ನವದೆಹಲಿ, ಫೆಬ್ರವರಿ 1 : ಪ್ರಧಾನಿ ನರೇಂದ್ರ ಮೋದಿ ಅವರ ಸಮರ್ಥ ನಾಯಕತ್ವದಲ್ಲಿ ಮುಂದಿನ ಐದು ವರ್ಷಗಳಲ್ಲಿ ನವ ಭಾರತ ನಿರ್ಮಾಣ ಮಾಡುವುದಾಗಿ ಷೋಘಿಸಿರುವ ಹಂಗಾಮಿ ವಿತ್ತ ಸಚಿವ ಪಿಯೂಶ್ ಗೋಯಲ್ ಅವರು, ಸರಕಾರವನ್ನು 'ವಿಷನ್ 2030'ನತ್ತ ಮುನ್ನಡೆಸಲು 10 ಪ್ರಮುಖ ಸಂಗತಿಗಳನ್ನು ಪ್ರಕಟಿಸಿದ್ದಾರೆ.

1) ದೈಹಿಕವಾಗಿ ಮತ್ತು ಸಾಮಾಜಿಕವಾಗಿ ಜೀವನವನ್ನು ಸರಳ ಮತ್ತು ಸುಗಮವಾಗಿಸಲು ಮತ್ತು ಮುಂದಿನ ಪೀಳಿಗೆಗಾಗಿ ಮೂಲಸೌಕರ್ಯ ನಿರ್ಮಿಸಲು 10 ಟ್ರಿಲಿಯನ್ ಡಾಲರ್ ಆರ್ಥಿಕತೆ ನಿರ್ಮಾಣ.

2) ದೇಶದ ಪ್ರತಿ ನಾಗರಿಕನಿಗೆ ಡಿಜಿಟಲ್ ಇಂಡಿಯಾ ತಲುಪುವಂತಾಗಲು, ಅಸಂಖ್ಯ ಸ್ಟಾರ್ಟಪ್ ಮತ್ತು ಉದ್ಯೋಗಗಳನ್ನು ಯುವಜನತೆಯೇ ಸೃಷ್ಟಿಸಿ ದೇಶವನ್ನು ಮುನ್ನಡೆಸಲಿದ್ದಾರೆ.

3) ಸ್ವಚ್ಛ ಮತ್ತು ಹಸಿರು ಭಾರತ : ದೇಶದಲ್ಲಿ ಎಲೆಕ್ಟ್ರಿಕ್ ವಾಹನಗಳನ್ನು ಹೆಚ್ಚಾಗಿ ಬಳಸಲಿದ್ದು, ಭಾರತದಲ್ಲಿ ವಿದ್ಯುತ್ ನವೀಕರಣ ಪ್ರಮುಖ ಶಕ್ತಿಯ ಮೂಲವಾಗಲಿದೆ, ಇದರಿಂದ ಕಚ್ಚಾ ತೈಲ ಆಮದು ಮೇಲಿನ ಅವಲಂಬನೆ ತಗ್ಗಲಿದೆ.

4) ಸಣ್ಣ ಪ್ರಮಾಣದ ಉದ್ಯಮ ಮತ್ತು ದೇಶದಾದ್ಯಂತ ಇರುವ ಸ್ಟಾರ್ಟಪ್ ಕಂಪನಿಗಳನ್ನು ಹಾಗು ಅತ್ಯಾಧುನಿಕ ಔದ್ಯೋಗಿಕ ತಂತ್ರಜ್ಞಾನಗಳನ್ನು ಬಳಸಿ ಗ್ರಾಮೀಣ ಔದ್ಯೋಗೀಕರಣವನ್ನು ವಿಸ್ತರಿಸುವುದು.

5) ಸ್ವಚ್ಛ ನದಿಗಳು : ಸಣ್ಣ ನೀರಾವರಿ ತಂತ್ರದ ಮೂಲಕ ಎಲ್ಲ ಭಾರತೀಯರಿಗೆ ಶುದ್ಧ ಮತ್ತು ಸುರಕ್ಷಿತ ಕುಡಿಯುವ ನೀರು, ಆರೋಗ್ಯಕರ ಜೀವನ.

6) ಸಾಗರ ಮತ್ತು ಕರಾವಳಿಯ ಅಭಿವೃದ್ಧಿ. ಕರಾವಳಿಯನ್ನು ಆರ್ಥಿಕತೆ ವೃದ್ಧಿಸಲು ಬಳಸುವುದು.

7) ವಿದೇಶಿ ಖಗೋಳಯಾತ್ರಿಗಳಿಗೆ ಲಾಂಚ್ ಪ್ಯಾಡ್ ಆಗುತ್ತಿರುವ ಭಾರತದಿಂದ 2022ರಲ್ಲಿ ಭಾರತೀಯ ಖಗೋಳ ವಿಜ್ಞಾನಿಯನ್ನು ವ್ಯೋಮಕ್ಕೆ ಕಳಿಸುವುದು.

8) ಸಾವಯವ ಆಹಾರಕ್ಕೆ ಹೆಚ್ಚಿನ ಒತ್ತುಕೊಟ್ಟು ಕೃಷಿ ಉತ್ಪನ್ನವನ್ನು ಉತ್ತಮಪಡಿಸುವುದು ಮತ್ತು ಆಹಾರದ ಸದ್ಬಳಕೆ ಮಾಡುವುದು.

9) ಆರೋಗ್ಯಕರ ಭಾರತಕ್ಕಾಗಿ ಯಾವುದೇ ಕುಂದುಕೊರತೆಗಳಿಲ್ಲದ ಸಮಗ್ರ ಆರೋಗ್ಯ ವ್ಯವಸ್ಥೆಯನ್ನು ಜಾರಿಗೆ ತರುವುದು.

10) ಎಲೆಕ್ಟ್ರಾನಿಕ್ ಆಡಳಿತದ ಜಾರಿಯೊಂದಿಗೆ ಸದಾ ಕಾರ್ಯನಿರತ, ಜವಾಬ್ದಾರಿಯುತ ಮತ್ತು ಸ್ನೇಹಮಯಿ ಅಧಿಕಾರಿಗಳೊಂದಿಗೆ ಕನಿಷ್ಠ ಸರಕಾರ, ಗರಿಷ್ಠ ಆಡಳಿತದ ಗುರಿ.