ಪಿಎಂ ರೋಜ್‌ಗಾರ್ ಯೋಜನೆ 2022: ಅರ್ಹತೆ, ಲಾಭ ಇತರೆ ಮಾಹಿತಿ ಇಲ್ಲಿದೆ

ಪ್ರಧಾನ ಮಂತ್ರಿ ರೋಜ್‌ಗಾರ್ ಯೋಜನೆಯು ಯುವಕರಿಗೆ ಹಾಗೂ ಮಹಿಳೆಯರಿಗ, ಒಟ್ಟಾಗಿ ಸುಮಾರು ಹತ್ತು ಲಕ್ಷ ಜನರಿಗೆ ಉದ್ಯೋಗ ಸೃಷ್ಟಿ ಮಾಡುವ ಉದ್ದೇಶದಿಂದ ಆರಂಭ ಮಾಡಲಾಗಿದೆ. ಭಾರತ ಸರ್ಕಾರವು ಈ ಯೋಜನೆಯನ್ನು ಜಾರಿಗೆ ತಂದಿದೆ. ಈ ಯೋಜನೆಯು 1993ರಲ್ಲಿ ಆರಂಭ ಮಾಡಲಾಗಿದೆ.

ಗ್ರಾಮೀಣ ಹಾಗೂ ಸಣ್ಣ ಪಟ್ಟಣಗಳಲ್ಲಿ ವಿದ್ಯಾಭ್ಯಾಸ ಹೊಂದಿದ್ದರೂ ಉದ್ಯೋಗವಿಲ್ಲದ ಯುವಕರನ್ನು ಸ್ವ ಉದ್ಯೋಗದಲ್ಲಿ ತೊಡಗಿಕೊಳ್ಳಲು ಈ ಯೋಜನೆಯನ್ನು ಆರಂಭ ಮಾಡಲಾಗಿದೆ. ಬಳಿಕ ಮಹಿಳೆಯರಿಗೂ ಈ ಪ್ರಯೋಜನ ವಿಸ್ತರಣೆ ಮಾಡಲಾಗಿದೆ. ಈ ಯೋಜನೆಯಲ್ಲಿ ಸ್ವ ಉದ್ಯೋಗ ಮಾಡಲು ಬಯಸುವ ಯುವಕರು, ಮಹಿಳೆಯರು ಸಾಲ ಸೌಲಭ್ಯವನ್ನು ಪಡೆಯಬಹುದು.

ಪ್ರಮುಖವಾಗಿ ಯುವಕರು ಸ್ವ ಉದ್ಯೋಗ ಮಾಡಲು ಈ ಯೋಜನೆಯ ಪ್ರಯೋಜನವನ್ನು ಪಡೆಯುತ್ತಾರೆ. ಸರ್ಕಾರವು ಪ್ರೋತ್ಸಾಹಧನವನ್ನು ಕೂಡಾ ನೀಡುತ್ತದೆ. ದೇಶದಲ್ಲಿ ನಿರರುದ್ಯೋಗ ಭಾರೀ ಹೆಚ್ಚಳವಾಗಿದೆ. ಈ ನಿಟ್ಟಿನಲ್ಲಿ ಅಂದಿನ ನರಸಿಂಹ ರಾವ್ ನೇತೃತ್ವದ ಕಾಂಗ್ರೆಸ್ ಸರ್ಕಾರವು ಈ ಯೋಜನೆಯನ್ನು ಆರಂಭ ಮಾಡಿದೆ. ಪ್ರಸ್ತುತ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರ್ಕಾರವು ಈ ಯೋಜನೆಯನ್ನು ಮುಂದುವರಿಸಿಕೊಂಡು ಬಂದಿದೆ. ಹಾಗಾದರೆ ಈ ಯೋಜನೆಗೆ ಹೇಗೆ ಅರ್ಜಿ ಸಲ್ಲಿಸುವುದು, ಇಷ್ಟು ವರ್ಷಗಳಲ್ಲಿ ಈ ಯೋಜನೆಯಲ್ಲಿ ಏನೆಲ್ಲ ಬದಲಾವಣೆಯಾಗಿದೆ, ಅರ್ಹತೆ ಏನು ಎಂಬ ಬಗ್ಗೆ ಇಲ್ಲಿದೆ ಮಾಹಿತಿ ಮುಂದೆ ಓದಿ..

ಪಿಎಂಆರ್‌ವೈ ಗುರಿಯೇನು?

ಸುಮಾರು ಏಳು ಲಕ್ಷ ಸಣ್ಣ ಉದ್ಯಮಿಗಳು ಹಾಗೂ ವ್ಯಾಪಾರಿಗಳನ್ನು ಎರಡು ವರ್ಷ ಆರು ತಿಂಗಳಿನಲ್ಲಿ ಸೃಷ್ಟಿ ಮಾಡುವ ಗುರಿಯನ್ನು ಈ ಯೋಜನೆಯು ಹೊಂದಿದೆ. ಸಣ್ಣ ಕಾರ್ಖಾನೆಗಳ ಮೂಲಕ ಸ್ಥಳೀಯ ಸಂಪನ್ಮೂಲಗಳ ಸದ್ಬಳಕೆಗೆ ಕೂಡಾ ಈ ಯೋಜನೆಯಲ್ಲಿ ಅವಕಾಶ ನೀಡಲಾಗಿದೆ. ಸುಮಾರು ಒಂದು ಲಕ್ಷದವರೆಗಿನ ಸಾಲ ಸೌಲಭ್ಯಕ್ಕೆ ಯುವಕರು ಯಾವುದೇ ಮೇಲಾಧಾರವನ್ನು ನೀಡಬೇಕಾಗಿಲ್ಲ. ಸಾಮಾನ್ಯವಾಗಿ ಸಾಲಕ್ಕೆ ಮೇಲಾಧಾರ ನೀಡಬೇಕಾಗುತ್ತದೆ. ಆದರೆ ಇದಕ್ಕೆ ಮೇಲಾಧಾರ ಬೇಕಾಗಿಲ್ಲ.

ಪಿಎಂ ಯೋಜ್‌ಗಾರ್ ಯೋಜನೆಯ ಪ್ರಮುಖ ಅಂಶಗಳು

* ಶಿಕ್ಷಣ ಪಡೆದ, ಉದ್ಯೋಗವಿಲ್ಲದ 18-35 ವರ್ಷದವರು ಈ ಯೋಜನೆಯ ಪ್ರಯೋಜನ ಪಡೆಯಬಹುದು
* ಈ ಯೋಜನೆಯ ಪ್ರಯೋಜನ ಪಡೆಯಬೇಕಾದರೆ ಅರ್ಜಿದಾರರು ಎಂಟನೇ ತರಗತಿ ಉತ್ತೀರ್ಣರಾಗಿರಬೇಕು
* ಆಯಾ ಸಮಯಕ್ಕೆ ಸಂದರ್ಭದಂತೆ ಸಾಲದ ಮೇಲಿನ ಬಡ್ಡಿದರವು ಬದಲಾವಣೆಯಾಗಲಿದೆ
* ಸುಮಾರು ಮೂರರಿಂದ ಏಳು ವರ್ಷದವರೆಗೆ ಮರುಪಾವತಿ ಕಾಲವಾಗಿದೆ.
* ಈ ಯೋಜನೆಯ ಪ್ರಯೋಜನ ಪಡೆಯುವವರ ಕುಟುಂಬ 40 ಸಾವಿರಕ್ಕಿಂತ ಅಧಿಕ ಮಾಸಿಕ ಆದಾಯ ಹೊಂದಿರಬಾರದು
* ಯೋಜನೆಯ ಪ್ರಯೋಜನ ಪಡೆಯುವವರು ಪ್ರಸ್ತುತ ವಾಸವಿರುವ ಮನೆಯಲ್ಲಿ ಮೂರು ವರ್ಷವಾದರೂ ವಾಸವಿದ್ದರಬೇಕು. ಮೂರು ವರ್ಷದಿಂದ ಹೆಚ್ಚಿನ ಕಾಲ ಆ ಮನೆಯಲ್ಲೇ ವಾಸಿವಿದ್ದರೆ ಮಾತ್ರ ಯೋಜನೆಯ ಪ್ರಯೋಜನ ಲಭ್ಯವಾಗಲಿದೆ.
* ಯೋಜನೆಯ ಪ್ರಯೋಜನ ಪಡೆಯುವವರು ಯಾವುದೇ ಬ್ಯಾಂಕ್, ಹಣಕಾಸು ಸಂಸ್ಥೆಯಲ್ಲಿ ಸಾಲವನ್ನು ಮರುಪಾವತಿ ಮಾಡದೆ ಡಿಫಾಲ್ಟರ್ ಪಟ್ಟಿಗೆ ಸೇರಿರಬಾರದು
* ಫಲಾನುಭವಿಗಳಿಗೆ ಶೇಕಡ 15ರಷ್ಟು ಸಬ್ಸಿಡಿ ಲಭ್ಯವಾಗಲಿದೆ. ಸುಮಾರು 7500 ಸಬ್ಸಿಡಿ ಲಭ್ಯವಾಗಬಹುದು.
* ಎಸ್‌ಸಿ, ಎಸ್‌ಟಿ ಸೇರಿದಂತೆ ಮಹಿಳೆಯರಿಗೆ ಮೀಸಲಾತಿ ಇದೆ. ಈ ಸಮುದಾಯದ ಬೆಳವಣಿಗೆಗಾಗಿ ಈ ಯೋಜನೆಯಲ್ಲಿ ಮೀಸಲಾತಿ ಇಡಲಾಗಿದೆ.

ಯೋಜನೆಯ ವೆಚ್ಚವೆಷ್ಟು, ಜಾರಿ ಹೇಗೆ?

ಉದ್ಯಮಕ್ಕೆ ಎರಡು ಲಕ್ಷ ಹಾಗೂ ಇಂಡಸ್ಟ್ರಿ, ಸೇವಾ ವಲಯಕ್ಕೆ ಐದು ಲಕ್ಷದ ಯೋಜನೆ ಇದಾಗಿದೆ. ಸ್ವ ಉದ್ಯೋಗವನ್ನು ನಿರ್ವಹಣೆ ಮಾಡಲು ಸಾಧ್ಯವಾಗಲಿ ಎಂಬ ನಿಟ್ಟಿನಲ್ಲಿ ಸುಮಾರು 15-20 ದಿನಗಳ ಕಾಲ ತರಬೇತಿ ನೀಡಲಾಗುತ್ತದೆ. ಈ ಯೋಜನೆಯನ್ನು ಕೇಂದ್ರ ಸರ್ಕಾರವು ನಿರ್ವಹಣೆ ಮಾಡುತ್ತದೆ. ಈ ಯೋಜನೆಯ ಜಾರಿಯ ಜವಾಬ್ದಾರಿಯು ರಾಜ್ಯ ಮಟ್ಟದಲ್ಲಿ ಕಮಿಷನರ್ ಅಥವಾ ನಿರ್ದೇಶಕರಿಗೆ ಇರಲಿದೆ. ಎಲ್ಲಾ ರಾಜ್ಯದಲ್ಲಿ ಈ ಯೋಜನೆ ನಿರ್ವಹಣೆಗಾಗಿ ಸಮಿತಿ ಇರಲಿದೆ. ಈ ಯೋಜನೆಯಲ್ಲಿ ಟೀ ಗಾರ್ಡನ್, ಪ್ರಾಣಿ ಸಾಕಣೆ, ಮೀನುಗಾರಿಕೆ, ತೋಟಗಾರಿಕೆ, ಹಂದಿ ಸಾಕಣೆಯು ಒಳಗೊಂಡಿದೆ. ಸುಮಾರು 5-12ರಷ್ಟು ಸಾಲ ಸೌಲಭ್ಯ ಲಭ್ಯವಾಗಲಿದೆ.

ಸಾಲಕ್ಕೆ ಹೇಗೆ ಅರ್ಜಿ ಸಲ್ಲಿಕೆ ಮಾಡುವುದು?

* ಅಧಿಕೃತ ಸೈಟ್ https://pmrpy.gov.in/ ಗೆ ಭೇಟಿ ನೀಡಿ
* ಅರ್ಜಿಯನ್ನು ಡೌನ್‌ಲೋಡ್ ಮಾಡಿಕೊಳ್ಳಿ
* ಎಲ್ಲಾ ಅಗತ್ಯ ಮಾಹಿತಿಯನ್ನು ಭರ್ತಿ ಮಾಡಿಕೊಳ್ಳಿ
* ಭರ್ತಿ ಮಾಡಿದ ಅರ್ಜಿಯನ್ನು ನೀವು ಸಾಲ ಪಡೆಯಲು ಬಯಸುವ ಬ್ಯಾಂಕ್‌ಗೆ ಸಲ್ಲಿಕೆ ಮಾಡಿ
* ಬಳಿಕ ಬ್ಯಾಂಕ್ ಈ ಅರ್ಜಿ ಪರಿಶೀಲನೆ ಮಾಡಿ ನಿಮ್ಮನ್ನು ಸಂಪರ್ಕ ಮಾಡಲಿದೆ

ಯಾವೆಲ್ಲ ದಾಖಲೆ ಬೇಕು?

* ಇಡಿಪಿ ತರಬೇತಿ ಪ್ರಮಾಣಪತ್ರ
* ಡ್ರೈವಿಂಗ್ ಲೈಸೆನ್ಸ್
* ನೀವು ಯಾವ ಯೋಜನೆಯಡಿ ಸಾಲಕ್ಕೆ ಅರ್ಜಿ ಸಲ್ಲಿಸಿದ್ದೀರಿ ಎಂಬ ಮಾಹಿತಿ
* ವಿದ್ಯಾಭ್ಯಾಸ ಅರ್ಹತೆ, ಅನುಭವ ಮೊದಲಾದ ಪ್ರಮಾಣಪತ್ರ
* ನಿಮ್ಮ ಜನನ ದಿನಾಂಕ ಪ್ರಮಾಣೀಕರಿಸುವ ದಾಖಲೆ (ಜನನ ಪ್ರಮಾಣ ಪತ್ರ, ಎಸ್‌ಎಸ್‌ಎಲ್‌ಸಿ ಪ್ರಮಾಣಪತ್ರ)
* ನೀವು ಮೂರು ವರ್ಷ ಒಂದು ಮನೆಯಲ್ಲಿ ವಾಸವಿದ್ದೀರಿ ಎಂಬ ದಾಖಲೆ (ರೇಷನ್ ಕಾರ್ಡ್, ಬಿಲ್ ಮೊದಲಾದ ದಾಖಲೆ)
* ಕಂದಾಯ ಅಧಿಕಾರಿಗಳು ನೀಡಿದ ಆದಾಯ ಪ್ರಮಾಣಪತ್ರ
* ಜಾತಿ ಪ್ರಮಾಣಪತ್ರ (ನೀವು ಎಸ್‌ಟಿ/ಎಸ್‌ಇ ಆದ್ದಲ್ಲಿ ಮಾತ್ರ)

ನೀವು ಆನ್‌ಲೈನ್ ಅರ್ಜಿ ಸಲ್ಲಿಕೆ ಮಾಡುವ ಮುನ್ನ ಈ ಎಲ್ಲಾ ದಾಖಲೆಗಳನ್ನು ಹೊಂದಿರಬೇಕಾಗುತ್ತದೆ. ಸಾಲ ಲಭ್ಯವಾಗುವ ಸಂದರ್ಭದಲ್ಲಿ ಯಾವುದೇ ತೊಂದರೆ ಉಂಟಾಗುವುದನ್ನು ತಡೆಯುವ ನಿಟ್ಟಿನಲ್ಲಿ ಎಲ್ಲಾ ದಾಖಲೆಯನ್ನು ಸರಿಯಾಗಿ ಅಪ್‌ಲೋಡ್ ಮಾಡಲಾಗಿದೆಯೇ ಎಂದು ಪರಿಶೀಲನೆ ಮಾಡಿಕೊಳ್ಳಿ.

 

ಹೊಸ ಬದಲಾವಣೆಗಳು ಏನಿದೆ?

ಈ ಯೋಜನೆಯಲ್ಲಿ ಈಗ ಹಲವಾರು ಬದಲಾವಣೆಗಳನ್ನು ಮಾಡಲಾಗಿದೆ. ಮಹಿಳೆ, ಎಸ್‌ಸಿ, ಎಸ್‌ಟಿ ವಿಭಾಗಕ್ಕೆ ಈ ಯೋಜನೆಯಲ್ಲಿ ಸಾಲ ಪಡೆಯುವ ವಯಸ್ಸಿನ ಮಿತಿಯನ್ನು ಇನ್ನೂ ಹತ್ತು ವರ್ಷಗಳ ಕಾಲ ವಿಸ್ತರಣೆ ಮಾಡಲಾಗಿದೆ. 35 ವರ್ಷಕ್ಕಿಂತ ಅಧಿಕ ವಯಸ್ಸಿನ ಮಹಿಳೆ, ಎಸ್‌ಸಿ, ಎಸ್‌ಟಿ ವಿಭಾಗದವರು ಯೋಜನೆಗೆ ಅರ್ಜಿ ಸಲ್ಲಿಕೆ ಮಾಡಬಹುದಾಗಿದೆ.

* ಈ ಹಿಂದೆ ಈ ಯೋಜನೆಯ ಫಲಾನುಭವಿಗಳಾಗಬೇಕಾದರೆ ಮಹಿಳೆಯರು ಹತ್ತನೇ ತರಗತಿ ಉತ್ತೀರ್ಣರಾಗಬೇಕಾಗಿತ್ತು. ಆದರೆ ಈಗ ಈ ವಯಸ್ಸಿನ ಮಿತಿಯನ್ನು ಎಂಟನೇ ತರಗತಿಗೆ ಇಳಿಕೆ ಮಾಡಲಾಗಿದೆ.
* ಯೋಜನೆಯ ಸಾಲ ಮಿತಿಯನ್ನು ಒಂದು ಲಕ್ಷದಿಂದ ಎರಡು ಲಕ್ಷಕ್ಕೆ ಏರಿಕೆ ಮಾಡಲಾಗಿದೆ
* ಈ ಯೋಜನೆಯಲ್ಲಿ ಕೃಷಿಗೆ ಸಂಬಂಧಿಸಿದ ಸಾಲ ಲಭ್ಯವಾಗಲಿದೆ. ಆದರೆ ಕೃಷಿಗಾಗಿ ವಸ್ತು ಖರೀದಿ, ಕೃಷಿ ವೆಚ್ಚ, ಇತರೆ ವೆಚ್ಚ ಸೇರ್ಪಡೆಯಾಗಲಾರದು.
* ಇಬ್ಬರು ಮೂವರು ಹೊಸ ಸ್ವ ಉದ್ಯೋಗ ಮಾಡುವುದಾದರೆ ಐದು ಲಕ್ಷದವರೆಗೆ ಸಾಲ ಲಭ್ಯವಾಗಲಿದೆ.
* ಏಳು ಉತ್ತರದ ರಾಜ್ಯಗಳಲ್ಲಿ ಯೋಜನೆಯ ಗರಿಷ್ಠ ವಯೋಮಿತಿ 40 ವರ್ಷವಾಗಿದೆ
* ಈಶಾನ್ಯ ಭಾಗದ ಜನರಿಗೆ ಕನಿಷ್ಠ ವಯೋಮಿತಿ 18 ಆಗಿದ್ದು, ಗರಿಷ್ಠ ವಯೋಮಿತಿ 35 ಆಗಿದೆ.
* ಎಸ್‌ಸಿ, ಎಸ್‌ಟಿ ಸಮುದಾಯವರಿಗೆ ಗರಿಷ್ಠ ವಯೋಮಿತಿ 45 ವರ್ಷವಾಗಿದೆ
* ಅರ್ಜಿದಾರರು ಎಂಟನೇ ತರಗತಿ ಉತ್ತೀರ್ಣರಾಗಿರಬೇಕು
* ಫಲಾನುಭವಿಗಳಿಗೆ ಶೇಕಡ 15ರಷ್ಟು ಸಬ್ಸಿಡಿ ಲಭ್ಯವಾಗಲಿದೆ. ಸುಮಾರು 7500 ಸಬ್ಸಿಡಿ ಲಭ್ಯವಾಗಬಹುದು.