2020/21 ಹಣಕಾಸು ವರ್ಷದ ವಿತ್ತೀಯ ಕೊರತೆ 7%ಗೂ ಹೆಚ್ಚಾಗುವ ಸಾಧ್ಯತೆ

2021ರ ಮಾರ್ಚ್ ಕೊನೆ ಹೊತ್ತಿಗೆ ಭಾರತದ ವಿತ್ತೀಯ ಕೊರತೆಯು ಜಿಡಿಪಿಯ (ಗ್ರಾಸ್ ಡೊಮೆಸ್ಟಿಕ್ ಪ್ರಾಡಕೃ) 7%ಗೂ ಹೆಚ್ಚಾಗಲಿದೆ ಎಂದು ಮೂರು ಮೂಲಗಳು ಹೇಳುರುವುದಾಗಿ ರಾಯಿಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಕೊರೊನಾ ಲಾಕ್ ಡೌನ್ ಮತ್ತು ಕೋವಿಡ್- 19 ನಿಯಂತ್ರಣಕ್ಕಾಗಿ ಹೇರಿದ ನಿರ್ಬಂಧಗಳ ಪರಿಣಾಮ ಇದು ಎನ್ನಲಾಗಿದೆ.

ಭಾರತ ಸರ್ಕಾರವು ಈ ಹಿಂದೆ ಅಂದಾಜು ಮಾಡಿದಂತೆ, ಜಿಡಿಪಿಯ 3.5% ವಿತ್ತೀಯ ಕೊರತೆ ಆಗಬಹುದು ಎಂದು ಹೋದ ವರ್ಷದ ಫೆಬ್ರವರಿಯಲ್ಲಿ ಅಂದಾಜಿಸಿತ್ತು. ಇನ್ನು ಸರ್ಕಾರದ ಸಾಲವನ್ನು 7.8 ಲಕ್ಷ ಕೋಟಿ ರುಪಾಯು ಎಂದು ಅಂದಾಜಿಸಿದ್ದನ್ನು ಆ ನಂತರ 12 ಲಕ್ಷ ಕೋಟಿ ರುಪಾಯಿಗೆ ಪರಿಷ್ಕೃತಗೊಳಿಸಿತ್ತು.

7%ಗಿಂತ ಹೆಚ್ಚಿನ ವಿತ್ತೀಯ ಕೊರತೆ ಆದಲ್ಲಿ ಅದು ಕೆಲವು ಖಾಸಗಿ ಅರ್ಥಶಾಸ್ತ್ರಜ್ಞರು ಅಂದಾಜು ಮಾಡಿದ್ದಕ್ಕಿಂತ ಹೆಚ್ಚಿನದಾಗುತ್ತದೆ. ಪ್ರಸಕ್ತ ಹಣಕಾಸು ವರ್ಷದ ದ್ವಿತೀಯಾರ್ಧದಲ್ಲಿ ತೆರಿಗೆ ಸಂಗ್ರಹ ಹೆಚ್ಚಾಗಬಹುದು ಎಂದು ಅಂದಾಜು ಮಾಡಿದ್ದರು. ಆದರೆ ಸರ್ಕಾರಿ ಮೂಲಗಳು ಹೇಳುವಂತೆ, ಈ ಹಿಂದಿನ ನಷ್ಟವನ್ನು ಸರಿತೂಗಿಸಲು ಅದು ಸಾಧ್ಯವಾಗಲ್ಲ.

ಎರಡು ಮೂಲಗಳ ಪ್ರಕಾರ, ತೆರಿಗೆ ಹಾಗೂ ಸರ್ಕಾರಿ ಕಂಪೆನಿಗಳ ಬಂಡವಾಳ ಹಿಂತೆಗೆತದಿಂದ ಆಗುವ ಆದಾಯ ಕೊರತೆಯೇ 7 ಲಕ್ಷ ಕೋಟಿ ರುಪಾಯಿ ಆಗುತ್ತದೆ. ಆದರೆ ಹಣಕಾಸು ಸಚಿವಾಲಯದ ವಕ್ತಾರರು ಈ ಬಗ್ಗೆ ಪ್ರತಿಕ್ರಿಯೆ ನೀಡಲು ನಿರಾಕರಿಸಿದ್ದಾರೆ. ಇನ್ನು ಯಾವುದೇ ಪರಿಷ್ಕೃತ ವಿತ್ತೀಯ ಕೊರತೆ ಅಂದಾಜು ಬಿಡುಗಡೆಯನ್ನು ಸರ್ಕಾರದಿಂದ ಮಾಡಬೇಕಿದೆ.

2020/21 ಹಣಕಾಸು ವರ್ಷದ ಜಿಡಿಪಿಯ ಮೊದಲ ಮುಂಚಿತ ಅಂದಾಜನ್ನು ಬಿಡುಗಡೆ ಮಾಡಲು ಭಾರತ ಸಿದ್ಧತೆ ನಡೆಸಿದೆ. ಅಂತಿಮವಾದ ವಿತ್ತೀಯ ಕೊರತೆ ಅಂದಾಜನ್ನು ಫೆಬ್ರವರಿ 1ನೇ ತಾರೀಕಿನಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಘೋಷಣೆ ಮಾಡಲಿದ್ದಾರೆ.