿನ ವರ್ಷದಿಂದ ಆದಾಯ ತೆರಿಗೆ ರಿಟರ್ನ್ ಫಾರ್ಮ್‌ಗಳು ಕ್ರಿಪ್ಟೋಕರೆನ್ಸಿಗಳಿಂದ ಪಡೆದ ಆದಾಯದ ವಿವರಕ್ಕಾಗಿ ಪ್ರತ್ಯೇಕ ಕಾಲಮ್ ಅನ್ನು ಹೊಂದಿರುತ್ತವೆ ಎಂದು ತಿಳಿಸಿದ್ದಾರೆ. "ಮುಂದಿನ ವರ್ಷ ITR ಫಾರ್ಮ್ ಕ್ರಿಪ್ಟೋಗಾಗಿ ಪ್ರತ್ಯೇಕ ಕಾಲಮ್ ಇರಲಿದೆ. ಹೌದು ನೀವು ಈ ಮೂಲಕ ಕ್ರಿಪ್ಟೋ ಆದಾಯವನ್ನು ಬಹಿರಂಗಪಡಿಸಬೇಕಾಗಿದೆ," ಎಂದು ಕಂದಾಯ ಕಾರ್ಯದರ್ಶಿ ತರುಣ್ ಬಜಾಜ್ ಹೇಳಿದ್ದಾರೆ.

ಈ ಬಗ್ಗೆ ಸುದ್ದಿ ಸಂಸ್ಥೆ ಪಿಟಿಐಗೆ ವಿವರಗಳನ್ನು ನೀಡಿದ ತರುಣ್‌ ಬಜಾಜ್, "ಕ್ರಿಪ್ಟೋಕರೆನ್ಸಿಗಳಿಂದ ಬರುವ ಲಾಭಗಳು ಯಾವಾಗಲೂ ತೆರಿಗೆಗೆ ಒಳಪಡುತ್ತವೆ. ಬಜೆಟ್ ಪ್ರಸ್ತಾಪಿಸಿರುವುದು ಹೊಸ ತೆರಿಗೆಯಲ್ಲ ಬದಲಾಗಿ ಸಮಸ್ಯೆಯ ಬಗ್ಗೆ ಒಂದು ಖಚಿತತೆಯನ್ನು ಬಜೆಟ್‌ನಲ್ಲಿ ವ್ಯಕ್ತಪಡಿಸಲಾಗಿದೆ," ಎಂದು ಅಭಿಪ್ರಾಯಪಟ್ಟರು.