ಕೊರೊನಾ ತಡೆಗೆ ಸಿಂಗಾಪೂರ್ ಏಪ್ರಿಲ್ 7ರಿಂದ ಲಾಕ್ ಡೌನ್

ಸಿಂಗಾಪೂರ್ ಸರ್ಕಾರವು ಕೊರೊನಾ ವೈರಾಣು ಹರಡುವುದನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಪ್ರಮುಖ ತೀರ್ಮಾನ ಕೈಗೊಂಡಿದೆ. ಏಪ್ರಿಲ್ 7ನೇ ತಾರೀಕಿನಿಂದ ಶಾಲೆ, ಉದ್ಯೋಗ ಸ್ಥಳಗಳನ್ನು ಮುಚ್ಚಲು ನಿರ್ಧರಿಸಿದೆ. ಅಗತ್ಯ ಸೇವೆಗಳು, ಮುಖ್ಯ ಆರ್ಥಿಕ ವಲಯಗಳನ್ನು ಹೊರತುಪಡಿಸಿ ಮಂಗಳವಾರದಿಂದ ಉಳಿದೆಲ್ಲವನ್ನು ಒಂದು ತಿಂಗಳು ಮುಚ್ಚಲಾಗುವುದು.

ಈ ಬಗ್ಗೆ ಶುಕ್ರವಾರ ಸಿಂಗಾಪೂರ್ ಪ್ರಧಾನಿ ದೇಶವನ್ನು ಉದ್ದೇಶಿಸಿ ಮಾತನಾಡಿದ್ದಾರೆ. ಆರ್ಥಿಕತೆಗೆ ಉತ್ತೇಜನ ನೀಡುವ ಉದ್ದೇಶದಿಂದ ಕೆಲವು ಕ್ರಮಗಳನ್ನು ಮುಂದಿನ ವಾರ ಘೋಷಿಸುವುದಾಗಿ ತಿಳಿಸಿದ್ದಾರೆ. ಇತ್ತೀಚಿನ ವಾರಗಳಲ್ಲಿ ಸಿಂಗಾಪೂರ್ ನಲ್ಲಿ ಕೊರೊನಾ ವೈರಾಣು ವ್ಯಾಪಿಸುತ್ತಿರುವ ಹಿನ್ನೆಲೆಯಲ್ಲಿ ಈ ನಿರ್ಧಾರ ಮಾಡಲಾಗಿದೆ.

ಸಿಂಗಾಪೂರ್ ಸರ್ಕಾರ ಕೈಗೊಂಡಿರುವ ಕ್ರಮಗಳೇನು ಎಂಬ ವಿವರ ಇಲ್ಲಿದೆ:
* ಮುಂದಿನ ವಾರದಿಂದ ಕ್ಯಾಸಿನೋಗಳು, ಥೀಮ್ ಪಾರ್ಕ್ ಗಳು ಮುಚ್ಚಲಾಗುವುದು

* ಆಹಾರ ಮಳಿಗೆ, ಮಾರ್ಕೆಟ್, ಸೂಪರ್ ಮಾರ್ಕೆಟ್, ಕ್ಲಿನಿಕ್, ಆಸ್ಪತ್ರೆ, ಸಂಚಾರ ವ್ಯವಸ್ಥೆ, ಬ್ಯಾಂಕಿಂಗ್ ಮತ್ತಿತರ ಅಗತ್ಯ ಸೇವೆಗಳು ಲಭ್ಯವಿರುತ್ತವೆ.

* ಏಪ್ರಿಲ್ 7ರಿಂದ ಎಲ್ಲ ರೆಸ್ಟೋರೆಂಟ್ ಗಳು, ಕಾಫೀ ಶಾಪ್ ಗಳು, ಫುಡ್ ಕೋರ್ಟ್ ಗಳು, ಇತರ ಆಹಾರ- ಪಾನೀಯ ಮಳಿಗೆಗಳಿಂದ ಡೆಲಿವರಿ ಅಥವಾ ತೆಗೆದುಕೊಂಡು ಹೋಗುವ ಸೇವೆ ಮಾತ್ರ ಇರಲಿದೆ.

* ಜಾಗತಿಕ ಸರಬರಾಜು ಜಾಲಗಳು ಮುಚ್ಚುವುದಿಲ್ಲ.

* ಪ್ರೀ ಸ್ಕೂಲ್ ಮತ್ತು ವಿದ್ಯಾರ್ಥಿಗಳ ಕಾಳಜಿ ಮಾಡೂವ ಕೇಂದ್ರಗಳು ಮುಚ್ಚಲಾಗುತ್ತವೆ. ಆದರೆ ಉದ್ಯೋಗ ಮಾಡುವ ಪೋಷಕರು, ಪರ್ಯಾಯ ವ್ಯವಸ್ಥೆ ಮಾಡಲು ಸಾಧ್ಯವಿಲ್ಲದವರ ಸಲುವಾಗಿ ನಿಯಮಿತವಾಗಿ ಸೇವೆ ಒದಗಿಸುತ್ತವೆ.

* ಏಪ್ರಿಲ್ 5ನೇ ತಾರೀಕಿನಿಂದ ಮರುಬಳಕೆ ಮಾಡಬಹುದಾದ ಮಾಸ್ಕ್ ಗಳನ್ನು ಸಾರ್ವಜನಿಕರಿಗೆ ವಿತರಿಸಲಾಗುವುದು.

ಅಂದ ಹಾಗೆ, ಸಿಂಗಾಪೂರ್ ಸರ್ಕಾರವು ವ್ಯಾಪಾರ- ವ್ಯವಹಾರ, ಕುಟುಂಬಗಳನ್ನು ಬೆಂಬಲಿಸುವ ಉದ್ದೇಶದಿಂದ ಯೋಜನೆ ಘೋಷಿಸುವ ನಿರೀಕ್ಷೆ ಇದೆ.