ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರಿಗೆ ಒಂಟೆ ಹಾಲು ಅಚ್ಚುಮೆಚ್ಚು. ಈ ಹಾಲು ಸಾಕಷ್ಟು ಪೌಷ್ಟಿಕಾಂಶವನ್ನು ಹೊಂದಿದೆ. ಭಾರತದ ಅಪೌಷ್ಟಿಕತೆ ಹೋಗಲಾಡಿಸಲು ಒಂಟೆ ಹಾಲು ಬಳಸುವ ಬಗ್ಗೆ ಮೋದಿ ಚಿಂತನೆ ನಡೆಸುತ್ತಿದ್ದಾರೆ ಎಂಬ ಸುದ್ದಿ ಬಂದಿರುವ ಬೆನ್ನಲ್ಲೇ, ದೇಶದ ಪ್ರಮುಖ ಹೈನುಗಾರಿಕಾ ಸಂಸ್ಥೆ ಅಮುಲ್ ಜನರ ಆರೋಗ್ಯವನ್ನು ಗಮನದಲ್ಲಿಟ್ಟುಕೊಂಡು ಒಂಟೆ ಹಾಲನ್ನು ಮಾರುಕಟ್ಟೆಗೆ ಪರಿಚಯಿಸಿದೆ.

ಅಮುಲ್ ಪ್ರಯೋಗಾರ್ಥವಾಗಿ ಒಂಟೆ ಹಾಲು ಮಾರಾಟಕ್ಕೆ ಮುಂದಾಗಿದೆ. ಗುಜರಾತಿನ ಗಾಂಧಿನಗರ, ಅಹಮದಾಬಾದ್ ಹಾಗೂ ಕಛ್ ಮಾರುಕಟ್ಟೆಯಲ್ಲಿ ಸದ್ಯ ಒಂಟೆ ಹಾಲು ಸಿಗುತ್ತಿದೆ.

ಒಂಟೆ ಹಾಲು ಸುಲಭವಾಗಿ ಜೀರ್ಣವಾಗುತ್ತದೆ. ಆರೋಗ್ಯಕ್ಕೂ ಬಹಳ ಒಳ್ಳೆಯದು. ಮಧುಮೇಹ ರೋಗಿಗಳಿಗೆ ಇದು ಬೆಸ್ಟ್. ಯಾವುದೇ ಅಲರ್ಜಿ ಗುಣವಿಲ್ಲದಿರುವುದರಿಂದ ಒಂಟೆ ಹಾಲು ಎಲ್ಲರೂ ಸೇವಿಸಬಹುದು ಎಂದು ವೈದ್ಯರು ನೀಡಿದ ಪ್ರಮಾಣ ಪತ್ರವನ್ನು ಅಮುಲ್ ನೀಡುತ್ತಿದೆ. ಮಧುಮೇಹ ಹಾಗೂ ಕ್ಯಾನ್ಸರ್ ರೋಗಿಗಳಿಗೆ ಅಮುಲ್ ಹಾಲು ಬಹಳ ಪ್ರಯೋಜನಕಾರಿ ಎಂದು ಕಂಪನಿ ಹೇಳಿದೆ.

ಲಭ್ಯ ಮಾಹಿತಿಯಂತೆ, 500 ಎಂಎಲ್ ಒಂಟೆ ಹಾಲಿನ ಬೆಲೆ 50 ರೂಪಾಯಿ. ಗ್ರಾಹಕರ ಬೇಡಿಕೆ ಹಾಗೂ ಪ್ರತಿಕ್ರಿಯೆ ನೋಡಿಕೊಂಡು ರಾಜಸ್ಥಾನದಿಂದ ಹೆಚ್ಚಿನ ಪ್ರಮಾಣದಲ್ಲಿ ಹಾಲನ್ನು ತರಿಸಿಕೊಳ್ಳಲು ಅಮುಲ್ ನಿರ್ಧರಿಸಿದೆ.